ສປປ ລາວ ມີ 78 ຮ້ານ ຈາກ 55 ບໍລິສັດ ເຂົ້າຮ່ວມງານວາງສະແດງສິນຄ້າ ຈີນ-ອາຊຽນ ຄັ້ງທີ 21

ໃນປີນີ້, ພາກທຸລະກິດລາວ ເຂົ້າຮ່ວມງານວາງສະແດງສິນຄ້າ ຈີນ-ອາຊຽນ ຄັ້ງທີ 21 ທັງໝົດ 78 ຮ້ານ ຈາກ 55 ບໍລິສັດ ທີ່ຈັດຂຶ້ນໃນລະຫວ່າງວັນທີ 24-28 ກັນຍາ 2024 ທີ່ນະຄອນໜານໜິງ ເຂດປົກຄອງຕົນເອງ ຊົນເຜົ່າຈ້ວງກວາງຊີ ສປ ຈີນ, ຊຶ່ງຜະລິດຕະພັນສິນຄ້າ ສ່ວນ​ໃຫຍ່ ຂອງ ສປປ ລາວ ທີ່ໄດ້ນຳສິນຄ້າໄປວາງສະແດງ: ​ຜະ​ລິດ​ຕະ​ພັນ​ໄມ້​ແກະ​ສະຫຼັກ, ເຄື່ອງເຟີນີເຈີ, ເຄື່ອງປະດັບ, ເຄື່ອງຫັດຖະກຳ, ເຄື່ອງອຸດສາຫະກຳ ແລະ ການໂຄສະນາການທ່ອງທ່ຽວ.

ໃນວັນທີ 24 ກັນຍາ 2024 ນີ້, ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ແຫ່ງ ສປປ ລາວ ໄດ້ນໍາພາຄະນະຜູ້ແທນລາວ ເຂົ້າຮ່ວມພິທີເປີດງານວາງສະແດງສິນຄ້າ ຈີນ-ອາຊຽນ ຄັ້ງທີ 21 ແລະ ເຂົ້າຮ່ວມກອງປະຊຸມສຸດຍອດການຄ້າ-ການລົງທຶນ ຈີນ-ອາຊຽນ ຄັ້ງທີ 21 ພາຍໃຕ້ຄຳຂວັນ: “ເຊີດຊູນໍ້າໃຈໄມຕີຈິດ ແລະ ຄວາມຈິງໃຈ, ຍຶດໝັ້ນຜົນປະໂຫຍດ ເພື່ອການພັດທະນາຮ່ວມກັນ ເສີມສ້າງອະນາຄົດອັນໃໝ່ ທີ່ຮຸ່ງເຮືອງສີວິໄລ, ສະໜັບສະໜູນການພັດທະນາເຂດການຄ້າເສລີອາຊຽນ-ຈີນ ສະບັບທີ 3 ແລະ ສ້າງພາກພື້ນໃຫ້ມີການຂະຫຍາຍຕົວຢ່າງມີຄຸນນະພາບສູງ”, ໂດຍຕອບສະໜອງຕາມການເຊື້ອເຊີນຈາກລັດຖະບານ ແຫ່ງ ສາທາລະນະລັດ ປະຊາຊົນຈີນ.

ໂອກາດນີ້, ທ່ານ ຕິ່ງ ຊື້ ຊຽງ ຮອງນາຍົກລັດຖະມົນຕີ ແຫ່ງ ສປ ຈີນ ໄດ້ມີຄໍາເຫັນເປີດພິທີງານວາງສະແດງຢ່າງເປັນທາງການ ໂດຍໄດ້ກ່າວບາງຕອນສໍາຄັນ ຕໍ່ທິດທາງການຮ່ວມມື ລະຫວ່າງ ຈີນ ແລະ ອາຊຽນ ໃຫ້ມີຄວາມສະໜິດສະໜົມຮັກແພງ ຄືພີ່ນ້ອງກັນ, ຮ່ວມມືກັນດ້ວຍຄວາມຈິງໃຈ ເພື່ອສ້າງຄວາມເຊື່ອໝັ້ນ ຊຶ່ງກັນ ແລະ ກັນ ແລະ ຮ່ວມມືກັນຍາວນານ ເພື່ອນໍາເອົາຜົນປະໂຫຍດມາຮ່ວມກັນ ແລະ ເຊື່ອມໂຍງກັນທາງດ້ານໂຄງລ່າງພື້ນຖານ ກໍຄື ລະບົບ ແລະ ປັດໃຈການຜະລິດ.

ນໂອກາດດຽວກັນ, ທ່ານ ກິແກ້ວ ໄຂຄໍາພິທູນ ກໍ່ໄດ້ມີຄຳເຫັນ ໂດຍໄດ້ເນັ້ນໃຫ້ເຫັນເຖິງການພົວພັນຮ່ວມມື ເປັນຄູ່ຮ່ວມຍຸດທະສາດຮອບດ້ານ ລະຫວ່າງ ອາຊຽນ ແລະ ສປ ຈີນ ໃນປີ 2021 ອັນໄດ້ສະແດງໃຫ້ ເຫັນເຖິງຄວາມໝາຍໝັ້ນອັນແຮງກ້າຂອງອາຊຽນ ແລະ ສປ ຈີນ ທີ່ຈະສືບຕໍ່ເສີມຂະຫຍາຍການຮ່ວມມື ໃຫ້ເຂົ້າສູ່ລ່ວງເລິກ ແລະ ລວງກວ້າງ ແລະ ເປັນຮູບປະທໍາໃຫ້ຫຼາຍຂຶ້ນ ເວົ້າລວມ, ເວົ້າສະເພາະ ກໍຄືການເປີດເສລີທາງດ້ານການຄ້າ ແລະ ການລົງທຶນ, ການຮ່ວມມືທາງດ້ານອຸດສາຫະກໍາໃນຂົງເຂດໃໝ່ ເຊັ່ນ: ການຄ້າທາງດ້ານດິຈິຕອນ, ການຄ້າທາງດ້ານເອເລັກໂຕຣນິກ, ເສດຖະກິດດິຈິຕອນ ແລະ ເສດຖະກິດສີຂຽວ ຊຶ່ງເຫັນວ່າ ສອດຄ່ອງກັບສັນຍາການຄ້າເສລີອາຊຽນ-ຈີນ ສະບັບປັບປຸງ ຄັ້ງທີ 3 ໄດ້ເປັນຢ່າງດີ ໂດຍສະເພາະ ໃນທ່າມກາງສະພາບເສດຖະກິດໂລກ ທີ່ຍັງສືບຕໍ່ມີຄວາມອ່ອນໄຫວໃນປະຈຸບັນ ໄດ້ຮຽກຮ້ອງໃຫ້ອາຊຽນ ແລະ ສປ ຈີນ ຕ້ອງໄດ້ເພີ່ມທະວີການຮ່ວມມືກັນ ດ້ວຍຄວາມໄວ້ເນື້ອເຊື່ອໃຈຊຶ່ງກັນ ແລະ ກັນ, ເຄົາລົບ ແລະ ມີນໍ້າໃຈໄມຕີຈິດຕໍ່ກັນ ບົນພື້ນຖານຕ່າງຝ່າຍຕ່າງມີຜົນປະ ໂຫຍດ ເຊິ່ງເປັນສັນຍາລັກສະແດງເຖິງຄວາມຈະເລີນເຕີບໂຕ ແລະ ຄວາມສີວິໄລ ໂດຍຜ່ານການຮ່ວມມື ແລະ ການເປັນຫຸ້ນສ່ວນກັນຢ່າງແທ້ຈິງ. ການຮ່ວມມືອາຊຽນ-ຈີນ ບໍ່ໄດ້ຈໍາກັດພຽງແຕ່ໃນຂອບການຄ້າ-ການລົງທຶນເທົ່ານັ້ນ ຫາກແຕ່ຍັງໄດ້ກວມເອົາການພົວພັນຮ່ວມມື ຂົງເຂດວັດທະນະທໍາ, ການທ່ອງທ່ຽວ ແລະ ອື່ນໆ ໃຫ້ໄດ້ຮັບການເສີມຂະຫຍາຍຫຼາຍຂຶ້ນ; ພິເສດ ແມ່ນຂໍ້ລິເລີ່ມໜຶ່ງແລວ-ໜຶ່ງເສັ້ນທາງ ຊຶ່ງຖືເປັນການປະກອບສ່ວນອັນສໍາຄັນ ເຂົ້າໃນການສົ່ງເສີມການເຊື່ອມຈອດ ເພື່ອອໍານວຍຄວາມສະດວກໃຫ້ແກ່ການຄ້າ, ການລົງທຶນ ແລະ ການທ່ອງທ່ຽວໃນພາກພື້ນ.

ສປປ ລາວ, ພາຍຫຼັງການເປີດນໍາໃຊ້ເສັ້ນທາງລົດໄຟລາວ-ຈີນ ໃນປີ 2021 ຜ່ານມາ ບໍ່ພຽງແຕ່ໄດ້ກາຍເປັນທ່າແຮງອັນສໍາຄັນໃນການອໍານວຍຄວາມສະດວກໃຫ້ແກ່ການຄ້າ, ການລົງທຶນ, ການຄົມມະນາຄົມຂົນສົ່ງເທົ່ານັ້ນ, ແຕ່ຍັງເປັນການສົ່ງເສີມວຽກງານດ້ານການເຊື່ອມໂຍງເຊື່ອມຈອດ ໃນພາກພື້ນ ໂດຍສະເພາະ ສົ່ງເສີມດ້ານການທ່ອງທ່ຽວ ແລະ ການໄປມາຫາສູ່ຂອງປະຊາຊົນລາວ ແລະ ຈີນ ກໍ່ຄື ອາຊຽນ ແລະ ຈີນ ໃຫ້ມີຄວາມສະດວກສະບາຍ ແລະ ວ່ອງໄວຍິ່ງຂຶ້ນ. ພ້ອມດຽວກັນ, ກໍໄດ້ເຊີນຊວນບັນດາຄະນະຜູ້ແທນຈາກບັນດາປະເທດຕ່າງໆ ທີ່ເຂົ້າຮ່ວມງານວາງສະແດງສິນຄ້າຄັ້ງນີ້ ເດີນທາງໄປຢ້ຽມຢາມ ແລະ ທ່ອງທ່ຽວ ສປປ ລາວ ເພື່ອທ່ຽວຊົມຄວາມສວຍງາມທາງທໍາມະຊາດ, ວັດທະ ນະທໍາ, ຮີດຄອງປະເພນີອັນດີງາມທີ່ຫຼາກຫຼາຍ ກໍຄື ສະຖານທີ່ທາງປະຫວັດສາດຂອງ ສປປ ລາວ ໃນໂອກາດ ທີ່ ສປປ ລາວ ເປັນປະທານອາຊຽນ ກໍຄື ປີທ່ອງທ່ຽວລາວ 2024 ນີ້.

ພາຍຫຼັງສໍາເລັດການເຂົ້າຮ່ວມ ພິທີເປີດງານວາງສິນຄ້າ ຈີນ-ອາຊຽນ, ທ່ານ ກິແກ້ວ ໄຂຄໍາພິທູນ ພ້ອມດ້ວຍຄະນະ ຍັງໄດ້​ໄປ​ຢ້ຽມຊົມ​ຮ້ານ​ວາງ​ສະ​ແດງສິນຄ້າ​​ຂອງ​ລາວ, ຊຶ່ງ​ໃນ​ປີ​ນີ້​ ແມ່ນ​ແຂວງຫົວພັນ ໄດ້​ຖືກ​ຄັດ​ເລືອ​ກເປັນ​ເມືອງ​ແຫ່ງ​ສະ​ເໜ່ ແລະ ໃນໂອກາດເດີນທາງເຂົ້າຮ່ວມງານວາງສິນຄ້າ ຈີນ-ອາຊຽນ ຄັ້ງນີ້  ທ່ານ ກິແກ້ວ ໄຂຄໍາພິທູນ ຍັງໄດ້ໃຫ້ສຳພາດ ຕໍ່ສື່ມວນຊົນຈີນ; ໄດ້ໄປຢ້ຽມຢາມບໍລິສັດຂໍ້ມູນຂ່າວສານ ຈີນ-ອາຊຽນ ຈຳກັດ ແລະ ໄດ້ຕ້ອນຮັບການເຂົ້າຢ້ຽມຂ່ຳນັບ ຂອງທ່ານ ປະທານ ບໍລິສັດ ຫົວເຫວີຍ ຕື່ມອີກ.

ນັບແຕ່ປີ 2004 ເປັນຕົ້ນມາ, ງານວາງສະແດງສິນຄ້າ ຈີນ-ອາຊຽນ ໄດ້ກາຍເປັນງານປະຈໍາປີ ທີ່ຍິ່ງໃຫຍ່ລະດັບສາກົນ ທີ່ໄດ້ຮັບຄວາມສົນໃຈຈາກລັດຖະບານ ຂອງປະເທດສະມາຊິກອາຊຽນ ໂດຍໄດ້ມີບັນດາການນໍາຂັ້ນສູງຂອງພາກລັດ ແລະ ພາກທຸລະກິດທີ່ກ່ຽວຂ້ອງ ຈາກອາຊຽນ ແລະ ສປ ຈີນ ເຂົ້າຮວມຢ່າງກວ້າງຂວາງ. ຕະຫຼອດໄລຍະເວລາ 20 ປີຜ່ານມາ ງານວາງສະແດງສິນຄ້າ ຈີນ-ອາຊຽນ ບໍ່ພຽງແຕ່ປະກອບສ່ວນສໍາຄັນເຂົ້າໃນການສົ່ງເສີມການຮ່ວມມືທາງດ້ານການຄ້າ ແລະ ການລົງທຶນ ລະຫວ່າງ ຈີນ-ອາຊຽນ ເທົ່ານັ້ນ, ຫາກຍັງໄດ້ເພີ່ມທະວີຮັດແໜ້ນສາຍພົວພັນຮ່ວມມືລະຫວ່າງ ຈີນ-ອາຊຽນ ໃຫ້ນັບມື້ກວ້າງຂວາງ ທາງດ້ານວັດທະນະທໍາ ກໍຄືສົ່ງເສີມການໄປມາຫາສູ່ກັນ ລະຫວ່າງປະຊາຊົນໃນພາກພື້ນອາຊຽນ-ຈີນ ໃຫ້ນັບມື້ນັບຂະຫຍາຍຕົວຂຶ້ນເລື້ອຍໆ.

ຂ່າວຈາກ: ກົມປະຊາສຳພັນ

แชร์