ລັດຖະມົນຕີເສດຖະກິດອາຊຽນ-ຮົງກົງ ຫາລືຫລາຍບັນຫາ

ກອງປະຊຸມປຶກສາຫາລື ລະຫວ່າງ ລັດຖະມົນຕີເສດຖະກິດອາຊຽນ ແລະຮົງກົງ ຄັ້ງທີ 8 ຈັດຂຶ້ນທີ່ນະຄອນຫລວງວຽງຈັນ ສປປ ລາວ ໃນວັນທີ 20 ກັນຍາ 2024 ນີ້, ໂດຍການເປັນປະທານຮ່ວມມີ ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກຳ ແລະການຄ້າ ແຫ່ງ ສປປ ລາວ ແລະ ທ່ານ ອໍເຈີນອນ ເຢົາ (Algernon Yau) ລັດຖະມົນຕີ ກະຊວງພັດທະນາເສດຖະກິດ ແລະການຄ້າ ຮົງກົງ, ມີບັນດາທ່ານລັດຖະມົນຕີເສດຖະກິດອາຊຽນ, ເລຂາທິການໃຫຍ່ອາຊຽນ, ລັດຖະມົນຕີ ກະຊວງການຄ້າ ແລະ ອຸດສາຫະກໍາ ຈາກປະເທດຕີມໍເລດສເຕ ແລະບັນດາຜູ້ແທນເຂົ້າຮ່ວມ.

ທ່ານ ມະໄລທອງ ກົມມະສິດ ກ່າວວ່າ: ອາຊຽນ ແລະຮົງກົງ ເປັນຄູ່ຮ່ວມມືທາງດ້ານເສດຖະກິດທີ່ຍາວນານ ແລະ ມີການເຊື່ອມໂຍງທາງການຄ້າ ແລະ ການລົງທຶນທີ່ເຂັ້ມແຂງ. ໃນປີ 2023, ການຄ້າດ້ານສິນຄ້າ ລະຫວ່າງ ອາຊຽນ ແລະ ຮົງກົງ ມີມູນຄ່າ 117.4 ຕື້ໂດລາສະຫະລັດ, ກວມເອົາ 3.3% ຂອງມູນຄ່າການຄ້າທັງໝົດຂອງອາຊຽນ, ເຮັດໃຫ້ ຮົງກົງ ເປັນຄູ່ຄ້າອັນດັບທີ 11 ຂອງອາຊຽນ. ພ້ອມກັນນັ້ນ, ມູນຄ່າການລົງທຶນໂດຍກົງ (FDI) ຂອງນັກລົງທຶນ ຈາກຮົງກົງ ຢູ່ບັນດາປະເທດສະມາຊິກອາຊຽນ ມີປະມານ 15.0 ຕື້ໂດລາສະຫະລັດ ກວມເອົາ 6.5% ຂອງມູນຄ່າການລົງທຶນໂດຍກົງຈາກຕ່າງປະເທດຢູ່ໃນອາຊຽນ ໃນປີ 2023, ເຮັດໃຫ້ຮົງກົງ ເປັນອັນດັບທີ 4 ຂອງບັນດາປະເທດທີ່ມີມູນຄ່າການລົງທຶນຫຼາຍຢູ່ໃນອາຊຽນ ແລະ ຫວັງຢ່າງຍິ່ງວ່າ ການເຊື່ອມໂຍງດ້ານການຄ້າ ແລະ ການລົງທຶນຂອງພວກເຮົາຈະຍິ່ງແໜ້ນແຟ້ນຂຶ້ນຕື່ມ ພາຍຫຼັງທີ່ພວກເຮົາ ໄດ້ຈັດຕັ້ງປະຕິບັດສັນຍາການຄ້າ ແລະ ການລົງທຶນສະບັບປັບປຸງ ແລະບັນດາແຜນການຮ່ວມມືທາງດ້ານເສດຖະກິດລະຫວ່າງສອງພາກພື້ນ.

ປີຜ່ານມາອາຊຽນ ແລະຮົງກົງ ໄດ້ປຶກສາຫາລືກ່ຽວກັບການຫຼຸດຜ່ອນຜົນກະທົບຂອງບັນດາສິ່ງທ້າທາຍຈາກສາກົນ, ການພັດທະນາເສດຖະກິດແບບຍືນຍົງ, ການນໍາໃຊ້ເຕັກໂນໂລຊີເຂົ້າໃນວຽກງານການຄ້າ ແລະ ການລົງທຶນ ແລະ ການສ້າງຄວາມເຂັ້ມແຂງແກ່ຕ່ອງໂສ້ການສະໜອງ ແລະ ໄດ້ຊົມເຊີຍຜົນສໍາເລັດຂອງການຮ່າງອະນຸສັນຍາ ເພື່ອປັບປຸງສັນຍາການຄ້າເສລີ ອາຊຽນ-ຮົງກົງ. ນອກນັ້ນຍັງໄດ້ຕົກລົງຈະເພີ່ມທະວີການຮ່ວມມືທາງເສດຖະກິດ ລະຫວ່າງສອງພາກພື້ນ ໃນຫຼາຍດ້ານ ເຊັ່ນ: ການທ່ອງທ່ຽວ, ເຕັກໂນໂລຊີດີຈີຕອນ, ການສົ່ງເສີມການລົງທຶນ ແລະການພັດທະນາຈຸລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ.

ສະນັ້ນ, ເພື່ອສືບຕໍ່ການຮ່ວມມືດັ່ງກ່າວ, ກອງປະຊຸມໃນຄັ້ງນີ້ຈະໄດ້ເນັ້ນໃສ່ແລກປ່ຽນທັດສະນະກ່ຽວກັບການພັດທະນາເສດຖະກິດໃນພາກພື້ນ ແລະ ສາກົນ, ທົບທວນຄືນຄວາມຄືບໜ້າຂອງການຈັດຕັ້ງປະຕິບັດສັນຍາການຄ້າ ແລະການລົງທຶນ ແລະແຜນການຮ່ວມມືທາງເສດຖະກິດລະຫວ່າງສອງພາກພື້ນພ້ອມທັງພິຈາລະນາຮັບຮອງເອົາຖະແຫຼງການຮ່ວມຂອງກອງປະຊຸມປຶກສາຫາລືລະຫວ່າງ ລັດຖະມົນຕີເສດຖະກິດອາຊຽນ ແລະຮົງກົງ ຄັ້ງທີ 8.


ຂ່າວ: ສາວລາວໃຕ້

แชร์