ກອງປະຊຸມສຳມະນາ ກ່ຽວກັບວຽກງານຕ້ານການຟອກເງິນ ແລະການສະໜອງທຶນໃຫ້ແກ່ການກໍ່ການຮ້າຍ (AML/CFT)

ໃນວັນທີ 17-18 ກັນຍາ 2024, ກົມສົນທິສັນຍາ ແລະກົດໝາຍ, ກະຊວງການຕ່າງປະເທດ ໂດຍການຮ່ວມມື ແລະການສະໜັບສະໜູນຈາກສຳນັກງານຂໍ້ມູນຕ້ານການຟອກເງິນຂອງທະນາຄານແຫ່ງ ສປປ ລາວ ແລະ ອົງການສະຫະປະຊາຊາດ ເພື່ອຕ້ານຢາເສບຕິດ ແລະ ອາຊະຍາກຳ (UNODC) ໄດ້ຈັດກອງປະຊຸມສຳມະນາກ່ຽວກັບວຽກງານຕ້ານການຟອກເງິນ ແລະການສະໜອງທຶນໃຫ້ແກ່ການກໍ່ການຮ້າຍ (AML/CFT) ສໍາລັບພະນັກງານກະຊວງການຕ່າງປະເທດທີ່ ເມືອງວັງວຽງ, ແຂວງວຽງຈັນ ພາຍໃຕ້ການເປັນປະທານຂອງທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດໂດຍມີຜູ້ເຂົ້າຮ່ວມທັງໝົດ 57 ທ່ານ ຊຶ່ງເປັນພະນັກງານຂັ້ນກົມ,ຂັ້ນພະແນກ ແລະວິຊາການຈາກບັນດາກົມໃນກະຊວງການຕ່າງປະເທດ ແລະວິທະຍາກອນຈາກພາກສ່ວນທີ່ກ່ຽວຂ້ອງກັບວຽກງານ AML/CFT ຄື ສໍານັກງານຂໍ້ມູນຕ້ານການຟອກເງິນ (ສຕຟງ) ຂອງທະນາຄານແຫ່ງ ສປປ ລາວ, ກົມຕິດຕາມກວດກາການດຳເນີນຄະດີອາຍາຂອງອົງການໄອຍະການປະຊາຊົນສູງສຸດ, ກົມຄຸ້ມຄອງວິຊາການ ແລະ ສະຖິຕິສານຂອງສານປະຊາຊົນສູງສຸດ, ກົມສົນທິສັນຍາ ແລະ ກົດໝາຍ ແລະ ກົມອົງການຈັດຕັ້ງສາກົນຂອງກະຊວງການຕ່າງປະເທດ.

ການປະຊຸມສໍາມະນາຄັ້ງນີ້ແມ່ນເພື່ອສ້າງຄວາມຮັບຮູ້ ແລະ ຄວາມເຂົ້າໃຈໂດຍພື້ນຖານ ກ່ຽວກັບ ວຽກງານການຕ້ານອາຊະຍາກຳຂ້າມຊາດທີ່ມີການຈັດຕັ້ງ ໂດຍສະເພາະການຕ້ານການຟອກເງິນ ແລະ ຕ້ານການສະໜອງທຶນໃຫ້ແກ່ການກໍ່ການຮ້າຍ. ໃນກອງປະຊຸມດັ່ງກ່າວ, ໄດ້ມີການນຳສະເໜີ, ແລກປ່ຽນບົດຮຽນ ແລະ ປະສົບການໃນບັນດາຫົວຂໍ້ທີ່ສໍາຄັນຂອງວຽກງານ AML/CFT ຊຶ່ງຊ່ວຍສ້າງຄວາມຮັບຮູ້ ແລະ ຄວາມເຂົ້າໃຈຢ່າງເລິກເຊິ່ງໃຫ້ແກ່ນັກສຳມະນາກອນ ກ່ຽວກັບການຈັດຕັ້ງປະຕິບັດວຽກງານ AML/CFT ເປັນຕົ້ນ ບັນດາສົນທິສັນຍາທີ່ ສປປ ລາວ ເປັນພາຄີ, ບັນດາຍັດຕິທີ່ກ່ຽວຂ້ອງຂອງສະພາຄວາມໝັ້ນຄົງ ສປຊ, ກົນໄກການທົບທວນຊຶ່ງກັນ ແລະ ກັນຂອງກຸ່ມ ອາຊີ-ປາຊີຟິກຕ້ານການຟອກເງິນ (APG) ພາຍໃຕ້ມາດຕະຖານຂອງອົງການຕ້ານການຟອກເງິນສາກົນ (FATF), ການປະຕິບັດວຽກງານຕ້ານການຟອກເງິນຂອງພາກສ່ວນທີ່ກ່ຽວຂ້ອງ ໂດຍສະເພາະພາລະບົດບາດຂອງຄະນະກຳມະ ການແຫ່ງຊາດເພື່ອຕ້ານການຟອກເງິນ ແລະ ສະໜອງທຶນໃຫ້ແກ່ການກໍ່ການຮ້າຍ (ຄຕຟງ) ຊຶ່ງມີ ສຕຟງ ທີ່ເປັນກອງເລຂາ ແລະ ໜ່ວຍງານຮັບຜິດຊອບຫຼັກໃນວຽກງານດັ່ງກ່າວ, ການທົບທວນຊຶ່ງກັນ ແລະ ກັນຂອງ APG ສໍາລັບ ສປປ ລາວ ໃນຄັ້ງຜ່ານມາ ພາຍໃຕ້ຂໍ້ແນະນໍາ 40 ຂໍ້ຂອງອົງການ FATF, ຜົນສໍາເລັດໃນວຽກງານ AML/CFT ໃນໄລຍະຜ່ານມາຂອງ ສປປ ລາວ ແລະ ບັນດາຂໍ້ຄົງຄ້າງທີ່ຈະຕ້ອງແກ້ໄຂ ເພື່ອກະກຽມໃຫ້ແກ່ການທົບທວນຄັ້ງຕໍ່ໄປໃນປີ 2025 ນີ້ ກໍຄືການປະຕິບັດໜ້າທີຂອງກະຊວງການຕ່າງປະເທດ ແລະ ພາກສ່ວນທີ່ກ່ຽວ ຂ້ອງໃນວຽກງານດັ່ງກ່າວ ຊຶ່ງຖືວ່າເປັນຂໍ້ມູນພື້ນຖານທີ່ເປັນປະໂຫຍດໃຫ້ແກ່ພະນັກງານກະຊວງການຕ່າງປະເທດ ນຳໄປໝູນໃຊ້ເຂົ້າໃນການປະຕິບັດໜ້າທີວຽກງານຂອງຕົນໃນຕໍ່ໜ້າ.

แชร์