ລາວ ຮັບກຽດເປັນເຈົ້າພາບຈັດກອງປະຊຸມຝຶກອົບຮົມ ຄູຝຶກ ແລະຜູ້ຕັດສິນ ກິລາບານເຕະຄົນພິການຕາ ລະດັບອາຊຽນ

ກົມກິລາມວນຊົນ, ພະລະ ແລະ ສິລະປະສຶກສາ ກະຊວງສຶກສາທິການ ແລະກິລາ ຮ່ວມກັບ ສະຫະພັນບານເຕະຄົນພິການຕາແຫ່ງຊາດລາວ ຈັດກອງປະຊຸມເພື່ອປືກສາຫາລື ກຽມຄວາມພ້ອມຈັດກອງປະຊຸມຝຶກອົບຮົມ ຄູຝຶກ ແລະ ຜູ້ຕັດສິນ ກິລາບານເຕະຄົນພິການຕາ ລະດັບອາຊີຕາເວັນອອກສຽງໃຕ້ (ອາຊຽນ) ຫຼື IBSA Blind Football - Southeast Asia 2024 ໃນລະຫວ່າງວັນທີ 04 -08 ຕຸລາ 2024 ທີ່ນະຄອນຫຼວງວຽງຈັນ ເມື່ອບໍ່ດົນມານີ້ ພາຍໃຕ້ການເປັນປະທານໂດຍທ່ານ ວິລະວັນ ບຸນສຸກໄທ ຫົວໜ້າກົມກິລາມວນຊົນ, ພະລະ ແລະ ສິລະປະສຶກສາ ທັງເປັນຮອງປະທານ-ເລຂາທິການຄະນະກຳມະການພາຣາແລມປິກແຫ່ງຊາດລາວ ແລະ ທ່ານ ບຸນມີ ຫຼ່ຽມໄຊຍະຈັກ ປະທານສະຫະພັນບານເຕະຄົນພິການຕາແຫ່ງຊາດລາວ ພ້ອມດ້ວຍພະນັກງານທັງສອງຝ່າຍເຂົ້າຮ່ວມ.

ທ່ານ ບຸນມີ ຫຼ່ຽມໄຊຍະຈັກ ກ່າວໃຫ້ຮູ້ວ່າ: ໃນການປືກສາຫາລືຮ່ວມກັນໃນຄັ້ງນີ້ແມ່ນໄດ້ຕົກລົງເປັນເອກະພາບກັນໃນວຽກງານຫຼາຍດ້ານໂດຍສະເພາະສະຖານທີ່ຈັດຝຶກອົບຮົມ ພວກເຮົາຈະນຳໃຊ້ຫ້ອງປະຊຸມ ແລະ ເດີ່ນກິລາ ບານເຕະ ເບ ສະຫວັນ ເອັບຊີ ຢູ່ທີ່ ບ້ານ ຄຳສະຫວາດ ເມືອງໄຊເຊດຖາ ນະຄອນຫຼວງວຽງຈັນ ສ່ວນທີ່ພັກຂອງຜູ້ເຂົ້າຮ່ວມຝຶກອົບຮົມ ແລະຊ່ຽວຊານ ແມ່ນໂຮງແຮມ ເດິຄິວ ລີຊາຍເດັ້ນ ຕັ້ງຢູ່ເຂດ ເສດຖະກິດພິເສດບຶງທາດຫຼວງ ບ້ານ ໂພນທັນ ເມືອງໄຊເຊດຖາ ໂດຍຈະມີລົດຮັບສົ່ງໃນຊ່ວງໄລຍະຝຶກອົບຮົມ ແລະການເດີ່ນທາງໄປກັບຈາກສະໜາມບິນທາງສະຫະພັນໄດ້ກະກຽມລົດຕູ້ 12 ບ່ອນນັ່ງ ຈຳນວນ 2 ຄັນ ເພື້ອຮັບໃຊ້ໃນໄລຍະດຳເນີນການຝຶກອົບຮົມອີກດ້ວຍ.

ການຝຶກອົບຮົມຄາດວ່າຈະມີສຳມະນາກອນທັງໝົດ 22 ທ່ານ ມາຈາກ 6 ປະເທດ ຄື: ລາວ ມີ 10 ທ່ານ, ມຽນມາ 2 ທ່ານ, ກຳປູເຈຍ 2 ທ່ານ, ຫວຽດນາມ 2 ທ່ານ, ຟິລິປິນ 2 ທ່ານ, ຕີມໍເລດເຕ 2 ທ່ານ ແລະ ໄທ 2 ທ່ານ. ນອກຈາກນີ້, ກໍຍັງມີ ວິທະຍາກອນ ທີ່ຊ່ຽວຊານຈາກສາກົນ ຈຳນວນ 3 ທ່ານ ຊຶ່ງມາຈາກອາກຊັງຕິນ 1 ທ່ານ, ມາເລເຊຍ 1 ທ່ານ ແລະ ເກຣັກ 1 ທ່ານ ການດຳເນີນການຝຶກອົບຮົມຕົວຈິງ ແມ່ນຈະດຳເນີນພາຍໃນ 3 ມື້ ຄື: ວັນທີ 5-7/10/2024, ໃນນັ້ນຈະມີເນື້ອໃນທັງພາກທິດສະດີ ແລະ ພາກປະຕິບັດຕົວຈິງ.

ຂ່າວໂດຍ ສົງການ ພັນແພງດີ

แชร์