ລາວ ສໍາເລັດກອງປະຊຸມເຈົ້າຄອງນະຄອນຫຼວງອາຊຽນ ພ້ອມມອບຕໍ່ໃຫ້ນະຄອນຫຼວງກົວລາລໍາເປີ

 

ກອງປະຊຸມເຈົ້າຄອງນະຄອນຫຼວງອາຊຽນ (MGMAC), ກອງປະຊຸມເວທີເຈົ້ານະຄອນອາຊຽນ (AMF) ແລະ ກອງປະຊຸມເຄືອຂ່າຍບັນດານະຄອນອາຊີຕາເວັນອອກສ່ຽງໃຕ້ຂອງສະມາຄົມບັນດາເຈົ້າຄອງນະຄອນທີ່ນໍາໃຊ້ພາສາຝຣັ່ງ ໄດ້ດໍາເນີນມາແຕ່ວັນທີ 17 ກັນຍາ ແລະ ສໍາເລັດລົງຢ່າງເປັນທາງການໃນວັນທີ 19 ກັນຍາ 2024 ນີ້ ທີ່ນະຄອນຫລວງວຽງຈັນ (ນວ) ສປປ ລາວ ໂດຍການເປັນປະທານຂອງທ່ານ ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ, ມີບັນດາຄະນະຜູ້ແທນນະຄອນຫຼວງອາຊຽນ ແລະນະຄອນອາຊຽນ ເຂົ້າຮ່ວມ.

ທ່ານເຈົ້າຄອງ​ນະຄອນຫຼວງວຽງຈັນ ກ່າວວ່າ: ເພື່ອແບ່ງປັນບົດຮຽນການປະຕິບັດຕົວຈິງທີ່ສໍາຄັນ ໃຫ້ກອງປະຊຸມໃນຄັ້ງນີ້, ເບິ່ງລວມແລ້ວການປຶກສາຫາລືການແລກປ່ຽນປະສົບການ ແລະ ການສະໜອງຂໍ້ມູນຕາມຄໍາຂວັນ: ເພີ່ມທະວີການເຊື່ອມຈອດ ແລະຄວາມເຂັ້ມແຂງ ເພື່ອການພັດທະນາແບບຍືນຍົງຂອງບັນດານະຄອນອາຊຽນ ແລະ 5 ຫົວຂໍ້: ຕົວເມືອງທີ່ໜ້າຢູ່ ແລະຍືນຍົງ; ການທ່ອງທ່ຽວສີຂຽວ; ການພັດທະນາເສດຖະກິດແບບຍືນຍົງ; ຕົວເມືອງທີ່ມີຄວາມຍືນຍົງດ້ານສິ່ງແວດລ້ອມ ແລະ ຄວາມເຂັ້ມແຂງທົນທານຕໍ່ການປ່ຽນແປງສະພາບອາກາດ ທີ່ໄດ້ຍົກຂຶ້ນມາແມ່ນດີຫຼາຍ ແລະ ມີຄວາມໝາຍສໍາຄັນຢ່າງຍິ່ງ, ຊຶ່ງສ່ອງແສງເຖິງຄວາມຈໍາເປັນທີ່ຕ້ອງໄດ້ມີການເພີ່ມທະວີການຕໍ່ການເຊື່ອມຈອດຂອງບັນດານະຄອນອາຊຽນ ເພື່ອສ້າງຄວາມເຂັ້ມແຂງຮ່ວມກັນໃນອະນາຄົດ. ພ້ອມນີ້ກໍໄດ້ສະແດງຄວາມຂອບໃຈຕໍ່ການໃຫ້ແນວຄວາມຄິດ, ຂໍ້ສະເໜີແນະຢ່າງຫ້າວຫັນຂອງບັນດາທ່ານ ເປັນຕົ້ນຂອງບັນດານະຄອນພັດທະນາແລ້ວ ທີ່ມີປະສົບການຫຼາຍໃນການພັດທະນາຕົວເມືອງ ແລະ ຊົມເຊີຍທຸກໆນະຄອນທີ່ໄດ້ຮ່ວມກັນ ປະກອບຄໍາເຫັນໃນກອງປະຊຸມຄັ້ງນີ້ ແລະ ຫວັງວ່າບັນດານະຄອນຈະຫາຊ່ອງທາງຊ່ວຍເຫຼືອຊຶ່ງກັນ ແລະກັນ ເຮັດແນວໃດເພື່ອຮັດແຄບຄວາມແຕກໂຕນກັນດ້ານຄຸນນະພາບຊິວິດຂອງຊາວເມືອງ ແລະ ຊາວນະຄອນອາຊຽນໃຫ້ດີຂຶ້ນຢ່າງບໍ່ຢຸດຢັ້ງ.

ການເຊື່ອມຈອດອາຊຽນ ແມ່ນຄວາມຮຽກຮ້ອງຕ້ອງການບໍ່ພຽງແຕ່ແມ່ນພາກລັດຖະບານຂັ້ນສູນກາງ, ຫາກຍັງແມ່ນຂັ້ນທ້ອງຖິ່ນ ແລະ ປະຊາຊົນອາຊຽນ ອີກດ້ວຍ. ສະນັ້ນ, ນວ ຈຶ່ງເຫັນແຈ້ງຄວາມຮັບຜິດຊອບ ແລະ ພັນທະໜ້າທີ່ຂອງຕົນໃນພາລະກິດການເຊື່ອມຈອດອາຊຽນ ຊຶ່ງພັນທະໜ້າທີ່ສຳຄັນກໍແມ່ນບໍ່ພຽງແຕ່ຈະສ້າງນະຄອນໃຫ້ເປັນນະຄອນທີ່ມີຄວາມຍືນຍົງ, ຫາກຍັງຕ້ອງເປັນນະຄອນທີ່ໜ້າຢູ່ທັງຮັບປະກັນຄວາມປອດໄພຈາກການປ່ຽນແປງສະພາບອາກາດ, ສີຂຽວ ແລະ ມີຄວາມສີວິໄລອີກດ້ວຍ.

ໂອກາດດັ່ງກ່າວ ທ່ານ ອາດສະພັງທອງ ສີພັນດອນ ຍັງມີຄວາມປິຕິຍິນດີເປັນຢ່າງຍິ່ງຕໍ່ບັນດາຄະນະຜູ້ແທນຂອງນະຄອນຫຼວງອາຊຽນ, ນະຄອນອາຊຽນ ແລະນັກວິຊາການ, ຜູ້ບັນທະຍາຍຈາກທົ່ວໂລກທັງຫຼາຍ, ໂດຍສະເພາະນະຄອນຫຼວງກົວລາລໍາເປີ ປະເທດມາເລເຊຍ ຈະເປັນເຈົ້າພາບກອງປະຊຸມເຈົ້າຄອງນະຄອນຫຼວງອາຊຽນ ແລະກອງປະຊຸມເວທີເຈົ້ານະຄອນອາຊຽນ ໃນປີ 2025.

ຂ່າວ: ສາວ​ລາວໃຕ້

 

แชร์