ດ່ານສາກົນວັງເຕົ່າເອົາໃຈໃສ່ຕໍ່ວຽກງານຄວາມສະຫງົບຮອບດ້ານ

   ຕະຫຼອດໄລຍະການສະເຫຼີມສະຫຼອງບຸນປີໃໝ່ລາວຜ່ານມາດ່ານສາກົນວັງເຕົ່າ ເມືອງໂພນທອງ ແຂວງຈໍາປາສັກ ໄດ້ເຂັ້ມງວດ ແລະເອົາໃຈໃສຢ່າງຈິງຈັງຕໍ່ວຽກງານປ້ອງກັນຊາດປ້ອງກັນຄວາມສະຫງົບພາຍໃນຂົງເຂດຄວາມຮັບຜິດຊອບ ຊຶ່ງສາມາດຮັກສາໄດ້ຄວາມເປັນລະບຽບຮຽບຮ້ອຍ ແລະມີຄວາມສະຫງົບປອດໄພຮອບດ້ານ.

   ທ່ານ ສຸດໃຈ ຊາຕາກຸນ ຮັກສາການຫົວໜ້າດ່ານສາກົນ ເມືອງໂພນທອງ ແຂວງຈໍາປາສັກ ໄດ້ໃຫ້ສໍາພາດຕໍ່ນັກຂ່າວໜັງສືພິມເສດຖະກິດ-ສັງຄົມ ເມື່ອບໍ່ດົນ ມານີ້ກ່ຽວກັບວຽກງານປ້ອງກັນຊາດປ້ອງກັນຄວາມສະຫງົບ, ໃນໄລຍະການສະເຫຼີມສະຫຼອງບຸນປີໃໝ່ລາວຜ່ານມານີ້ໃຫ້ຮູ້ວ່າ: ເພື່ອປະຕິບັດຕາມທິດທາງແຜນການຂອງວຽກງານ ປ້ອງກັນຊາດ-ປ້ອງກັນຄວາມສະຫງົບໃຫ້ມີປິສິດທິພາບສູງສຸດທາງຄະນະພັກພວກເຮົາໄດ້ຈັດຕັ້ງ ແລະແບ່ງຈຸໜ່ວຍ ປ້ອງກັນເວນຍາມຫ້ອງການສໍານັກງານຂອງຕົນເອງ, ໂດຍໄດ້ມີການແຕ່ງຕັ້ງໜ່ວຍເວນຍາມສໍານັກງານທີ່ຕັ້ງຕະຫຼອດ 24 ຊົ່ວໂມງ ຢ່າງເປັນລະບົບຄົບຊຸດຄື: ຈຸດທີໜຶ່ງແມ່ນຮັບຜິດຊອບເວນຍາມຫ້ອງການຈັດສັນ ຊຶ່ງປະກອບມີເຈົ້າໜ້າທີ່ຈະລາຈອນປະຈໍາດ່ານສົມທົບກັບຄະນະກຸ່ມ III ວັງເຕົ່າປ້ອງກັນຢູ່ຄິວລົດ ແລະສະຖານທີ່ຄ່ຽນຖ່າຍສິນຄ້າກະສິກໍາ, ຈຸດທີສອງແມ່ນບໍລິເວນດ່ານສາກົນວັງເຕົ່າ, ຊຶ່ງແມ່ນໜ້າທີ່ ຕມ ຮ່ວມກັບເຈົ້າໜ້າທີ່ຈາກໜ່ວຍງານອ້ອມຂ້າງ      ດ່ານປ້ອງກັນທີ່ຕັ້ງອາຄານດ່ານກວດກາຄົນເຂົ້າ-ອອກເມືອງ ແລະຈຸດທີສາມ ຈຸດຫ້ອງການພາສີປະຈໍາດ່ານສົມທົບກັບອ້າຍນ້ອງໜ່ວຍງານປ້ອງກັນຊາດ ປ້ອງກັນຄວາມສະຫງົບ (ກອງຕີພິເສດ ຈໍານວນ 1 ໝູ່) ຮັກສາຄວາມສະຫງົບ ຕາມຊາຍແດນ ແລະຢູ່ຫຼັງສາງຄ່ຽນຖ່າຍ ສິນຄ້ານໍາເຂົ້າ ແລະສົ່ງອອກ, ທຸກຈຸທຸກ ໜ່ວຍແມ່ນໄດ້ເຄື່ອນໄຫວປ້ອງກັນເວນ ຍາມຕາມຂອບເຂດຄວາມຮັບຜິດຊອບ ເພື່ອບໍ່ໃຫ້ກຸ່ມຄົນທີ່ບໍ່ຫວັງດີມາກໍ່ຄວາມບໍ່ສະຫງົບ ແລະມາທໍາລາຍຄວາມບໍ່ສະຫງົບສຸກຂອງພວກເຮົາ, ຊຶ່ງຕະຫຼອດໄລຍະຜ່ານມາ, ໂດຍສະເພາະແມ່ນໃນໄລຍະການສະເຫຼີມສະຫຼອງບຸນປີໃໝ່ລາວ 2019 ຜ່ານມາ ແມ່ນພວກເຮົາຮັກສາໄດ້ ຄວາມສະຫງົບປອດໄພຮອບດ້ານ.

   ຄຽງຄູ່ກັບວຽກປ້ອງກັນຊາດ-ປ້ອງກັນຄວາມສະຫງົບ ຄະນະພັກພວກເຮົາໄດ້ສຶກສາອົບຮົມໃຫ້ແກ່ສະມາຊິກພັກ-ພະນັກງານລັດຖະກອນ ເຊື່ອມຊຶມຢ່າງ ເລິກເຊິ່ງຕໍ່ແນວທາງປ້ອງກັນຊາດ-ປ້ອງກັນຄວາມສະຫງົບສຸກໃນທົ່ວປວງຊົນ, ໂດຍສະເພາະຢູ່ໃນຂົງເຂດຄະນະພັກຮາກຖານຮັບຜິດຊອບໃຫ້ຮັບປະກັນ ໄດ້ຄວາມເປັນລະບຽບຮຽບຮ້ອຍ, ຍົກ ສູງສະຕິລະວັງຕົວຕ້ານກັບກົນອຸບາຍຂອງກຸ່ມຄົນບໍ່ດີຢ່າງທັນການ, ໄດ້ເອົາ ໃຈໃສ່ປົກປັກຮັກສາສິ່ງຂອງສ່ວນລວມ ບໍ່ໃຫ້ຕົກເຮ່ຍເສຍຫາຍພ້ອມນັ້ນກໍ່ໄດ້ເອົາໃຈໃສແກ້ໄຂປາກົດການຫຍໍ້ທໍ້ຕ່າງໆ ໃນກົງຈັກການຈັດຕັ້ງ ແລະຖັນແຖວພະນັກງານສະມາຊິກພັກໃນແຕ່ລະໄລຍະຢ່າງເຂັ້ມງວດ ແລະທັນເວລາ.

ນສພ ເສດຖະກິດ-ສັງຄົມ

แชร์