ເກີດເຫດນໍ້າຖ້ວມຢ່າງຮຸນແຮງຢູ່ປະເທດຊາດ ເສຍຊີວິດຢ່າງໜ້ອຍ 500 ກວ່າຄົນ

ຂປລ.ສຳນັກຂ່າວ ເອເອຟພີ, ວັນທີ 23 ກັນຍາ, ສະຫະປະຊາຊາດ (ຢູເອັນ) ລາຍງານວ່າ: ເກີດອຸທົກກະໄພທີ່ຮຸນແຮງ ຢູ່ຊາດ ຕັ້ງແຕ່ເດືອນກໍລະກົດ ທີ່ຜ່ານມາ ສົ່ງຜົນໃຫ້ມີ ຜູ້ເສຍຊີວິດ 503 ຄົນ ແລະ ສົ່ງຜົນກະທົບຕໍ່ປະຊາຊົນ ອີກປະມານ 1,7 ລ້ານຄົນ, ຂະນະທີ່ ທຸກແຂວງໃນປະເທດ ໄດ້ຮັບຜົນກະທົບ. ໂດຍສໍານັກງານ ເພື່ອການປະສານງານ ດ້ານມະນຸດສະທຳ ແຫ່ງສະຫະປະຊາຊາດ (ໂອຊີເອຊເອ) ປະຈຳ ຊາດ ອອກຖະແຫລງການວ່າ ອຸທົກກະໄພ ໄດ້ທຳລາຍເຮືອນຊານ 212.111 ຫລັງ, ນໍ້າຖ້ວມພື້ນທີ່ນາເຖິງ 357.832 ເຮັກຕາ ແລະ ເຮັດໃຫ້ສັດລ້ຽງ (ງົວ) 69.659ໂຕ ຈົມນໍ້າຕາຍ.
ນອກນີ້ຍັງປະກາດເຕືອນ ໃຫ້ປະຊາຊົນ ເຝົ້າລະວັງບັນຫານໍ້າ ລະດັບນໍ້າໃນແມ່ນໍ້າ ໂລໂກນ ແລະ ແມ່ນໍ້າ ຊາຣີ ຢູ່ໃນລະດັບວິກິດ, ຊຶ່ງອາດເຮັດໃຫ້ເກີດນໍ້າຖ້ວມ ຢ່າງຮຸນແຮງ ໃນອີກບໍ່ເທົ່າໃດວັນຕໍ່ໜ້າ ໂດຍສະເພາະໃນນະຄອນຫລວງ ນະຊາເມັນນາ ຊຶ່ງເປັນຈຸດທີ່ແມ່ນໍ້າ ທັງສອງສາຍ ໄຫລປ່ອງເຂົ້າກັນ.

แชร์