ທ່ານນາຍົກ ຕ້ອນຮັບການເຂົ້າຢ້ຽມຂໍ່ານັບຂອງບັນດາເຈົ້າຄອງນະຄອນຫຼວງອາຊຽນ

ໃນວັນທີ 18 ກັນຍາ 2024 ທີ່ຫໍປະຊຸມແຫ່ງຊາດ, ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງບັນດາເຈົ້າຄອງນະຄອນຫຼວງອາຊຽນໃນໂອກາດທີ່ເດີນທາງເຂົ້າຮ່ວມກອງປະຊຸມບັນດານະຄອນຫຼວງອາຊຽນ ແລະ ກອງປະຊຸມເວທີເຈົ້ານະຄອນອາຊຽນທີ່ນະຄອນຫຼວງວຽງຈັນເປັນເຈົ້າພາບ.

ທ່ານ ອາດສະພັງທອງ ສີພັນດອນ ເຈົ້າຄອງ ນະຄອນຫຼວງ ວຽງຈັນໄດ້ຕາງໜ້າໃຫ້ເຈົ້າຄອງນະຄອນຫຼວງອາຊຽນ ນະຄອນດີລີ ຕີມໍແລັດສະເຕ ເລຂາທິການໃຫຍ່ອາຊຽນ ແລະ ເລຂາທິການອົງການຕົວເມືອງ ແລະ ການປົກຄອງທ້ອງ ຖິ່ນໃນພາກພື້ນອາຊີ-ປາຊີຟິກ ຜູ້ແທນຂັ້ນສູງຂອງສະມາ ຄົມບັນດາເຈົ້າຄອງທີ່ນໍາໃຊ້ພາສາຝຣັ່ງ ລາຍງານກ່ຽວກັບການກະກຽມ ແລະ ດຳເນີນກອງປະຊຸມບັນດາເຈົ້າຄອງນະຄອນຫຼວງອາຊຽນ ກອງປະຊຸມເວທີເຈົ້ານະຄອນອາ ຊຽນ ແລະ ຜົນສຳເລັດກອງປະຊຸມເຄືອຂ່າຍບັນດານະ ຄອນອາຊີຕາເວັນອອກສ່ຽງໃຕ້ຂອງສະມາຄົມບັນດາເຈົ້າຄອງນະຄອນທີ່ນໍາໃຊ້ພາສາຝຣັ່ງໃນວັນທີ 17 ຜ່ານມາທີ່ນະຄອນຫຼວງວຽງຈັນເປັນເຈົ້າພາບໃນປີ 2024 ໂດຍໄດ້ ຮັບຜົນສຳເລັດເປັນຢ່າງດີ, ສຳລັບກອງປະຊຸມສາກົນດັ່ງ ກ່າວແມ່ນໄດ້ດໍາເນີນແຕ່ວັນທີ 17-19 ກັນຍາ 2024 ຕາມຮອບວຽນທີ່ ສປປ ລາວ ເປັນເຈົ້າພາບຈັດກອງປະຊຸມອາຊຽນ. ກອງປະຊຸມໄດ້ມີຜູ້ເຂົ້າຮ່ວມຈາກບັນດານະຄອນ ຫຼວງອາຊຽນ ບັນດານະຄອນຂອງອາຊຽນ ແລະ ບັນດາອົງ ການຈັດຕັ້ງສາກົນຫຼາຍກວ່າ 189 ກວ່າພາກສ່ວນ ມີບັນດາເຈົ້າຄອງນະຄອນຫຼວງອາຊຽນ 9 ນະຄອນຫຼວງ ແລະ ນະຄອນຫຼວງເດລີ ປະເທດ ຕີມໍແລັດສະເຕ ແລະບັນດານະຄອນຕ່າງໆຂອງປະເທດອາຊຽນເຂົ້າຮ່ວມ.

ສຳລັບກອງປະຊຸມຄັ້ງນີ້ແມ່ນການຮ່ວມກັນ ລະຫວ່າງນະຄອນຫຼວງ ວຽງຈັນກັບອົງການຕົວເມືອງ ແລະ ການປົກຄອງທ້ອງຖິ່ນໃນພາກພື້ນອາຊີ-ປາຊີຟິກ (UCLG ASPAC) ແລະ ກອງເລຂາສະມາຄົມ AIME ເປັນເຈົ້າພາບຮ່ວມກັນເພື່ອຈະສືບຕໍ່ດຳເນີນຕາມຈຸດປະສົງຫຼັກຂອງການລິເລີ່ມກອງປະຊຸມບັນດາເຈົ້າຄອງນະຄອນຫຼວງອາຊຽນໃນປີ 2013 ທີ່ນະ ຄອນຫຼວງຈາກາຕາ ປະເທດອິນໂດເນເຊຍ ແລະ ຂໍ້ລິເລີ່ມໃນການຈັດກອງປະຊຸມເວທີເຈົ້ານະຄອນອາຊຽນຄູ່ຂະ ໜານຄັ້ງທຳອິດຢູ່ນະຄອນຫຼວງພະນົມເປັນປີ 2022 ໃນການເປັນເວທີເພື່ອການສ້າງການຮ່ວມມື ແລະ ການແບ່ງປັນປະສົບການລະຫວ່າງອົງການປົກຄອງທ້ອງຖິ່ນຂອງບັນດານະຄອນອາຊຽນ ເຊິ່ງກອງປະຊຸມທີ່ນະຄອນຫຼວງ ວຽງຈັນຄັ້ງນີ້ໄດ້ດຳເນີນໄປຕາມຄຳຂວັນ “ເພີ່ມທະວີການ ເຊື່ອມຈອດ ແລະ ຄວາມເຂັ້ມແຂງເພື່ອການພັດທະນາແບບຍືນຍົງຂອງບັນດານະຄອນອາຊຽນ” ໂດຍໄດ້ເນັ້ນໃສ່ບັນດາຫົວຂໍ້ 5 ຫຼັກເຊັ່ນ ຕົວເມືອງທີ່ໜ້າຢູ່ ແລະ ຍືນຍົງ ການທ່ອງທ່ຽວສີຂຽວ ການພັດທະນາເສດຖະກິດແບບຍືນ ຍົງ ຕົວເມືອງທີ່ມີຄວາມຍືນຍົງດ້ານສິ່ງແວດລ້ອມ ຄວາມ ເຂັ້ມແຂງທົນທານຕໍ່ການປ່ຽນແປງຂອງສະພາບອາກາດ.

ໂອກາດດັ່ງກ່າວ, ທ່ານນາຍົກລັດຖະມົນຕີໄດ້ຕີລາຄາສູງໃນການເຂົ້າຮ່ວມຂອງບັນດາທ່ານຕໍ່ກອງປະຊຸມທີ່ໄດ້ຈັດຂຶ້ນຢູ່ນະຄອນຫຼວງວຽງຈັນຄັ້ງນີ້ເຊິ່ງສະແດງໃຫ້ເຫັນເຖິງບົດບາດຂອງບັນດານະຄອນຫຼວງວອາຊຽນ ທີ່ເປັນອັນໜຶ່ງອັນດຽວ ກັນໃນເປົ້າໝາຍການຮ່ວມມື ແລະຍົກລະດັບຄວາມຮ່ວມ ມືໃນລະດັບພາກພື້ນຢ່າງມີໝາກຜົນ, ທ່ານນາຍົກເຊື່ອໝັ້ນວ່າກອງປະຊຸມຈະສາມາດສ້າງການເຊື່ອມຈອດ ແລະຄວາມເຂັ້ມແຂງຂອງການພັດທະນາບັນດານະຄອນອາ ຊຽນທີ່ມີຄວາມຍືນຍົງໃຫ້ສອດຄ່ອງກັບຄໍາຂວັນທີ່ວ່າເພີ່ມທະວີການເຊື່ອມຈອດ ແລະຄວາມເຂັ້ມແຂງເພື່ອການພັດທະນາແບບຍືນຍົງຂອງບັນດານະຄອນອາຊຽນ.

แชร์