ທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ ຕິດຕາມສະພາບນໍ້າຖ້ວມຂັງເທສະບານນະຄອນໄກສອນພົມວິຫານ

ໃນວັນທີ 20 ກັນຍາ 2024 ນີ້, ທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ, ພ້ອມດ້ວຍຫົວໜ້າພະແນກແຜນການ ແລະ ການລົງທຶນ, ພະແນກໂຍທາທິການ ແລະ ຂົນສົ່ງ, ຫ້ອງວ່າການແຂວງ, ຄະນະນໍານະຄອນໄກສອນພົມວິຫານ ແລະພາກສ່ວນຕ່າງໆທີ່ກ່ຽວຂ້ອງ, ໄດ້ລົງຕິດຕາມສະພາບນໍ້າຖ້ວມຂັງພາຍໃນເທສະບານນະຄອນ ໂດຍສະເພາະໃນຈຸດທີ່ມັກເກີດການຖ້ວມຂັງ. ຈາກນີ້, ກໍ່ໄດ້ລົງຕິດຕາມເບິ່ງປະຕູລະບາຍນໍ້າຈຸດຕ່າງໆພາຍໃນນະຄອນ ແລະລຽບຕາມແມ່ນ້ຳຂອງ.

ໂອກາດນີ້, ທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ ໄດ້ຊີ້ນຳພາກສ່ວນກ່ຽວຂ້ອງ ແລະ ການນຳນະຄອນໄກສອນພົມວິຫານໃຫ້ເລັ່ງແກ້ໄຂສະພາບນໍ້າຖ້ວມຂັງຢ່າງທັນການ ໂດຍສະເພາະໃນຈຸດທີ່ແກ້ໄຂໄດ້ກ່ອນ ເພື່ອບໍ່ໃຫ້ສົ່ງຜົນກະທົບຕໍ່ສະພາບການດຳລົງຊີວິດຂອງພໍ່ແມ່ປະຊາຊົນ ໃນນະຄອນໄກສອນພົມວິຫານຂອງພວກເຮົາ,ການລົງຕິດຕາມກວດກາໃນຄັ້ງນີ້, ເຫັນວ່າຫຼາຍຈຸດໃນນະຄອນພົບກັບບັນຫານໍ້າຖ້ວມຂັງເນື່ອງຈາກຝົນຕົກໜັກເຮັດໃຫ້ນໍ້າຍູ້, ໄຫຼບໍ່ທັນ ແລະເຂົ້າຖ້ວມຖະໜົນຫົນທາງ ແລະ ບ້ານເຮືອນຂອງປະຊາຊົນຕໍ່ກັບບັນຫາດັ່ງກ່າວນີ້, ທ່ານ ບຸນໂຈມ ອຸບົນປະເສີດ ກໍ່ໄດ້ມີຄວາມເປັນຫ່ວງເປັນໄຍ ແລະໃຫ້ທິດຊີ້ນຳໃນການແກ້ໄຂບັນຫານີ້.

แชร์