ຈີນ ຊ່ວຍຊຸກຍູ້ອຸດສາຫະກຳລົດໃຊ້ພະລັງງານໃໝ່ຂອງ ອາຊຽນ

ວິທະຍຸໂທລະພາບສູນກາງຈີນ CMG ໄດ້ລາຍງານວ່າ: ໃນຊຸມປີຜ່ານມາ, ຕະຫລາດທີ່ດີ, ສະພາບແວດລ້ອມອຸດສາຫະກຳ ແລະນະໂຍບາຍທີ່ເອື້ອຍອຳນວຍເຮັດໃຫ້ຕະຫລາດລົດໃຊ້ພະລັງງານໃໝ່ຂອງບັນດາປະເທດອາຊຽນ ໄດ້ຮັກສາທ່າອຽງທີ່ເຕີບໂຕຢ່າງຕໍ່ເນື່ອງ.

ນັບແຕ່ປີ 2020 ຫາ 2023, ປະລິມານການຈຳໜ່າຍລົດໃຊ້ພະລັງງານໃໝ່ໃນບັນດາປະເທດອາຊຽນ ໄດ້ເພີ່ມຈາກ 9.000 ຄັນຂຶ້ນເປັນ 155.000 ຄັນ, ເພີ່ມຂຶ້ນ 169% ສະເລ່ຍຕໍ່ປີ. ໃນນັ້ນ, ລົດໃຊ້ພະລັງງານໃໝ່ຂອງຈີນ ໄດ້ເພີ່ມຂຶ້ນຢ່າງວ່ອງໄວ. ໃນ 5 ເດືອນທຳອິດປີນີ້, ໃນ 10 ຍີ່ຫໍ້ລົດໃຊ້ພະລັງງານໄຟຟ້າທີ່ຂາຍດີທີ່ສຸດໃນຕະຫລາດໄທ, ມີ 9 ຍີ່ຫໍ້ແມ່ນເປັນຂອງຈີນ. ໃນໄລຍະດຽວກັນ, ລົດໃຊ້ພະລັງານໄຟຟ້າຂອງຈີນ ກໍໄດ້ເປັນອັນດັບທີໜຶ່ງໃນຕະຫລາດອິນໂດເນເຊຍ, ສິງກະໂປ ແລະລາວ.

ລົດໃຊ້ພະລັງງານໃໝ່ຂອງຈີນ ບໍ່ພຽງແຕ່ໄດ້ຮັບຄວາມນິຍົມຊົມຊອບຈາກຜູ້ບໍລິໂພກທ້ອງຖິ່ນ ຍ້ອນມີເຕັກນິກປະດິດສ້າງທີ່ໂດດເດັ່ນ ແລະ ການບໍລິການຫລັງການຂາຍທີ່ຄົບຖ້ວນເທົ່ານັ້ນ, ຫາກຍັງໄດ້ເສີມຂະຫຍາຍບົດບາດອັນຕັ້ງໜ້າໃນການຊຸກຍູ້ການຍົກລະດັບອຸດສາຫະກຳລົດໃຊ້ພະລັງງານໃໝ່ຂອງບັນດາປະເທດອາຊຽນອີກດ້ວຍ.

ວິສາຫະກິດຈີນມີບົດຮຽນທີ່ອຸດົມສົມບູນໃນຂົງເຂດລົດໃຊ້ພະລັງງານໃໝ່ ທັງມີທ່າແຮງດ້ານຕ່ອງໂສ້ອຸດສາຫະກຳ. ນອກຈາກການສົ່ງອອກລົດແລ້ວ, ວິສາຫະກິດຈີນ ຍັງຊ່ວຍຊຸກຍູ້ການປັບປຸງຕ່ອງໂສ້ອຸດສາຫະກຳລົດໃຊ້ພະລັງງານໃໝ່ຂອງທ້ອງຖິ່ນໃຫ້ສົມບູນຂຶ້ນ.

ໃນຊຸມປີຜ່ານມາ, ວິສາຫະກິດລົດຕ່າງໆຂອງຈີນ ເຊັ່ນ: BYD, CHANGCHENG, WULING ເປັນຕົ້ນ ໄດ້ລົງທຶນສ້າງໂຮງງານຜະລິດຢູ່ໄທ, ມາເລເຊຍ ແລະ ອິນໂດເນຊຍ, ບໍ່ພຽງແຕ່ໄດ້ຫລຸດຕົ້ນທຶນການຜະລິດໃຫ້ຕໍ່າລົງເທົ່ານັ້ນ, ຫາກຍັງໄດ້ຍົກກຳລັງແຂ່ງຂັນຂອງຜະລິດຕະພັນໃຫ້ສູງຂຶ້ນອີກດ້ວຍ.

ວິສາຫະກິດຈີນ ໄປສ້າງໂຮງງານຢູ່ປະເທດເຫລົ່ານີ້ ກໍໄດ້ນຳພາໃຫ້ວິສາຫະກິດໃນຕ່ອງໂສ້ການສະໜອງລົດຫລາຍຮ້ອຍແຫ່ງເຂົ້າໄປລົງທຶນຢູ່ປະເທດເຫລົ່ານີ້ເຊັ່ນກັນ, ວິສາຫະກິດໃນຕ່ອງໂສ້ການສະໜອງລົດຂອງຈີນ ກໍໄດ້ໄປລົງທຶນຢູ່ບັນດາປະເທດອາຊຽນນັບມື້ນັບຫລາຍຂຶ້ນ ເຊັ່ນ: ບໍລິສັດ CATL, ບໍລິສັດ SVOLT ຂອງຈີນ ກໍໄດ້ລົງທຶນສ້າງຖານການຜະລິດແບດເຕີຣີສະໜອງພະລັງດັນຂອງຕົນຢູ່ປະເທດໄທ; ວິສາຫະກິດລົດອື່ນໆຂອງຈີນ ເຊັ່ນ: ບໍລິສັດເວີຍລາຍ, ບໍລິສັດສຽວຜິງ ເປັນຕົ້ນກໍໄດ້ກຽມຈະສ້າງອຸປະກອນສາກໄຟ ແລະ ເຄືອຂ່າຍບໍລິການຫລາຍກວ່າເກົ່າຢູ່ບັນດາປະເທດອາຊຽນໃນຫລາຍປີຂ້າງໜ້າ. ໂດຍຜ່ານຈາກຮູບແບບການລົງທຶນສ້າງໂຮງງານ ແລະ ຮ່ວມມືກັບວິສາຫະກິດທ້ອງຖິ່ນ, ໄດ້ບັນລຸການເຊື່ອມຕໍ່ລະຫວ່າງບໍລິສັດຕົ້ນນ້ຳ ແລະ ບໍລິສັດປາຍນ້ຳຂອງຕ່ອງໂສ້ອຸດສາຫະກຳ ເຊິ່ງໄດ້ຍົກກຳລັງແຂ່ງຂັນ ແລະ ປະສິດທິພາບຂອງຕ່ອງໂສ້ອຸດສາຫະກຳລົດໃຫ້ສູງຂຶ້ນ.

ອິນໂດເນເຊຍ, ມາເລເຊຍ, ໄທ ແລະ ກຳປູເຈຍ ລ້ວນແຕ່ໄດ້ເພີ່ມທະວີການຮ່ວມມືກັບວິສາຫະກິດລົດ ແລະ ວິສາຫະກິດແບດເຕີຣີຂອງຈີນ ຢ່າງກວ້າງຂວາງ ເຊິ່ງໄດ້ວາງນະໂຍບາຍອຸດໜູນ ແລະ ສະໜັບສະໜູນຫລາຍຢ່າງ ເພື່ອຊຸກຍູ້ການຜະລິດ ແລະ ການບໍລິໂພກຂອງລົດໃຊ້ພະລັງງານໃໝ່ ແລະ ຍົກລະດັບອຸດສາຫະກຳຂອງປະເທດຕົນໃຫ້ສູງຂຶ້ນ. ຕົວຢ່າງຄື: ເພື່ອບັນລຸເປົ້າໝາຍທີ່ເຮັດໃຫ້ປະລິມານການຜະລິດລົດໃຊ້ພະລັງງານໄຟຟ້າໄດ້ກວມ 30% ຂອງຍອດປະລິມານການຜະລິດລົດເມື່ອຮອດ ປີ 2030, ໄທ ພວມວາງນະໂຍບາຍທີ່ກ່ຽວຂ້ອງ ເພື່ອດຶງດູດວິສາຫະກິດລົດຂອງຈີນ ໄປລົງທຶນຢູ່ໄທ ໂດຍໄດ້ປະຕິບັດມາດຕະການອຸດໜູນ “EV3.0” ແລະ “EV3.5”; ອິນໂດເນເຊຍ ພວມສ້າງ ແລະ ປັບປຸງຕ່ອງໂສ້ອຸດສາຫະກຳຜະລິດແບດເຕີຣີໃຫ້ສົມບູນຂຶ້ນ ແລະ ຂະຫຍາຍສ້າງເຄືອຂ່າຍສາກໄຟສຳລັບລົດໃຊ້ພະລັງງານໄຟຟ້າໃນຂອບເຂດທົ່ວປະເທດຂອງຕົນຫລາຍຂຶ້ນເລື້ອຍໆ; ໃນດ້ານພະລັງງານແສງຕາເວັນ, ຫວຽດນາມ ຫາກໍ່ໄດ້ເຜີຍແຜ່ແຜນພັດທະນາພະລັງງານໄຟຟ້າສະບັບທີ 8 ເຊິ່ງມີເປົ້າໝາຍຍົກປະລິມານສະຖານີຜະລິດ ແລະ ສະສົມພະລັງງານໄຟຟ້າດ້ວຍແສງຕາເວັນຢ່າງຫລວງຫລາຍເມື່ອຮອດປີ 2030; ຟີລິບປິນ ໄດ້ຈັດເອົາລະບົບນິເວດສີຂຽວ ເຊັ່ນ: ພະລັງງານໝູນວຽນ ແລະ ການສະສົມພະລັງງານເຂົ້າໃນຂະແໜງການບຸລິມະສິດສຳລັບການລົງທຶນຈາກຕ່າງປະເທດ ແລະ ຫລຸດພາສີໃຫ້ແກ່ຂະແໜງການເຫລົ່ານີ້.

ຄຽງຄູ່ກັບບັນດາປະເທດອາຊຽນ ໄດ້ປັບປຸງນະໂຍບາຍລົດໃຊ້ພະລັງງານໃໝ່ ແລະຕະຫລາດລົດໃຊ້ພະລັງງານໃໝ່ຂອງປະເທດເຫລົ່ານີ້ໄດ້ຂະຫຍາຍກວ້າງອອກເລື້ອຍໆ, ວິສາຫະກິດຈີນຈະມີອະນາຄົດທີ່ກວ້າງຂວາງກວ່າເກົ່າໃນການພັດທະນາຢູ່ປະເທດເຫລົ່ານີ້. ໃນອະນາຄົດ, ວິສາຫະກິດລົດຂອງຈີນ ຈະສາມາດດຳເນີນການຮ່ວມມືກັບວິສາຫະກິດຂອງບັນດາປະເທດອາຊຽນ ຢ່າງກວ້າງຂວາງກວ່າເກົ່າ, ຮ່ວມກັນຊຸກຍູ້ການພັດທະນາຕ່ອງໂສ້ອຸດສາຫະກຳລົດໃຊ້ພະລັງງານຢູ່ປະເທດເຫລົ່ານີ້ ແລະ ບັນລຸການຮ່ວມມືແບບຕ່າງຝ່າຍຕ່າງໄດ້ຮັບຜົນປະໂຫຍດ.

แชร์