ທຸກພາກສ່ວນເອົາໃຈໃສ່ຊ່ວຍເຫຼືອຜູ້ປະສົບໄພນໍ້າຖ້ວມ

ໃນອາທິດຜ່ານມາ ສ​ປ​ປ ລາວ ໄດ້​ຮັບ​ຜົນ​ກະ​ທົບຢ່າງໜັກໜ່ວງຈາກ​ອິດ​ທິ​ພົນ​ຂອງ​ພາ​ຍຸຢາ​ກິ ໂດຍສະເພາະທາງພາກເໜືອ, ເພື່ອແກ້ໄຂບັນຫາດັ່ງກ່າວ ທ່ານນາຍົກລັດຖະມົນຕີ ໄດ້ຊີ້ນຳໃຫ້ພາກສ່ວນກ່ຽວຂ້ອງລົງໄປແກ້ໄຂ ແລະ ຊ່ວຍເຫຼືອຢູ່ບັນດາແຂວງທີ່ໄດ້ຮັບຜົນກະທົບ ຢ່າງຮີບດ່ວນ ແລະ ທັນການ, ພ້ອມທັງໄດ້ຊີ້ນຳໃຫ້ຫ້ອງວ່າການສຳນັກງານນາຍົກລັດຖະມົນຕີ ອອກແຈ້ງການກ່ຽວກັບການກະກຽມຮັບມືກັບພາຍຸໃຕ້ຝຸ່ນຢາກິ ແລະ ການລະດົມກໍາລັງ​ທຸກ​ພາກ​ສ່ວນລົງຊ່ວຍຕ້ານໄພນ້າຖ້ວມ. ​ໂດຍອີງຕາມກົນໄກການແບ່ງຄວາມຮັບຜິດຊອບ ແລະ ແຜນການເຄື່ອນໄຫວວຽກງານຂອງລັດຖະບານ ໂດຍມີແຜນການເຄື່ອນໄຫວປົກກະຕິປະຈຳເດືອນ ແລະວຽກສະເພາະກິດເລັ່ງດ່ວນເຊິ່ງທັງສອງວຽກດັ່ງກ່າວ ກໍຕ້ອງໄດ້ດຳເນີນໄປພ້ອມກັນ. ໃນການແກ້ໄຂໄພພິບັດທຳມະຊາດ ມີຄະນະກຳມະການຄຸ້ມຄອງໄພພິບັດຂັ້ນສູນກາງ ທີ່ມີທ່ານ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ເປັນປະທານ, ມີລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ເປັນຮອງປະທານ, ຜູ້ປະຈຳການ ແລະ ມີບັນດາຮອງລັດຖະມົນຕີຈາກບັນດາກະຊວງ ເປັນຄະນະ ເມື່ອເກີດມີໄພນ້ຳຖ້ວມ, ຄະນະດັ່ງກ່າວ ກໍໄດ້ເປັນເຈົ້າການຈັດຕັ້ງປະຕິບັດຕາມຄວາມຮັບຜິດຊອບຂອງຕົນ ແລະ ປະສານສົມທົບກັບແຂວງທີ່ໄດ້ຮັບຜົນກະທົບ ເພື່ອແກ້ໄຂຢູ່ພື້ນທີ່ຕົວຈິງ. ສ່ວນການລະດົມ ແລະ ຮັບການຊ່ວຍເຫຼືອຈາກພາກສ່ວນຕ່າງໆ ທັງພາຍໃນ ແລະ ຕ່າງປະເທດ ແມ່ນ ທ່ານຮອງນາຍົກລັດຖະມົນຕີ, ຜູ້ຊີ້ນຳວຽກງານຂົງເຂດການປົກຄອງ ແລະ ວັດທະນະທຳ-ສັງຄົມ ເປັນຜູ້ຮັບຜິດຊອບຊີ້ນຳ.

ສຳລັບທ່ານ ນາຍົກລັດຖະມົນຕີ ພາຍຫຼັງສໍາເລັດການຊີ້ນຳວຽກງານພັດທະນາເສດຖະກິດ-ສັງຄົມ ແລະ ຊຸກຍູ້ການຜະລິດ ລວມທັງ ການກຽມຮັບມືກັບໄພນ້ຳຖ້ວມທີ່ອາດຈະເກີດຂຶ້ນຢູ່ແຂວງສະຫວັນນະເຂດ ແລະ ຈໍາປາສັກ ແລ້ວ, ໃນວັນທີ 15 ກັນຍາ 2024 ກໍໄດ້ຮີບຮ້ອນລົງຕິດຕາມສະພາບນ້ໍາຖ້ວມ, ມອບເຄື່ອງຊ່ວຍເຫຼືອ ແລະ ຊີ້ນຳການແກ້ໄຂ ຢູ່ພື້ນທີ່ຕົວຈິງ ໂດຍສະເພາະລຽບຕາມແຄມແມ່ນໍ້າຂອງ ຢູ່ເຂດເມືອງປາກງື່ມ, ເມືອງຫາດຊາຍຟອງ ແລະເມືອງສີສັດຕະນາກ, ນະຄອນຫຼວງວຽງຈັນ. ພ້ອມທັງຊີ້ນໍາໃຫ້ອົງການປົກຄອງທ້ອງຖິ່ນ ແລະ ປະຊາຊົນ ຈົ່ງມີສະຕິ, ລະມັດລະວັງ, ຕິດຕາມຂ່າວສານກ່ຽວກັບສະພາບອາກາດ ຜ່ານທາງສື່ອອນລາຍ ແລະ ເຝົ້າລະວັງລະດັບນ້ຳຢ່າງໃກ້ຊິດ ເປັນແຕ່ລະໄລຍະ ເພື່ອກຽມຮັບມືໃຫ້ທັນເວລາ.

ໃນການແກ້ໄຂໄພພິບັດນໍ້າຖ້ວມ ຢູ່ແຂວງຫຼວງນໍ້າທາ ຂັ້ນເທິງ ໄດ້ມອບໃຫ້ທ່ານ ນາງ ປານີ ຢາທໍ່ຕູ້, ຮອງປະທານປະເທດ ລົງໄປຊີ້ນຳການແກ້ໄຂ ແລະຊ່ວຍເຫຼືອຜູ້ປະສົບໄພ ເຊິ່ງມີຄະນະຄຸ້ມຄອງໄພພິບັດຂັ້ນສູນກາງນຳໂດຍທ່ານ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ປະຈຳການຢູ່ພື້ນທີ່ຕົວຈິງ.​ ພ້ອມກັນນີ້ ທ່ານ ນາຍົກລັດຖະມົນຕີ ຍັງໄດ້ຊີ້ນຳໃຫ້ທ່ານ ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ ລົງສົມທົບກັບແຂວງ ແລະ ພາກສ່ວນກ່ຽວຂ້ອງ ແກ້ໄຂ ແລະ ມອບທຶນຊ່ວຍເຫຼືອຜູ້ປະສົບໄພ. ຄຽງຄູ່ກັນນີ້ກໍໄດ້ຕິດຕາມຊີ້ນຳການປ້ອງກັນ ແລະແກ້ໄຂໄພພິບັດນໍ້າຖ້ວມ ຢູ່ທ້ອງຖິ່ນຕ່າງໆ ຢ່າງໃກ້ຊິດ.

ສຳລັບການແກ້ໄຂໄພນໍ້າຖວ້ມຢູ່ນະຄອນຫຼວງວຽງຈັນໃນລະຫວ່າງວັນທີ 13-15 ກັນຍາ 2024 ໄດ້ມີການນໍາຂັ້ນສູງຂອງພັກ-ລັດ ຫຼາຍທ່ານລົງຊີ້ນໍາຢູ່ພື້ນທີ່ຕ່າງໆ ທີ່ໄດ້ຮັບຜົນກະທົບເປັນຕົ້ນທ່ານ ປະທານປະເທດ, ທ່ານ ຮອງປະທານປະເທດ, ບັນດາທ່ານຮອງນາຍົກລັດຖະມົນຕີ ແລະ ລັດຖະມົນຕີກະຊວງກ່ຽວຂ້ອງ.

ໃນການຊ່ວຍເຫຼືອແກ້ໄຂຜົນກະທົບຈາກໄພນ້ຳຖ້ວມ ແລະ ຜູ້ປະສົບໄພໃນຄັ້ງນີ້, ນອກຈາກພາກສ່ວນທຸລະກິດພາຍໃນ ໄດ້ມອບເງິນຊ່ວຍເຫຼືອຜູ້ປະສົບໄພ, ບໍລິສັດທາງລົດໄຟລາວ-ຈີນ ໄດ້ໃຫ້ບໍລິການຂົນສົ່ງເຄື່ອງຊ່ວຍເຫຼືອໂດຍບໍ່ເສຍຄ່າ ແລ້ວ, ບັນດາປະເທດເພື່ອນມິດ ກໍໄດ້ໃຫ້ການຊ່ວຍເຫຼືອດ້ານຕ່າງໆ ທັງເປັນວັດຖຸສິ່ງຂອງທີ່ຈຳເປັນ ແລະ ທຶນຮອນ ເປັນຕົ້ນ ສສ ຫວຽດນາມ, ສປ ຈີນ, ອົດສະຕຣາລີ, ອິນເດຍ ແລະ ອື່ນໆ. ເຖິງແມ່ນວ່າ ຜົນກະທົບຈາກພາຍຸຢາກິໃນຄັ້ງນີ້ ປະເທດເຮົາ ແລະ ປະເທດໃກ້ຄຽງ ໄດ້ຮັບຄວາມເສຍຫາຍຢ່າງໜັກໜ່ວງ ແລະ ຫຼີກລຽງບໍ່ໄດ້ ແຕ່ພວກເຮົາກໍຍັງໃຫ້ການສະໜັບສະໜູນຊ່ວຍເຫຼືອເຊິ່ງກັນ ແລະ ກັນ, ໃຫ້ກຳລັງໃຈກັນ ເພື່ອຜ່ານຜ່າວິກິດຄັ້ງນີ້.

ສະນັ້ນ ເພື່ອສືບຕໍ່ຮ່ວມແຮງຮ່ວມໃຈກັນ ປ້ອງກັນ ແລະ ແກ້ໄຂຜົນກະທົບຈາກໄພພິບັດນ້ຳຖ້ວມ ຈຶ່ງຮຽກຮ້ອງມາຍັງທຸກພາກສ່ວນໃນສັງຄົມ ສາມັກຄີຊ່ວຍເຫຼືອເຊິ່ງກັນ ແລະ ກັນ ທາງດ້ານກຳລັງແຮງ, ທຶນຮອນ ແລະ ວັດຖຸສິ່ງຂອງຕາມຄວາມສາມາດຂອງຕົນ ເພື່ອຊ່ວຍເຫຼືອ ບັນເທົາທຸກແກ່ຜູ້ປະສົບໄພພິບັດ ທັງເປັນການໃຫ້ກຳລັງໃຈເຊິ່ງກັນ ແລະ ກັນ ໃນເວລາທີ່ພົບກັບຄວາມຫຍຸ້ງຍາກ ເພື່ອໃຫ້ເຂົາເຈົ້າກັບຄືນມາດໍາລົງຊີວິດປົກກະຕິໂດຍໄວ, ໃຫ້ທຸກຄົນເອົາໃຈໃສ່ຕິດຕາມຂ່າວສະພາບດິນຟ້າອາກາດ, ການແຈ້ງເຕືອນຈາກພາກສ່ວນກ່ຽວຂ້ອງ ແລະ ອົງການປົກຄອງທ້ອງຖິ່ນຕົນ, ລວມທັງຈາກແຫຼ່ງຂ່າວທາງການ ເພື່ອຫຼີກລ່ຽງການຮັບຂໍ້ມູນທີ່ບໍ່ຖືກຕ້ອງກັບຄວາມເປັນຈິງກໍຄືຂ່າວທີ່ສ້າງຄວາມປັ່ນປ່ວນໃນສັງຄົມ.

แชร์