ສິ້ນສຸດການລໍຄອຍ ພິທີເປີດການບໍລິການ ເບື້ອງຕົ້ນທີ່ທະນາຄານຄໍາ ລາວ

ໃນວັນທີ 27 ກັນຍາ 2024, ໄດ້ມີພິທີເປີດບໍລິການເບື້ອງຕົ້ນທະນາຄານຄໍາລາວ ທີ່ຕຶກສຳນັກງານ ຕັ້ງຢູ່ບ້ານໂພນໄຊ ເມືອງໄຊເສດຖາ ນະຄອນຫຼວງວຽງຈັນ ໂດຍການເຂົ້າຮ່ວມຂອງ ທ່ານ ສັນຕິພາບ ພົມວິຫານ ລັດຖະມົນຕີ ກະຊວງການເງິນ ແລະ ທ່ານ ປອ ອາດສະພັງທອງ ສີພັນດອນ, ເຈົ້າຄອງນະຄອນຫຼວງວຽງຈັນ ພ້ອມດ້ວຍທ່ານນາງ ວັດທະນາ ດາລາລອຍ, ຮັກສາການ ຜູ້ວ່າການທະນາຄານແຫ່ງ ສປປ ລາວ; ທ່ານ ທອງພັດ ອິນທະວົງ, ຮອງລັດຖະມົນຕີ ກະຊວງ ພະລັງງານ ແລະບໍ່ແຮ່, ທ່ານ ປອ ຈັນທອນ ສິດທິໄຊ ປະທານ ແລະ ຜູ້ກໍ່ຕັ້ງບໍລິສັດ PTL Holding ຈຳກັດ ແລະບັນດາການນຳຈາກກະຊວງ ແລະອົງການຈັດຕັ້ງ ຂອງພັກ-ລັດທຸກພາກສ່ວນ, ບັນດາຜູ້ບໍລິຫານຕາງໜ້າຈາກທະນາຄານຕ່າງໆ ຕະຫຼອດຮອດພາກສ່ວນອື່ນໆທີ່ກ່ຽວຂ້ອງ ແລະແຂກຜູ້ມີກຽດເຂົ້າຮ່ວມເປັນສັກຂີພະຍານໃນພິທີອັນມີຄວາມໝາຍຄວາມສຳຄັນຄັ້ງນີ້.

ພິທີເປີດບໍລິການ ທະນາຄານຄຳ ດັ່ງກ່າວນີ້ເປັນບາດກ້າວສຳຄັນຕໍ່ການປະກອບສ່ວນຈັດຕັ້ງຜັນຂະຫຍາຍ ຄວາມຕັ້ງໃຈຂອງ ພັກ ແລະ ລັດຖະບານລາວ ທີ່ຢາກໃຫ້ມີທະນານຄານຄໍາ ເພື່ອປະຕິບັດພາລະບົດບາດໃນການສຳຮອງຄຳເພື່ອຄໍ້າປະກັນຄວາມໝັ້ນຄົງທາງດ້ານການເງິນ ແລະການຄັງຄໍ້າປະກັນຄ່າເງິນກີບໃຫ້ຢູ່ໃນລະດັບທີ່ຫມັ້ນທ່ຽງ ສ້າງສະຖຽນລະພາບທາງດ້ານເສດຖະກິດ ໃຫ້ແກ່ ສປປ ລາວ ໃຫ້ນັບມື້ນັບເຂັ້ມແຂງ ແລະຂະຫຍາຍຕົວຢ່າງໝັ້ນຄົງຍືນຍົງສີວິໄລ.

ໃນໂອກາດດັ່ງກ່າວ, ທ່ານ ນາງ ວັດທະນາ ດາລາລອຍ ໄດ້ກ່າວຢໍ້າເຖິງຄວາມສຳຄັນ ຂອງພິທີເປີດໃຫ້ບໍລິການໃນຄັ້ງນີ້ ທີ່ໄດ້ສະແດງໃຫ້ເຫັນເຖິງ ຄວາມມຸ່ງໝັ້ນຕັ້ງໃຈ ຂອງທະນາຄານຄຳ ລາວ ໃນການປະກອບສ່ວນ ພັດທະນາເສດຖະກິດ-ສັງຄົມ ຂອງ ສປປ ລາວ ບັນລຸໄດ້ ຕາມແນວທາງຍຸດທະສາດ ແລະ ນະໂຍບາຍຂອງພັກ ແລະ ລັດ ວ່າດ້ວຍການພັດທະນາລະບົບ ສະຖານບັນການເງິນ-ການຄັງ ແລະ ສະຖຽນລະພາບດ້ານເງິນຕາແຫ່ງຊາດ ໃຫ້ເຂັ້ມແຂງໝັ້ນຄົງ ແລະ ສາມາດແຂ່ງຂັນໃນເງື່ອນໄຂການເຊື່ອມໂຍງກັບສາກົນ ຊຸກຍູ້ກິດຈະກຳທາງເສດຖະກິດ ໃຫ້ຂະຫຍາຍຕົວ ຢ່າງຕໍ່ເນື່ອງ.

ໃນໂອກາດດຽວກັນ, ທ່ານ ຈັນທອນ ສິດທິໄຊ ໄດ້ກ່າວວ່າ: ເພື່ອຮັບປະກັນຕໍ່ແນວຄິດຍຸດທະສາດຂອງ ພັກ-ລັດຖະບານ ຕອບສະຫນອງໄດ້ເຖິງຄວາມຮຽກຮ້ອງຕ້ອງການຂອງສັງຄົມ ປະຕິບັດໃຫ້ໄດ້ຕໍ່ຄໍາຫມັ້ນສັນຍາ ວ່າຈະເປີດໃຫ້ບໍລິການທະນາຄານຄໍາ ໃຫ້ໄດ້ເບື້ອງຕົ້ນໃນທ້າຍເດືອນ ກັນຍາ 2024; ໜ່ວຍງານຮັບຜິດ ຊອບ ຂອງ ທະນາຄານຄຳ ລາວ ທຸກພາກສ່ວນ ໄດ້ຕັ້ງໜ້າເອົາໃຈໃສ່ສຶກສາຄົ້ນຄວ້າ, ກະກຽມຄວາມພ້ອມຮອບດ້ານດ້ວຍຄວາມຮັບຜິດຊອບສູງ ຮ່ວມມືກັບພາກສ່ວນທີ່ກ່ຽວຂ້ອງຂອງລັດຖະບານໂດຍສະເພາະແມ່ນ ກະຊວງການເງິນ ແລະ ທະນາຄານແຫ່ງ ສປປ ລາວ ພ້ອມກັບ, ຄູ່ຮ່ວມມືຍຸດທະສາດທີ່ມີປະສົບການສູງ ຈາກສາກົນດ້ານວັດຖຸມີຄ່າ ດ້ານການຄຸ້ມຄອງບໍລິຫານ ຕະຫຼອດຮອດ ການຈັດຫາລະບົບການຄຸ້ມຄອງບໍລິການ, ເຄື່ອງມືອຸປະກອນຕ່າງໆທີ່ມີສັກກະຍະພາບ ແລະ ຄຸນນະພາບສູງ ຕາມມາດຕະຖານທີ່ສາກົນຍອມຮັບ ເປັນຕົ້ນແມ່ນພວກເຮົາສໍາເລັດເບື້ອງຕົ້ນໃນການຕິດຕັ້ງ ລະບົບ ຄໍແບັ້ງກິ້ງ (Core Banking), ລະບົບປ້ອງກັນຄວາມປອດໄພ, ລະບົບກວດກາຄຸນນະພາບຄໍາ ແລະ ລະບົບຫ້ອງຫມັ້ນຄົງ ຫລື ຕູ້ເກັບຄໍາ ຕະຫລອດຮອດຕູ້ສະຫນອງຄໍາອັດຕະໂນມັດ”.

ທັງໝົດທີ່ໄດ້ມີການກະກຽມມານັ້ນ, ກໍແມ່ນເພື່ອຮອງຮັບຜະລິດຕະພັນ ແລະ ການບໍລິການແກ່ສັງຄົມ ໃນການເປີດບັນຊີຝາກຄຳ ຈຳໜ່າຍຄຳແທ່ງ ຜ່ານຕູ້ຈຳໜ່າຍວັດຖຸມີຄ່າອັດຕະໂນມັດ, ສິນເຊື່ອກູ້ຄຳ, ການອອກໃບຢັ້ງຢືນຄຳເພື່ອນຳໃຊ້ເປັນຫຼັກຊັບຄ້ຳປະກັນ, ການຮັບຝາກຄຳ ດ້ວຍຫ້ອງເກັບຮັກສາ ແລະ ຕູ້ນິລະໄພ ຂັ້ນສູງ, ການບໍລິການກວດກາຄຸນນະພາບຄວາມບໍລິສຸດ ຂອງຄຳ, ການບໍລິການທາງການຄ້າຄຳ ໃນລະດັບສາກົນ (international gold trading) ການປະເມີນມູນຄ່າແຮ່ຄໍາທີ່ຍັງບໍ່ໄດ້ຂຸດຄົ້ນ ແລະ ການສໍາຮອງຄໍາແກ່ລັດຖະບານ.

ໃນພິທີເປີດດັ່ງກ່າວນີ້, ທະນາຄານຄຳ ລາວ ໄດ້ ໂອກາດ ເປີດຕົວ “ບໍລິການ” ທຳອິດຈາກທະນາຄານຄຳເຊັ່ນ:

1. ບັນຊີຝາກຄຳ (Gold Saving)
2. ຕູ້ກົດຄຳ ອັດຕະໂນມັດ (Gold Vending Machine)

ໃນໂອກາດນີ້ ທະນາຄານຄຳລາວ ໄດ້ເປີດໂອກາດໃຫ້ລູກຄ້າ ສາມາດເປີດບັນຊີຝາກຄໍາ ໄດ້ແລ້ວຕັ້ງແຕ່ມື້ນີ້, ແຕ່ເນື່ອງຈາກທາງທະນາຄານ ຢູ່ໃນຂັ້ນເປີດໃຫ້ບໍລິການເບື້ອງຕົ້ນ ຈຶ່ງຂໍສະຫງວນສິດໃນການເປີດ ບັນຊີຝາກຄຳ “50 ບັນຊີ” ຕໍ່ມື້.
ສຳລັບພາລະກິດໃນບາດກ້າວຕໍ່ໄປ ທະນາຄານຄຳ ລາວ ແມ່ນ ຈະສືບຕໍ່ວຽກງານຕ່າງໆໃຫ້ສໍາເລັດໃນມໍ່ໆນີ້ ແລະ ຈະເປີດການບໍລິການຄົບວົງຈອນໃຫ້ໄດ້ ຕາມຄາດຫມາຍໃນເດືອນ ພະຈິກ 2024 ນີ້ ແລະ ຈະໃຫ້ສໍາເລັດໂຮງກັ່ນຫລອມຄໍາໃນ ໄຕມາດ 1 ຂອງປີ 2025.

ການເປີດບໍລິການ ທະນາຄານຄຳໃນຄັ້ງນີ້ ເປັນປັດໄຈ ແລະ ຂີດໝາຍບາດ ກ້າວອັນສຳຄັນໃນການກະຕຸກຊຸກຍູ້ ການເຕີບໂຕທາງດ້ານເສດຖະກິດ ຂອງປະເທດ ໂດຍເປັນແຫຼ່ງສຳຮອງໃນການສະສົມຄຳ, ຊັບພະຍາກອນແຮ່ຄຳ, ພັດທະນາຕ່ອງໂສ້ອຸດສາຫະກຳຄຳ ແລະ ຕະຫຼາດຄຳລາວ ໃຫ້ໄດ້ມາດຕະຖານ ກ້າວເຂົ້າສູ່ ການເປັນສູນກາງ ຕະຫຼາດການຄ້າ ແລະ ການລົງທຶນ ໃນຄຳ ຂອງພາກພື້ນ ແລະ ສາກົນ. ອີກທັງ ເປັນການປະກອບສ່ວນ ເປັນກຸນແຈອັນສຳຄັນ ໃຫ້ແກ່ ສປປ ລາວ ສາມາດປົດລັອກທ່າແຮງ ແລະ ເສີມສ້າງຄວາມໝັ້ນຄົງ ແລະ ສະຖຽນລະພາບ ທາງດ້ານເສດ ຖະກິດ, ການເງິນ-ການຄັງ ແລະ ສະກຸນເງິນກີບໃຫ້ນັບມື້ໝັ້ນຄົງເຂັ້ມແຂງຕໍ່ໆໄປ.

แชร์