ຄາດຄະເນເບື້ອງຕົ້ນ ເສຍຫາຍ 720 ຕື້ກວ່າກີບຈາກນໍ້າຖ້ວມຢູ່

ສປປ ລາວ ໄດ້ຮັບຜົນເສຍຫາຍຈາກນໍ້າຖ້ວມ ຫລາຍກວ່າ 720 ຕື້ກີບ ແລະ ເສຍຊີວິດ 10 ຄົນ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນ ຕີ, ລັດຖະມົນຕີກະຊວງປ້ອງກັນປະເທດ, ປະທານຄະນະກໍາມະ ການຄຸ້ມຄອງໄພພິບັດຂັ້ນສູນກາງ ເປັນປະທານກອງປະຊຸມປຶກສາຫາລືກ່ຽວກັບການແກ້ໄຂໄພພິບັດນໍ້າຖ້ວມ ປະຈຳປີ 2024 ຢູ່ບັນດາເເຂວງໃນລາວ ຈັດຂຶ້ນໃນວັນທີ 24 ກັນຍານີ້ ທີ່ນະຄອນຫລວງວຽງຈັນ.

ທ່ານ ວົງຄໍາ ພັນທະນຸວົງ ຫົວໜ້າກອງ ເລຂາຄະນະກຳມະການຄຸ້ມຄອງ ໄພພິບັດຂັ້ນສູນກາງ ໄດ້ລາຍງານສະພາບລວມຂອງໄພພິບັດ ແລະ ການຕອບໂຕ້ ສຸກເສີນ ປີ 2024 ເຊິ່ງນັບແຕ່ວັນທີ 18 ກໍລະກົດ 2024 ຮອດປັດຈຸບັນ, ສປປ ລາວ ໄດ້ຮັບຜົນກະທົບ ຈາກພາຍຸ 4 ຫົວ, ມີ 15 ແຂວງ ທີ່ຖືກຜົນກະທົບ ຄື: ນະຄອນຫລວງວຽງຈັນ, ແຂວງຫລວງນໍ້າທາ, ຜົ້ງສາລີ, ສາລະວັນ, ຄໍາມ່ວນ, ຫລວງພະບາງ, ຊຽງຂວາງ, ຫົວພັນ, ເຊກອງ, ວຽງຈັນ, ບໍ່ແກ້ວ, ໄຊຍະບູລີ, ບໍລິຄຳໄຊ, ໄຊສົມບູນ ແລະ ແຂວງອຸດົມໄຊ ໂດຍອີງຕາມຂໍ້ມູນ ທີ່ຄະນະກຳມະ ການຄຸ້ມຄອງໄພພິບັດຂັ້ນແຂວງລາຍງານຜົນກະທົບ ຮອດວັນທີ 24 ກັນຍາ 2024, ລວມທັງໝົດມີ 125 ເມືອງ, 1.337 ບ້ານ, 50.889 ຄອບຄົວ, ປະຊາຊົນຖືກຜົນກະທົບ 200.169 ຄົນ, ຍິງ 83.268 ຄົນ, ເສຍຊີວິດ 10 ຄົນ, ສູນຫາຍ 2 ຄົນ, ເຮືອນໄດ້ຮັບຄວາມເສຍຫາຍ 969 ຫລັງ, ໃນນີ້, ເສຍຫາຍ 100% ຈໍານວນ 137 ຫລັງ, ເສຍຫາຍ ບາງສ່ວນ 832 ຫລັງ), ເນື້ອທີ່ທໍາການຜະລິດຖືກກະທົບ 29.659,39 ເຮັກຕາ, ຊົນລະປະທານ 125 ແຫ່ງ, ໜອງປາ 697 ໜອງ, ສັດໃຫຍ່ ແລະ ສັດປິກ ຈໍານວນ 11.866 ໂຕ; ເສັ້ນທາງ 272 ເສັ້ນ, ຂົວ 14 ແຫ່ງ, ໂຮງ ຮຽນ 79 ຫລັງ, ໂຮງໝໍແຂວງ 1 ແຫ່ງ, ສຸກສາລາ 13 ແຫ່ງ, ນໍ້າລິນ 37 ແຫ່ງ, ເສົາໄຟຟ້າ 312 ເສົາ, ລະບົບນໍ້າປະປາ 6 ຈຸດ. ນອກນີ້, ຍັງມີລະບົບໂທລະຄົມ, ອາຄານສໍານັກງານຫ້ອງການຂອງລັດ-ເອກະຊົນ, ຮ້ານຄ້າ, ໂຮງງານ, ຕະຫລາດ ແລະ ພາຫະນະກໍໄດ້ຮັບຜົນກະທົບ ຫລາຍສົມຄວນ, ຄາດຄະເນມູນຄ່າຜົນເສຍຫາຍເບື້ອງຕົ້ນ 720 ຕື້ກວ່າກີບ.

ແຂວງທີ່ໄດ້ຮັບຜົນກະທົບຫລາຍກວ່າໝູ່ເເມ່ນເເຂວງຫລວງນໍ້າທາ ເເລະ ນະຄອນຫລວງວຽງຈັນ. ພ້ອມກັນນີ້, ຍັງໄດ້ລາຍ ງານກ່ຽວກັບການຊ່ວຍເຫລືອສຸກເສີນ, ແຜນການຟື້ນຟູໃນໄລຍະຮີບດ່ວນຂັ້ນສູງກາງ, ຂັ້ນເເຂວງ, ການຊ່ວຍເຫລືອຈາກພາຍໃນ ເເລະ ຕ່າງປະເທດ, ພ້ອມທັງໄດ້ປຶກສາຫາລື ແລະ ເອກະ ພາບຕໍ່ແຜນຈຸດສຸມໃນການນໍາໃຊ້ກອງທຶນຄຸ້ມຄອງໄພພິບັດ, ແກ້ໄຂໄພພິບັດ, ເເຜນການຟື້ນຟູຮີບດ່ວນ ເເລະເເຜນການຈຸດ ສຸມໃນຕໍ່ໜ້າ.

ພົນເອກ ຈັນສະໝອນ ຈັນຍາລາດ ໄດ້ໃຫ້ທິດຊີ້ນຳ ແລະ ເນັ້ນໜັກຫລາຍບັນຫາ ຕໍ່ຄະນະກໍາມະການຄຸ້ມຄອງໄພພິບັດ ເເລະພາກສ່ວນກ່ຽວຂ້ອງຕ່າງໆ ໃຫ້ເອົາໃຈຍົກສູງຄວາມຮັບ ຜິດຊອບຂອງຕົນເປັນໜ້າທີ່ສຳຄັນ, ມີເເບບເເຜນ, ມີການປະ ສານສົບທົບກັນຢ່າງລະອຽດໃນເເຕ່ລະຂັ້ນ ເພື່ອເເກ້ໄຂໃຫ້ທັນເວລາ, ສືບຕໍ່ໂຄສະນາຕິດຕາມການປ່ຽນແປງຂອງສະພາບອາກາດ ເພື່ອແຈ້ງເຕືອນປະຊາຊົນໃຫ້ມີສະຕິລະວັງຕົວປ້ອງກັນລ່ວງໜ້າຢ່າງເປັນເຈົ້າການ, ຄະນະກຳມະການຄຸ້ມຄອງໄພພິບັດແຕ່ລະຂັ້ນ ນັບເເຕ່ສູນກາງຮອດທ້ອງຖິ່ນ ຕ້ອງກຽມຄວາມພ້ອມຮອບດ້ານເພື່ອຮັບມື ເເລະເເກ້ໄຂຟື້ນຟູ, ສ້ອມເເປງຢ່າງຮີບດ່ວນ ໃນການຊ່ວຍເຫລືອດ້ານຕ່າງໆຕໍ່ກັບບັນດາເເຂວງທີ່ໄດ້ຖືກຜົນກະທົບໃນລາວໃຫ້ກັບມາສູ່ສະພາບປົກກະຕິໃຫ້ໄດ້ໄວທີ່ສຸດ.

ຂ່າວ: ສຸກສາຄອນ

แชร์