ກອງປະຊຸມເຈົ້າຄອງນະຄອນຫຼວງອາຊຽນ (MGMAC) ແລະກອງປະຊຸມເວທີເຈົ້ານະຄອນອາຊຽນ (AMF) ປີ 2024 ຈັດຂຶ້ນທີ່ ນະຄອນຫຼວງວຽງຈັນ

ກອງປະຊຸມເຈົ້າຄອງນະຄອນຫຼວງອາຊຽນ (MGMAC) ແລະ ກອງປະຊຸມເວທີເຈົ້ານະຄອນອາຊຽນ (AMF) ປີ 2024 ໄດ້ໄຂຂຶ້ນຢ່າງເປັນທາງການໃນວັນທີ 18 ກັນຍາ 2024 ນີ້, ທີ່ຫໍປະຊຸມແຫ່ງຊາດ ໂດຍນະຄອນຫຼວງວຽງຈັນ ເປັນເຈົ້າພາບ, ເຊິ່ງໃຫ້ກຽດເຂົ້າຮ່ວມເປັນປະທານກ່າວເປີດກອງປະຊຸມໂດຍ ທ່ານ ສອນໄຊ ສີພັນດອນນາຍົກລັດຖະມົນຕີ ແຫ່ງ ສປປ ລາວ.

ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ກ່າວຕ້ອນຮັບວ່າ: ກອງປະຊຸມເຈົ້າຄອງນະຄອນຫຼວງອາຊຽນ (MGMAC) ແລະ ກອງປະຊຸມເວທີເຈົ້ານະຄອນອາຊຽນ (AMF) ໄດ້ດໍາເນີນເປັນໄລຍະ 12 ປີ ມາແລ້ວ ນັບແຕ່ປີ 2012 ເປັນຕົ້ນມາ, ເຊິ່ງໄດ້ກາຍເປັນເວທີໃຫ້ແກ່ ບັນດາການນໍາຂັ້ນທ້ອງຖິ່ນ ໄດ້ມີການພົບປະແລກປ່ຽນເຊິ່ງກັນ; ເປັນເວທີໃນການເພີ່ມທະວີຮັດແໜ້ນສາຍພົວພັນການຮ່ວມມື ລະຫວ່າງ ນະຄອນຫຼວງ ແລະ ນະຄອນອາຊຽນ; ເປັນເວທີເພື່ອພ້ອມກັນປຶກສາຄົ້ນຄວ້າວິທີການແກ້ໄຂ ແລະ ຈັດການ ກັບບັນຫາສິ່ງທ້າທາຍຮ່ວມກັນ ແລະພ້ອມກັນພັດທະນາຍຸດທະສາດທີ່ສາມາດສ້າງປະໂຫຍດໃຫ້ແກ່ ນະຄອນ ແລະ ໃຫ້ແກ່ພາກພື້ນ. ໃນກອງປະຊຸມຄັ້ງນີ້ ນະຄອນຫຼວງວຽງຈັນ ໄດ້ກຳນົດຄໍາຂວັນ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງ ເພື່ອການພັດທະນາແບບຍືນຍົງຂອງບັນດານະຄອນອາຊຽນ” ເຊິ່ງປະກອບມີ 5 ຂົງເຂດວຽກງານທີ່ສໍາຄັນຄື: (1) ຕົວເມືອງທີ່ໜ້າຢູ່ ແລະ ຢືນຍົງ, (2) ການທ່ອງທ່ຽວສີຂຽວ, (3) ການພັດທະນາເສດຖະກິດແບບຍືນຍົງ, (4) ຕົວເມືອງທີ່ມີຄວາມຍືນຍົງທາງດ້ານສິ່ງແວດລ້ອມ, ແລະ (5) ຄວາມເຂັ້ມແຂງທາງດ້ານການປ່ຽນແປງດິນຟ້າອາກາດ ເພື່ອເຮັດໃຫ້ພວກເຮົາໄດ້ມີການແລກປ່ຽນທັດສະນະ ແລະ ປະກອບຄຳຄິດເຫັນ ສາມາດຮ່ວມກັນກໍານົດນະໂຍບາຍ ແລະ ຈັດຕັ້ງປະຕິບັດຕົວຈິງ. ທັງເຊື່ອໝັ້ນວ່າຜ່ານການປຶກສາຫາລື ແລະ ແລກປ່ຽນບົດຮຽນຮ່ວມກັນໃນກອງປະຊຸມຄັ້ງນີ້, ພວກເຮົາຈະສາມາດກຳນົດບັນດາຂໍ້ລິເລີ່ມການຮ່ວມມືໃຫ້ມີລັກສະນະທີ່ເຂັ້ມແຂງຂຶ້ນກວ່າເກົ່າລະຫວ່າງບັນດາ ນະຄອນກັບບັນດາຄູ່ຮ່ວມມືທາງພາຍໃນ ແລະ ຕ່າງປະເທດ. ໃນຖານະທີ່ເປັນນະຄອນຫຼວງ, ເປັນນະຄອນ, ພວກເຮົາຕ້ອງສືບຕໍ່ຊຸກຍູ້ນະໂຍບາຍ ແລະ ການປະຕິບັດຕົວຈິງທີ່ເພີ່ມທະວີການເຊື່ອມຈອດ ແລະ ຄວາມເຂັ້ມແຂງ ສໍາລັບການພັດທະນາແບບຍືນຍົງ ແລະ ການດໍາລົງຊີວິດຂອງປະຊາຊົນພວກເຮົາ.

ໂອກາດດັ່ງກ່າວ, ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ກໍໄດ້ມີຄໍາເຫັນເປີດກອງປະຊຸມ ໂດຍທ່ານໄດ້ຕີລາຄາສູງຕໍ່ການຈັດກອງປະຊຸມໃນຄັ້ງນີ້ ເຊິ່ງຈະເປັນໂອກາດອັນດີ ສໍາລັບບັນດາເຈົ້າຄອງນະຄອນຫຼວງອາຊຽນ ແລະ ເຈົ້ານະຄອນອາຊຽນ ໃນການຈັດຕັ້ງຜັນຂະຫຍາຍຄໍາໝາຍໝັ້ນຂອງຕົນໃນບັນດາກອງປະຊຸມຜ່ານມາ ເຂົ້າໃນວຽກງານການພັດທະນາຕົວເມືອງໃຫ້ທັນສະໄໝ, ໜ້າຢູ່ ແລະ ຍືນຍົງ. ໂດຍກອງປະຊຸມຄັ້ງນີ້ຈະເປັນການປະກອບສ່ວນອັນສໍາຄັນເຂົ້າໃນ ການ ສົ່ງເສີມການພັດທະນາ, ການແລກປຸ່ຽນບົດຮຽນທີ່ດີຮ່ວມກັນ ໃນການແກ້ໄຂບັນຫາຕ່າງໆຂອງຕົວເມືອງ ໄປພ້ອມກັບການຈັດຕັ້ງປະຕິບັດບັນດາແຜນງານ ແລະ ແຜນດໍາເນີນງານເພື່ອໃຫ້ ບັນດາຄໍາໝາຍໝັ້ນຂອງນະຄອນອາຊຽນ ໃນການສົ່ງເສີມການເຊື່ອມຈອດ ແລະ ຄວາມເຂັ້ມແຂງ ເພື່ອການພັດທະນາແບບຍືນຍົງ ຂອງບັນດານະຄອນຫຼວງອາຊຽນ ແລະ ນະຄອນອາຊຽນ.

ທ່ານ ນາຍົກລັດຖະມົນຕີ ແຫ່ງ ສປປ ລາວ ກ່າວຕື່ມວ່າ: ກອງປະຊຸມຄັ້ງນີ້ ເຊື່ອໝັ້ນວ່າ ບັນດາທ່ານ ຈະເອົາໃຈໃສ່ແລກປ່ຽນຄວາມຮູ້ຄວາມສາມາດ ແລະ ບົດຮຽນທີ່ດີຂອງຕົນ ແລະ ພ້ອມກັນດໍາເນີນກອງປະຊຸມ ດ້ວຍບັນຍາກາດສ້າງສັນຕາມຄໍາຂວັນຂອງກອງປະຊຸມ: “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງ ເພື່ອການພັດທະນາແບບຍືນຍົງຂອງບັນດານະຄອນອາຊຽນ”, ເຊິ່ງຄໍາຂວັນດັ່ງກ່າວ ກໍສອດຄ່ອງກັບຄໍາຂວັນປະທານອາຊຽນ ປີ 2024 ຂອງ ສປປ ລາວ ຄື: “ເພີ່ມທະວີການເຊື່ອມ ຈອດ ແລະ ຄວາມເຂັ້ມແຂງອາຊຽນ”. ຄໍາຂວັນດັ່ງກ່າວ ແມ່ນສອດຄ່ອງກັບນະໂຍບາຍ ແລະ ເປົ້າໝາຍຂອງ ສປປ ລາວ ໃນການຫັນປະເທດຈາກປະເທດທີ່ບໍ່ມີຊາຍແດນຕິດກັບທະເລໃຫ້ເປັນສູນກາງຂອງການເຊື່ອມໂຍງ-ເຊື່ອມຈອດ ຂອງພາກພື້ນ ແລະທັງສອດຄ່ອງກັບເປົ້າໝາຍລວມຂອງອາຊຽນໃນການສ້າງປະຊາຄົມອາຊຽນໃຫ້ເປັນພາກພື້ນທີ່ມີການເຊື່ອມໂຍງ-ເຊື່ອມຈອດ ແລະມີຄວາມເຂັ້ມແຂງ ເພື່ອການພັດທະນາ ແລະສາມາດຮັບມືກັບສິ່ງທ້າທາຍຕ່າງໆ ໄດ້ຢ່າງມີປະສິດທິພາບ ແລະທັນການ.

ຂ່າວ: ສາວລາວໃຕ້

แชร์