ກອງປະຊຸມເຈົ້າຄອງນະຄອນຫຼວງອາຊຽນ ຮັບຮອງຫລາຍບັນຫາສໍາຄັນ

ກອງປະຊຸມເຈົ້າຄອງນະຄອນຫຼວງອາຊຽນ (MGMAC), ກອງປະຊຸມເວທີເຈົ້ານະຄອນອາຊຽນ (AMF) ແລະ ກອງປະຊຸມເຄືອຂ່າຍບັນດານະຄອນອາຊີຕາເວັນອອກສ່ຽງໃຕ້ທີ່ນໍາໃຊ້ພາສາຝຣັ່ງ (RVASE/AIMF) ໄດ້ຈັດຂຶ້ນແຕ່ວັນທີ 17-19 ກັນຍາ 2024 ທີ່ຫໍປະຊຸມແຫ່ງຊາດ, ນະຄອນຫຼວງວຽງຈັນ, ສປປ ລາວ, ພາຍໃຕ້ຄໍາຂວັນ “ເພີ່ມທະວີການເຊື່ອມຈອດ ແລະຄວາມເຂັ້ມແຂງ ເພື່ອການພັດທະນາແບບຍືນຍົງຂອງບັນດານະຄອນອາຊຽນ”.

ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ໄດ້ຖະແຫລງຕໍ່ສື່ມວນຊົນທັງພາຍໃນ ແລະ ຕ່າງປະເທດ ໃນວັນທີ 19 ກັນຍາວ່າ: ກອງປະຊຸມຄັ້ງນີ້ໄດ້ເຕົ້າໂຮມເອົາບັນດາທ່ານເຈົ້າຄອງ-ຮອງເຈົ້າຄອງນະຄອນຫຼວງອາຊຽນ, ບັນດາທ່ານເຈົ້ານະຄອນ, ການນໍາຂັ້ນທ້ອງຖິ່ນພ້ອມທັງບັນດາຊ່ຽວຊານ, ວິຊາການ, ຜູ້ຕາງໜ້າຈາກຄູ່ຮ່ວມມື ແລະ ພາກສ່ວນຕ່າງໆ ມາຮ່ວມປະຊຸມເພື່ອແລກປ່ຽນບັນຫາຄຳຄິດເຫັນກ່ຽວກັບພາລະບົດບາດໜ້າທີ່ຂອງອົງການປົກຄອງຂັ້ນທ້ອງຖິ່ນໃນການປະກອບສ່ວນເຂົ້າໃນການສ້າງປະຊາຄົມອາຊຽນ ແລະແລກປ່ຽນບົດຮຽນ ແລະປະສົບການໃນການພັດທະນາ ແລະແກ້ໄຂບັນຫາ ແລະສິ່ງທ້າທາຍຕ່າງໆທີ່ບັນດານະຄອນກໍາລັງປະເຊີນຢູ່ໃນປັດຈຸບັນນີ້.

ກອງປະຊຸມໄດ້ຮັບຮອງເອົາຖະແຫຼງການນະຄອນຫຼວງວຽງຈັນ ເຊຶ່ງມີລາຍລະອຽດດັ່ງນີ້:
1. ເພີ່ມທະວີການເຊື່ອມຈອດ: ຮັບຮູ້ເຖິງຄວາມສໍາຄັນຂອງການເຊື່ອມຈອດໃນການອໍານວຍຄວາມສະດວກໃຫ້ແກ່ການຂະຫຍາຍຕົວຂອງເສດຖະກິດ, ຄວາມສາມັກຄີປອງດອງຂອງສັງຄົມ ແລະ ການແລກປ່ຽນວັດທະນະທໍາ ລະຫວ່າງ ບັນ ດານະຄອນຫຼວງອາຊຽນ. ພວກເຮົາໃຫ້ຄໍາໝັ້ນສັນຍາວ່າ ຈະເພີ່ມທະວີຄວາມເຂັ້ມແຂງຂອງເຄືອຂ່າຍການຂົນສົ່ງ, ພື້ນ ຖານໂຄງລ່າງດີຈີຕອນ, ການເຊື່ອມໂຍງທາງດ້ານປະຊາກອນ ເປັນຕົ້ນການສຶກສາ, ວັດທະນະທໍາ ແລະ ການທ່ອງທ່ຽວ ເພື່ອຮັບປະກັນການເຊື່ອມໂຍງ ແລະ ການຮ່ວມມືຢ່າງບໍ່ຢຸດຢັ້ງ.
2. ການສ້າງຄວາມເຂັ້ມແຂງ: ຮັບຮູ້ເຖິງບັນດາສິ່ງທ້າທາຍທີ່ເກີດຂຶ້ນຍ້ອນການປ່ຽນແປງສະພາບດິນຟ້າອາກາດ, ການຫັນເປັນຕົວເມືອງ ແລະ ປັດໄຈສິ່ງແວດລ້ອມອື່ນໆ, ພວກເຮົາ ຍຶດໝັ້ນໃນການເສີມຂະຫຍາຍຄວາມເຂັ້ມແຂງ ຂອງພວກເຮົາ ດ້ວຍການລົງທຶນໃສ່ການວາງຜັງເມືອງແບບຍືນຍົງ, ປັບປຸງມາດຕະການຮັບມືກັບການປ່ຽນແປງດິນຟ້າອາກາດ ແລະ ໄພພິບັດຕ່າງໆ ເພື່ອປົກປ້ອງປະຊາຊົນ, ຊຸມຊົນ ແລະ ລະບົບນິເວດຂອງພວກເຮົາ.
3. ສ້າງຄວາມເຂັ້ມແຂງໃຫ້ແກ່ຊຸມຊົນ: ໂດຍເນັ້ນໃສ່ຄວາມສໍາຄັນຂອງການພັດທະນາແບບກວມລວມ ແລະ ມີສ່ວນຮ່ວມ, ພວກເຮົາພະຍາຍາມສ້າງຄວາມເຂັ້ມແຂງໃຫ້ຊຸມຊົນທ້ອງຖິ່ນ, ໂດຍສະເພາະກຸ່ມຄົນທີ່ມີຄວາມສ່ຽງ ດ້ວຍການເຂົ້າເຖິງການດໍາລົງຊີວິດທີ່ບໍ່ກະທົບຈາກໄພຂົ່ມຂູ່ຈາກທໍາມະຊາດ, ເຂົ້າເຖິງການສຶກສາທີ່ມີຄຸນນະພາບ, ເຂົ້າເຖິງການຮັກສາສຸຂະພາບ ແລະ ການບໍລິການສັງຄົມ. ພວກເຮົາຈະຍຶດຖືເອົາການເສີມຂະຫຍາຍຄວາມເປັນເຈົ້າການ ແລະ ຄວາມຮັບຜິດ ຊອບຂອງພົນລະເມືອງຕໍ່ການພັດທະນາຕົວເມືອງ ແບບຍືນຍົງ.
4. ສົ່ງເສີມນະວັດຕະກໍາ: ຖືເອົານະວັດຕະກໍາ ແລະ ເຕັກໂນໂລຊີ ເປັນຕົວຂັບເຄື່ອນຕົວເມືອງແບບຍືນຍົງ, ພວກເຮົາໝາຍໝັ້ນທີ່ຈະສົ່ງເສີມການລິເລີ່ມຂອງນະຄອນອັດສະລິຍະ, ການຫັນເປັນດິຈີຕອນ ແລະ ເຕັກໂນໂລຊີສີຂຽວ. ພວກເຮົາຈະຊຸກຍູ້ການຮ່ວມມື ລະຫວ່າງ ບັນດານະຄອນຂອງອາຊຽນ, ນັກວິຊາການ ແລະ ພາກເອກະຊົນ ເພື່ອໝູນໃຊ້ນະວັດຕະກໍາເພື່ອການພັດທະນາແບບຍືນຍົງ.
5. ສົ່ງເສີມການແລກປ່ຽນວັດທະນະທໍາ: ຮັບຮູ້ເຖິງຄວາມອຸດົມສົມບູນ ແລະ ຫຼາກຫຼາຍຂອງວັດທະນະທໍາອາຊຽນ, ພວກເຮົາໃຫ້ຄໍາໝັ້ນສັນຍາ ຈະສົ່ງເສີມການແລກປ່ຽນວັດທະນະທໍາ ແລະ ປົກປັກຮັກສາມໍລະດົກຕົກທອດ ຈາກບັນພະບູລຸດ. ພວກເຮົາ ຈະເຄົາລົບເອກະລັກທາງວັດທະນະທໍາຂອງກັນ ແລະ ກັນ ພ້ອມທັງເສີມຂະຫຍາຍຄວາມເຂົ້າໃຈ, ການຮ່ວມມືເຊິ່ງກັນ ແລະ ກັນ.
6. ຄວາມໝາຍໝັ້ນໃນການເປັນຄູ່ຮ່ວມມື: ຮັບຮູ້ເຖິງຄວາມສໍາຄັນຂອງການຮ່ວມມືຫຼາຍຝ່າຍ, ພວກເຮົາຈະຍຶດໝັ້ນການຮ່ວມມືກັບສະຖາບັນອາຊຽນ, ອົງການຈັດຕັ້ງສາກົນ, ພາກເອກະຊົນ ແລະ ພາກສ່ວນທີ່ກ່ຽວຂ້ອງ. ພວກເຮົາ ຈະພ້ອມກັນພະຍາຍາມ ເພື່ອບັນລຸເປົ້າໝາຍການພັດທະນາແບບຍືນຍົງ.

ຂ່າວ: ສາວລາວໃຕ້

แชร์