ແຂວງຈໍາປາສັກປະກາດແຕ່ງຕັ້ງຫົວໜ້າຫ້ອງວ່າການແຂວງ ແລະຫົວໜ້າພະແນກການເງິນແຂວງ ຜູ້ໃໝ່

ພິທີປະກາດແຕ່ງຕັ້ງຫົວໜ້າຫ້ອງວ່າການແຂວງ ແລະຫົວໜ້າພະແນກການເງິນແຂວງ ຈັດຂຶ້ນໃນວັນທີ 19 ກັນຍາ 2024 ນີ້ທີ່ສະໂມສອນຫຼັກ 4 ຂອງແຂວງໂດຍໃຫ້ກຽດເປັນປະທານຂອງທ່ານ ອາລຸນໄຊ ສູນນະລາດ ກຳມະການສູນກາງພັກ ເຈົ້າແຂວງຈຳປາສັກ, ມີບັນດາທ່ານໃນຄະນະປະຈຳພັກແຂວງ, ກຳມະການພັກແຂວງ, ເຈົ້ານະຄອນ, ເຈົ້າເມືອງ, ພະແນກການອ້ອມຂ້າງແຂວງ, ພະນັກງານຫຼັກແຫຼ່ງພ້ອມດ້ວຍພະນັກງານລັດຖະກອນຂອງພະແນກການເງິນ ແລະຫ້ອງວ່າການແຂວງເຂົ້າຮ່ວມ.

ໃນພິທີ ທ່ານ ສຸກກະເສີມ ສີຫານຸວົງ ກຳມະການພັກແຂວງຫົວໜ້າພະແນກການເງິນແຂວງໄດ້ຜ່ານບົດສະຫຼຸບລາຍງານສະພາບລວມໂດຍຫຍໍ້ກ່ຽວກັບການຈັດຕັ້ງ ວຽກງານຮອບດ້ານຂອງພະແນກການເງິນແຂວງໃນໄລຍະຜ່ານມາ ແລະ ວຽກງານຈຸດສຸມທິດທາງແຜນການ ແຕ່ນີ ຮອດທ້າຍປີ 2024. ທ່ານ ທໍາມະວົງ ສຸລິຍະວົງ ຮັກສາການຫົວໜ້າຫ້ອງວ່າການແຂວງກໍໄດ້ຜ່ານບົດສະຫຼຸບລາຍງານສະພາບລວມໂດຍຫຍໍ້ກ່ຽວກັບການຈັດຕັ້ງວຽກງານຮອບດ້ານຂອງຫ້ອງວ່າການແຂວງໃນໄລຍະຜ່ານມາ ແລະວຽກງານຈຸດສຸມທິດທາງແຜນການ.

ພ້ອມນີ້ທ່ານ ພອນໄຊ ເກດມາລາ ຮອງຫົວໜ້າຄະນະຈັດຕັ້ງແຂວງໄດ້ຜ່ານຂໍ້ຕົກລົງຂອງເຈົ້າແຂວງຈໍາປາສັກ ວ່າດ້ວຍການຍົກຍ້າຍ ແລະແຕ່ງຕັ້ງຫົວໜ້າຫ້ອງວ່າການແຂວງ ຄື:ເຈົ້າແຂວງຈໍາປາສັກຕົກລົງ:

ຍົກຍ້າຍທ່ານ ປອ ສຸກກະເສີມ ສີຫານຸວົງ ກຳມະການພັກແຂວງ ຫົວໜ້າພະແນກການເງິນໄປປະຈຳການຢູ່ຫ້ອງວ່າການແຂວງຈໍາປາສັກ, ພ້ອມທັງແຕ່ງຕັ້ງເປັນ ຫົວໜ້າຫ້ອງວ່າການແຂວງຈໍາປາສັກ, ຜ່ານຂໍ້ຕົກລົງວ່າດ້ວຍການຍົກຍ້າຍ ແລະ ແຕ່ງຕັ້ງຫົວໜ້າພະແນກການເງິນແຂວງ ຄື:ຕົກລົງຍົກຍ້າຍ ທ່ານ ພິມພອນ ພັນດານຸວົງ ກຳມະການພັກແຂວງ ເລຂາພັກເມືອງ, ເຈົ້າເມືອງປາກຊ່ອງ ມາປະຈຳ ການ ຢູ່ພະແນກການເງິນ ແຂວງຈໍາປາສັກ ພ້ອທທັງບົງຕົວແຕ່ງຕັ້ງ ເປັນຫົວໜ້າພະແນກການເງິນ ແຂວງຈໍາປາສັກ.

ຈາກນີ້ກໍ່ໄດ້ຜ່ານມະຕິຕົກລົງວ່າດ້ວຍການບົ່ງຕົວແຕ່ງຕັ້ງຮັກສາການເລຂາຄະນະພັກຮາກຖານຫ້ອງວ່າການແຂວງຈຳປາສັກ ສະໄໝທີ VIIຄືຕົກລົງອະນຸມັດບົ່ງຕົວແຕ່ງຕັ້ງສະຫາຍ ປອ ສຸກກະເສີມ ສີຫານຸວົງ ເປັນຮັກສາການເລຂາຄະນະພັກຮາກຖານຫ້ອງວ່າການແຂວງຈໍາປາສັກ.

ໃນພິທີໄດ້ມີການລົງລາຍເຊັນມອບ-ຮັບໜ້າທີ່ ລະຫວ່າງ ທ່ານ ປອ ສຸກກະເສີມ ສີຫານຸວົງ, ຫົວໜ້າພະແນກການເງິນແຂວງ ຜູ້ເກົ່າ ກັບ ທ່ານ ພິມພອນ ພັນດານຸວົງ, ຫົວໜ້າພະແນກການເງິນແຂວງຜູ້ໃໝ່.

ພິທີລົງລາຍເຊັນມອບ-ຮັບ ໜ້າທີ່ ລະຫວ່າງ ທ່ານ ທຳມະວົງ ສຸລິຍະວົງ, ຮັກສາການຫົວໜ້າຫ້ອງວ່າການແຂວງຜູ້ເກົ່າ ກັບ ທ່ານ ປອ ສຸກກະເສີມ ສີຫານຸວົງ, ຫົວໜ້າຫ້ອງວ່າການແຂວງ ຜູ້ໃໝ່. ໂດຍມີບັນດາການນຳເຂົ້າຮ່ວມເປັນສັກຂີພະຍານ.

ໂອກາດນີ້ ທ່ານ ອາລຸນໄຊ ສູນນະລາດ ກຳມະການສູນກາງພັກ ເລຂາພັກແຂວງ ເຈົ້າແຂວງໆຈຳປາສັກ, ໄດ້ມີຄໍາເຫັນໂອ້ລົມເພື່ອເປັນທິດທາງໃນການນຳພາຊີ້ນຳວຽກງານຂອງທັງສອງວຽກງານໃນຕໍ່ໜ້າໃຫ້ຖືກຕ້ອງສອດຄ່ອງກັບແນວທາງນະໂຍບາຍ, ມະຕິ, ຄໍາສັ່ງຕ່າງໆຂອງຄະນະພັກຂັ້ນເທິງວາງອອກໃຫ້ສຳເລັດ.
ຂຽນ: ຈັນທະວີສັກ

แชร์