ກອງປະຊຸມສຸດຍອດທຸລະກິດ ແລະການລົງທຶນອາຊຽນ ຈະສຸມໃສ່ 6 ຂະແໜງບູລິມະສິດ

ກອງປະຊຸມສຸດຍອດທຸລະກິດ ແລະການລົງທຶນອາຊຽນ 2024 (ASEAN Business and Investment Summit 2024) ທີ່ ສປປ ລາວ ເປັນເຈົ້າພາບ ຈະຈັດຂຶ້ນໃນລະຫວ່າງວັນທີ 8-11 ຕຸລາ 2024 ຢູ່ໂຮງແຮມແລນມາກ, ນະຄອນຫລວງວຽງຈັນ ໂດຍຈະສຸມໃສ່ປຶກສາຫາລື 6 ຂະແໜງບູລິມະສິດ.

ທ່ານ ອຸເດດ ສຸວັນນະວົງ ປະທານສະພາການຄ້າ ແລະອຸດສາຫະກໍາແຫ່ງຊາດ, ປະທານສະພາທີ່ປຶກສາທຸລະກິດອາຊຽນ 2024 ໄດ້ຖະແຫລງຂ່າວຕໍ່ສື່ມວນຊົນກ່ຽວກັບງານດັ່ງກ່າວ ໃນວັນທີ 20 ກັນຍາ 2024 ນີ້ ວ່າ: ກອງປະຊຸມສຸດຍອດທຸລະກິດ ແລະ ການລົງທຶນອາຊຽນ 2024 ນີ້ ແມ່ນຈະໄດ້ສຸມໃສ່ ປຶກສາຫາລື ໃນ 6 ຂະແໜງບູລິມະສິດ ຄື: ການຫັນເປັນດິຈິຕອລ, ການພັດທະນາແບບຍືນຍົງ, ການຟື້ນຟູດ້ານຂະແໜງການສາທາລະນະສຸກ, ການຄໍ້າປະກັນສະບຽງອາຫານ, ການເອື້ອອຳນວຍຄວາມສະດວກດ້ານການຄ້າ-ການລົງທຶນ, ການເຊື່ອມໂຍງເຊື່ອຈອດ ແລະ ຕ່ອງໂສ້ການສະໜອງຕ່າງໆ.

ນອກນີ້, ຍັງຈະມີ 4 ກອງປະຊຸມປິ່ນອ້ອມຂອງພາກທຸລະກິດ ແລະ ງານມອບລາງວັນທຸລະກິດອາຊຽນດີເດັ່ນ 2024 ເຊັ່ນ: 1. ກອງປະຊຸມນັກທຸລະກິດໜຸ່ມອາຊຽນ ຄັ້ງ 9 ASEAN Young Entrepreneur Council (AYEC) Carnival and AGM (Side event); 2. ASEAN Women Entrepreneurs Conference 2024 and AWEN Special Awards Ceremony. ໃນຫົວຂໍ້ “ສ້າງອານາຄົດແບບຍືນຍົງ, ທົ່ວເຖິງ ແລະ ຢືດຢຸ່ນກວ່າ: ປົດລັອກທ່າແຮງວິສາຫະກິດແມ່ຍິງໃນອາຊຽນ”; 3. ASEAN Investment Forum (AIF) ກອງປະຊຸມການລົງທຶນອາຊຽນ:ໃນຫົວຂໍ້: “ການລົງທືນສໍາລັບການປັບປຸງການເຊື່ອມຕໍ່ ແລະ ສ້າງຄວາມເຂັ້ມເເຂງ”; 4. International Logistics Symposium ຈະປຶກສາຫາລື ແລະ ສົ່ງເສີມທຸລະກິດຂະແໜງການຂົນສົ່ງທັງພາຍໃນ, ພາກພື້ນອາຊຽນ, ສາກົນ; 5. ງານມອບລາງວັນທຸລະກິດອາຊຽນ 2024 ASEAN Business Award-ABA 2024).

ຕອນທ້າຍພິທີ ທ່ານ ອຸເດດ ສຸວັນນະວົງ ໄດ້ເຊີນໃຫ້ພາກທຸລະກິດລາວ ເຂົ້າຮ່ວມໃນກອງປະຊຸມທີ່ສຳຄັນໃນຄັ້ງນີ້, ຊຶ່ງທຸລຸກິດທີ່ມີຄວາມສົນໃຈທີ່ຈະເຂົ້າຮ່ວມແມ່ນສາມາດ ລົງທະບຽນເພື່ອເຂົ້າຮ່ວມງານໄດ້ທີ່ລິງ https://aseanbaclaos.la/ຫລື ຕິດຕໍ່ກັບກອງເລຂາຂອງ ສະພາການຄ້າ ແລະ ອຸດສາຫະກຳແຫ່ງຊາດລາວ ເພື່ອສອບຖານຂໍ້ມູນເພິ່ມຕື່ມ.

แชร์