JDB ມອບເງິນຈໍານວນ 1,500,000,000 ກີບ ປະກອບສ່ວນຊ່ວຍເຫຼືອ ຜູ້ປະສົບໄພນໍ້າຖ້ວມ

ພາຍຫຼັງ ສປປ ລາວ ໄດ້ຮັບຜົນກະທົບ ແລະ ຜົນເສຍຫາຍຈາກລົມພາຍຸໄຕ້ຝຸ່ນ ຢາກິ (YAKI) ເຊິ່ງໄດ້ສົ່ງຜົນກະທົບຢ່າງໜັກໜ່ວງ ໃຫ້ແກ່ຊີວິດ ແລະຊັບສິນ ຂອງປະຊາຊົນບັນດາເຜົ່າ ໃນຫຼາຍພື້ນທີ່; ດັ່ງນັ້ນ, ໃນຕອນແລງວັນທີ 16 ກັນຍາ 2024 ທີ່ສໍານັກງານນາຍົກລັດຖະມົນຕີ, ທ່ານ ວິໄລ ສີພະພອນ ປະທານສະພາບໍລິຫານ ທະນາຄານຮ່ວມພັດທະນາ ຫຼື JDB ໄດ້ຮ່ວມມອບເງິນຈໍານວນ 1,500,000,000 ກີບ, ເພື່ອປະກອບສ່ວນຊ່ວຍເຫຼືອບັນເທົາທຸກ ໃຫ້ແກ່ຜູ້ປະສົບໄພນໍ້າຖ້ວມ ຕາງໜ້າໃຫ້ລັດຖະບານ ແລະ ຄະນະກຳມະການຄຸ້ມຄອງໄພພິບັດຂັ້ນສູນກາງ ໃຫ້ກຽດຮັບໂດຍ ທ່ານນ. ໃບຄໍາ ຂັດທິຍະ, ລັດຖະມົນຕີກະຊວງແຮງງານ ແລະ ສະຫວັດດີການສັງຄົມເປັນຮອງປະທານຜູ້ປະຈໍາການຄະນະກຳມະການຄູ້ມຄອງໄພພິບັດຂັ້ນສູນກາງ, ໂດຍເຂົ້າຮ່ວມເປັນສັກຂີພິຍານຂອງທ່ານ ສອນໄຊ ສີພັນດອນ ນາຍົກລັດຖະມົນຕີ ເງິນຈໍານວນດັ່ງກ່າວ ຈະໄດ້ມອບໃຫ້ລັດຖະບານ ຈໍານວນ 1,000,000,000 ກີບ ແລະ ມອບໃຫ້ນະຄອນຫຼວງວຽງຈັນ ຈໍານວນ 500,000,000 ກີບ; ເຊິ່ງກ່ອນໜ້ານີ້ທະນາຄານຮ່ວມພັດທະນາ ກໍໄດ້ມອບເຄື່ອງຊ່ວຍເຫຼືອບັນເທົາທຸກເປັນຕົ້ນ: ເຂົ້າສານ, ອາຫານແຫ້ງ, ນໍ້າດື່ມໃຫ້ຜູ້ປະສົບໄພ ທີ່ແຂວງຫຼວງນໍ້າທາ ລວມມູນຄ່າ ຈໍານວນ 550,000,000 ກີບ.


ໃນໂອກາດນີ້, ທ່ານນາຍົກລັດຖະມົນຕີ ໄດ້ກ່າວສະແດງຄວາມຂອບໃຈ, ຮູ້ບຸນຄຸນ ແລະຊົມເຊີຍຕໍ່ທະນາຄານຮ່ວມພັດທະນາທີ່ໄດ້ມີຈິດໃຈມະນຸດສະທໍາ, ເອື້ອເພື້ອເຜື່ອແຜ່ໃຫ້ການຊ່ວຍເຫຼືອຕໍ່ບັນດາຜູ້ປະສົບອຸທົກກະໄພໃນຄັ້ງນີ້, ເຖິງວ່າສະພາບເສດຖະກິດມີຄວາມຫຍຸ້ງຍາກ ຊຶ່ງການຊ່ວຍເຫຼືອດັ່ງກ່າວແມ່ນສອດຄ່ອງກັບຄວາມຮຽກຮ້ອງຕ້ອງການຂອງສະພາບການຕົວຈິງໃນປັດຈຸບັນ, ເປັນການເສຍສະຫຼະ ເພື່ອປະກອບສ່ວນເຂົ້າໃນການແກ້ໄຂຜົນກະທົບ ແລະ ຟື້ນຟູຊີວິດການເປັນຢູ່ຂອງປະຊາຊົນ ຜູ້ທີ່ປະສົບໄພທໍາມະຊາດໃຫ້ກັບຄືນສູ່ສະພາບປົກກະຕິໂດຍໄວ, ທັງສ່ອງແສງໃຫ້ເຫັນເຖິງຄວາມເປັນຫ່ວງເປັນໃຍ, ໃຫ້ກຳລັງໃຈເຊິ່ງກັນ ແລະກັນ ໃນເວລາທີ່ພົບກັບຄວາມຫຍຸ້ງຍາກ. ພ້ອມກັນນັ້ນ, ທ່ານ ນາຍົກລັດຖະມົນຕີ ກໍໄດ້ຢືນຢັນວ່າຈະນຳເອົາການຊ່ວຍເຫຼືອດັ່ງກ່າວ ໄປມອບໃຫ້ພາກສ່ວນກ່ຽວຂ້ອງນຳໃຊ້ເຂົ້າໃນການຊ່ວຍເຫລືອບັນເທົາທຸກໃຫ້ແກ່ຜູ້ປະສົບໄພພິບັດດ້ວຍຄວາມໂປ່ງໃສ, ໃຫ້ເຖິງ ແລະຖືກເປົ້າໝາຍ ຢ່າງແທ້ຈິງ.

ທະນາຄານຮ່ວມພັດທະນາ ຫຼື JDB ເປັນທະນາຄານທີ່ໄດ້ຮັບຄວາມນິຍົມສູງຢູ່ໃນແຖວໜ້າຂອງທະນາຄານທຸລະກິດ ຢູ່ ສປປ ລາວ ຊຶ່ງເວລາໃດ ກໍ່ໃຫ້ຄວາມສໍາຄັນ ໃນການປະກອບສ່ວນຊ່ວຍເຫຼືອສັງຄົມໃນຮູບແບບຕ່າງໆ. ສະເພາະໄພນໍ້າຖ້ວມທີ່ເກີດຂຶ້ນໃນປີນີ້ທະນາຄານຮ່ວມພັດທະນາໄດ້ໃຫ້ການສະໜັບສະໜູນ 2,050,000,000 ກີບ ຕາມກໍາລັງ ເພື່ອຕອບສະໜອງ ຄວາມຕ້ອງການຂັ້ນພື້ນຖານ ທີ່ສໍາຄັນ ແລະຮີບດ່ວນທີ່ສຸດ ຂອງຜູ້ໄດ້ຮັບຜົນກະທົບຈາກໄພນໍ້າຖ້ວມຢູ່ຫຼາຍບ້ານ ແລະເມືອງໃນ ສປປ ລາວ ແລະທະນາຄານຮ່ວມພັດທະນາ ຫວັງວ່າຜູ້ປະສົບໄພນໍ້າຖ້ວມຈະຜ່ານຜ່າພົ້ນໄປດ້ວຍດີ ແລະກັບຄືນມາສູ່ການດໍາລົງຊີວິດ  ແບບປົກກະຕິໄດ້ໂດຍໄວ.

แชร์