ທ່າທຽບເຮືອສາກົນ ລາວ-ຫວຽດ ຕ້ອນຮັບກຳປັ່ນລຳທຳອິດ ຂົນສົ່ງອຸປະກອນໂຄງການພະລັງງານລົມ

ວັນທີ 23 ກັນຍາ 2024 ຜ່ານມາ, ບໍລິສັດ ຫຸ້ນສ່ວນ ທ່າກຳປັ່ນສາກົນລາວ-ຫວຽດ ນາມ ຈຳກັດ ຈັດພິທີຕ້ອນຮັບກຳປັ່ນ PACIFIC INTEGRITY ເຊິ່ງເປັນກໍາປັ່ນລຳທຳອິດຂອງໂຄງການພະລັງງານລົມ ຫາຍແອັງ-ກວາງຈິ ປະກອບມີ: ກັງຫັນ, ເສົາ, ໃບພັດ, ເຄື່ອງປັ່ນໄຟຟ້າ ແລະ ອຸປະກອນອື່ນໆ ໄດ້ທຽບເຂົ້າທ່າເຮືອ ຫວຸ່ງອາງ ສສ ຫວຽດນາມ ໂດຍມີຜູ້ຕາງໜ້າຈາກພາກລັດ, ບໍລິສັດການຄ້າບໍ່ແຮ່ ຮ່າຕິ້ງ, ນັກລົງທຶນໂຄງການພະລັງງານລົມ, ບໍລິສັດ ຄຸ້ມຄອງທ່າເຮືອ, ເຈົ້າຂອງກຳປັ່ນ, ສູນ Logistics, ກຸ່ມບໍລິສັດ ເຕີນກາງ ໄຊ່ງອນ ແລະ ພາກສ່ວນຕ່າງໆທີ່ກ່ຽວຂ້ອງ ເຂົ້າຮ່ວມ.

ທ່ານ ຫງວ໋ຽນແອງຕ໋ວນ ຜູ້ອຳນວຍການ ບໍລິສັດ ທ່າກຳປັ່ນສາກົນ ລາວ-ຫວຽດນາມ ໄດ້ກ່າວວ່າ: ດ້ວຍຍຸດທະສາດ ການດຳເນີນທຸລະກິດ ຖືລູກຄ້າເປັນໃຈກາງ ແລະ ມຸ່ງໝັ້ນເຖິງການພັດທະນາຮ່ວມກັນ ເຊິ່ງ ບໍລິສັດຈະປະຕິບັດການຄ່ຽນຖ່າຍ ແລະ ຂົນສົ່ງສິນຄ້າ ກໍຄື ໃຫ້ບໍລິການທີ່ກ່ຽວຂ້ອງໂດຍຄໍານຶງເຖິງຄວາມປອດໄພ, ວ່ອງໄວ, ແລະ ຄວາມສະດວກໃຫ້ແກ່ລູກຄ້າ ເພື່ອຮັບປະກັນຜົນປະໂຫຍດຂອງທຸກຝ່າຍ ແລະ ຕອບສະໜອງຄວາມ ໄວ້ວາງໃຈຂອງລູກຄ້າ.

ບໍລິສັດ ທ່າເຮືອສາກົນ ລາວ-ຫວຽດນາມ ຈຳກັດ ກໍຫວັງວ່າຈະໄດ້ຮັບການສືບຕໍ່ຮ່ວມມື ແລະ ສະໜັບສະໜູນຈາກບັນດານັກລົງທຶນ, ລູກຄ້າ, ຄູ່ຮ່ວມມືຫລາຍຂຶ້ນໃນຕໍ່ໜ້າ.
ທີ່ມາ: ວສລ

แชร์