ກອງປະຊຸມຄະນະປະຈຳສະພາແຫ່ງຊາດ ປະຈຳເດືອນກັນຍາ

ກອງປະຊຸມຄະນະປະຈໍາສະພາແຫ່ງຊາດ ປະຈໍາເດືອນ ກັນຍາ 2024 ໄດ້ດໍາເນີນຂຶ້ນໃນລະຫວ່າງວັນທີ 23-24 ກັນຍາ ຜ່ານມາ ໂດຍການເປັນປະທານຂອງທ່ານ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ ປະທານຄະນະປະຈໍາສະພາແຫ່ງຊາດ; ມີບັນດາທ່ານຮອງປະທານຄະນະປະຈໍາສະພາແຫ່ງຊາດ ແລະ ກຳມະການຄະນະປະຈໍາສະພາແຫ່ງຊາດ, ບັນດາທ່ານລັດຖະມົນຕີ ແລະ ຮອງລັດຖະມົນຕີ ກະຊວງ, ອົງການທີ່ກ່ຽວຂ້ອງ ເຂົ້າຮ່ວມຢ່າງພ້ອມພຽງ.

ກອງປະຊຸມໄດ້ພິຈາລະນາບັນຫາສໍາຄັນພື້ນຖານຂອງປະເທດຊາດ ຕາມຂອບເຂດສິດ ແລະ ໜ້າທີ່ຂອງຄະນະປະຈໍາສະພາແຫ່ງຊາດ ທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໝາຍ ເປັນຕົ້ນ ບົດລາຍງານຄວາມຄືບໜ້າຂອງການກະກຽມຮອບດ້ານໃຫ້ແກ່ການເປັນເຈົ້າພາບຈັດກອງປະຊຸມໃຫຍ່ສະມັດຊາລັດຖະສະພາລະຫວ່າງຊາດອາຊຽນ ຫຼື ໄອປາ (AIPA) ຄັ້ງທີ 45 ແລະ ກອງປະຊຸມພົບປະລະຫວ່າງຜູ້ນໍາອາຊຽນ ແລະ ຜູ້ນໍາໄອປາ ພ້ອມທັງທິດທາງແຜນການວຽກງານຈຸດສຸມໃນຕໍ່ໜ້າ; ບົດລາຍງານຜົນການປັບປຸງເນື້ອໃນຮ່າງກົດໝາຍວ່າດ້ວຍການຕ້ານການຟອກເງິນ ແລະ ສະໜອງທຶນໃຫ້ແກ່ການກໍ່ການຮ້າຍ (ສະບັບປັບປຸງ) ຕາມການສະເໜີຂອງນາຍົກລັດຖະມົນຕີ ແລະ ການປະກອບຄໍາເຫັນຂອງກອງປະຊຸມຄະນະປະຈໍາສະພາແຫ່ງຊາດ ຄັ້ງວັນທີ 8 ສິງຫາ 2024; ບົດລາຍງານການກະກຽມຄວາມພ້ອມຂອງຮ່າງກົດໝາຍທີ່ຈະນໍາເຂົ້າພິຈາລະນາຢູ່ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX; ບົດລາຍງານການສະເໜີແຕ່ງຕັ້ງ, ຍົກຍ້າຍ ບຸກຄະລາກອນຂອງສານປະຊາຊົນ ຈໍານວນໜຶ່ງ; ບົດລາຍງານກ່ຽວກັບຮ່າງແຜນການກະກຽມ ແລະ ດໍາເນີນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX; ບົດລາຍງານການປະເມີນຜົນ ການຈັດຕັ້ງປະຕິບັດກົດໝາຍ 4 ສະບັບ ໃນຂົງເຂດວັດທະນະທໍາ-ສັງຄົມ; ບົດລາຍງານການຕິດຕາມກວດກາການຈັດຕັ້ງປະຕິບັດ ຍຸດທະສາດການປະຕິຮູບລະບົບການສຶກສາ ແລະ ພັດທະນາຊັບພະຍາກອນມະນຸດແຫ່ງຊາດ; ບົດລາຍງານການຄົ້ນຄວ້າ ແລະ ມີຄໍາເຫັນຕໍ່ຮ່າງຍຸດທະສາດການຄຸ້ມຄອງ ແລະ ພັດທະນາທີ່ດິນກະສິກໍາ ຮອດປີ 2030 ແລະ ວິໄສທັດຮອດປີ 2040; ບົດລາຍງານຜົນການຄົ້ນຄວ້າໜັງສືສະເໜີຂອງລັດຖະບານ ກ່ຽວກັບການຂໍຫັນປ່ຽນປະເພດທີ່ດິນປ່າໄມ້ ໄປເປັນດິນອຸດສາຫະກໍາ ເພື່ອນໍາໃຊ້ເຂົ້າໃນໂຄງການຂຸດຄົ້ນ ແລະ ປຸງແຕ່ງຖ່ານຫີນ ຂອງບໍລິສັດ ຜົ້ງສາລີ ຈຽງເຊິນຟູໄຮ ບໍ່ແຮ່ ຈໍາກັດ; ບົດລາຍງານຜົນການລົງຕິດຕາມກວດກາ ແລະ ການປະເມີນຄືນການຈັດຕັ້ງປະຕິບັດ, ການດໍາເນີນງານຂອງບັນດາໂຄງການລົງທຶນພັດທະນາເຂື່ອນໄຟຟ້າພະລັງງານນໍ້າ ຢູ່ແຂວງສະຫວັນນະເຂດ ແລະ ແຂວງຄໍາມ່ວນ; ບົດລາຍງານຜົນການຄົ້ນຄວ້າໜັງສືສະເໜີຂອງລັດຖະບານ ກ່ຽວກັບການຂໍການພິຈາລະນາອອກມະຕິຮັບຮອງການຍົກເວັ້ນພາສີ, ອາກອນ ແລະ ຄ່າທໍານຽມຕ່າງໆ ໃນການຈັດຊື້ນໍ້າມັນເຊື້ອໄຟຮັບໃຊ້ວຽກງານປ້ອງກັນຊາດ ແລະ ການນໍາພັກ-ລັດ ປະຈໍາປີ 2024; ບົດລາຍງານຜົນການຄົ້ນຄວ້າໜັງສືສະເໜີຂອງລັດຖະບານ ກ່ຽວກັບການຂໍໃຫ້ຄະນະປະຈໍາສະພາແຫ່ງຊາດ ພິຈາລະນາໃຫ້ສືບຕໍ່ປະຕິບັດມະຕິຂອງຄະນະປະຈໍາສະພາແຫ່ງຊາດ ສະບັບເລກທີ 238/ຄປຈ, ລົງວັນທີ 3 ສິງຫາ 2023 ກ່ຽວກັບການປັບຫຼຸດອັດຕາພາສີຂາເຂົ້ານໍ້າມັນ Naphtha ຈາກ 20% ມາເປັນ 5% ໃຫ້ບໍລິສັດ ຍອດງື່ມ ພາວເວີ ມະຫາຊົນ; ບົດລາຍງານຜົນການຄົ້ນຄວ້າໜັງສືສະເໜີຂອງລັດຖະບານ ກ່ຽວກັບການພິຈາລະນາຮັບຮອງ ແລະ ຍົກເວັ້ນການປະຕິບັດບາງມາດຕາຂອງກົດໝາຍ ທີ່ຕິດພັນກັບໂຄງການເຂື່ອນໄຟຟ້ານໍ້າເນີນ 1 ຂອງບໍລິສັດ ໄຟຟ້ານໍ້າຕົກນໍ້າເນີນ 1 ຈໍາກັດຜູ້ດຽວ; ຜົນການຄົ້ນຄວ້າໜັງສືສະເໜີຂອງລັດຖະບານ ກ່ຽວກັບການສະເໜີຂໍຍົກເວັ້ນການປະຕິບັດບາງເນື້ອໃນຂອງກົດໝາຍທີ່ພົວພັນກັບໂຄງການພະລັງງານໄຟຟ້າແສງຕາເວັນ ແມ່ຂອງ ພາວເວີ ຈໍາກັດ.

(ຂ່າວ: ນາງ ກຸກກິກ ບຸດດາໄຊ; ພາບ: ອານຸສອນ ພູມມີທອນ)

แชร์