ລັດຖະມົນຕີກະຊວງ ກປ ຕ້ອນຮັບການຢ້ຽມຢາມພົບປະຂອງ ທູດຍີ່ປຸ່ນ

ໃນວັນທີ 12 ກັນຍາ 2024 ນີ້ ທີ່ຫ້ອງຮັບແຂກ ຫ້ອງການຊວງກະສິກໍາ ແລະປ່າໄມ້ (ກປ) ທ່ານ ລິນຄໍາ ດວງສະຫວັນ ລັດຖະມົນຕີກະຊວງກະສິກໍາ ແລະ ປ່າໄມ້ ໄດ້ຕ້ອນຮັບການຢ້ຽມຢາມພົບປະຂອງ ທ່ານ ໂຄອິຊຶມິ ຊຶໂຕມຸ (Koizumi Tsutomu) ເອກອັກຄະຣາຊະທູດ ແຫ່ງ ຍີ່ປຸ່ນ ປະຈໍາລາວ ພ້ອມດ້ວຍຄະນະເນື່ອງໃນໂອກາດການເຂົ້າຮັບຕໍາແໜ່ງ ເປັນເອກອັກຄະຣາຊະທູດ ແຫ່ງ ຍີ່ປຸ່ນ ປະຈໍາລາວ.

ໃນໂອກາດການພົບປະທັງສອງຝ່າຍໄດ້ມີການແລກປ່ຽນ ແລະປຶກສາຫາລືກັນຫຼາຍດ້ານທີ່ຕິດພັນກັບວຽກງານການຮ່ວມມື ແລະການສະໜັບສະໜູນຂອງລັດຖະບານຍີ່ປຸ່ນ ແລະ ສປປ ລາວ ໂດຍສະເພາະໃນວຽກງານທີ່ຕິດພັນກັບຂົງເຂດກະສິກໍາ, ປ່າໄມ້ ແລະ ພັດທະນາຊົນນະບົດ.

ນອກຈາກນີ້ ທ່ານ ເອກອັກຄະຣາຊະທູດ ໄດ້ກ່າວວ່າ: ປັດຈຸບັນມີຫຼາຍບໍລິສັດຈາກປະເທດຍີ່ປຸ່ນມີຄວາມສົນໃຈຢາກມາລົງທຶນ ດ້ານກະສິກໍາສະອາດສີຂຽວໃນປະເທດລາວ ແລະ ມີຫຼາຍບໍລິສັດທີ່ໄດ້ມາລົງທຶນແລ້ວ ດ້ານການຜະລິດສິນຄ້າກະສິກຳ ແລະ ສົ່ງອອກໄປ ປະເທດຍີ່ປຸ່ນ ເຊັ່ນ: ໂຮງງານຜະລິດເຫຼົ້າ ຍີ່ຫໍ້ລາວດີ,ໂຄງການຜະລິດເມັດກາເຟຄຸນນະພາບ ຢູ່ຫຼວງພະບາງ, ການຜະລິດສະໝຸນໄພ ຢູ່ພາກໃຕ້ຂອງ ສປປ ລາວ ແລະອື່ນໆ.

ທ່ານລັດຖະມົນຕີ ກະຊວງກະສິກໍາ ແລະປ່າໄມ້ ໄດ້ກ່າວວ່າ ຂ້າພະເຈົ້າສຸດແຕ່ມີຄວາມດີໃຈ ແລະຍິນດີທີ່ນັກລົງທຶນຈາກປະເທດຍີ່ປຸ່ນ ແລະລັດຖະບານຍີ່ປຸ່ນມີຄວາມສົນໃຈໃນການລົງທຶນດ້ານກະສິກຳສະອາດ ສີຂຽວ ຊຶ່ງເປັນທ່າແຮງຂອງ ສປປ ລາວ ແລະ ຈະໃຫ້ ການສະໜັບສະໜູນ ຕໍ່ວຽກງານອຸດສາຫະກໍາການປຸ່ງແຕ່ງກະສິກໍາອັນເປັນພື້ນຖານໃນປະເທດລາວເຮົາ, ພ້ອມທັງໄດ້ສະເໜີສືບຕໍ່ໃຫ້ການສະໜັບສະໜູນຈາກລັດຖະບານຍີ່ປຸ່ນ ໃນດ້ານການແລກປ່ຽນຖ່າຍທອດບົດຮຽນ ແລະ ເຕັກໂນໂລຊີທັນສະໄໝ ໃນການພັດທະນາດ້ານກະສິກຳສະອາດ, ການສ້າງນິຕິກໍາດ້ານກະສິກໍາ ໃຫ້ ສປປ ລາວ ເຊິ່ງເປັນເຄື່ອງມືພື້ນຖານສໍາຄັນໃນການລິ່ເລີ່ມ ໃຫ້ແກ່ບັນດາໂຄງການຕ່າງໆ ພ້ອມທັງເຊື້ອເຊີນໃຫ້ທ່ານເອກອັກຄະຣາຊະທູດ ແລະຄູ່ຮ່ວມພັດທະນາລົງໄດ້ລົງຢ້ຽມຢາມເຂດພື້ນຖານການຜະລິດໃນປະເທດລາວໃນຕໍ່ໜ້າຕື່ມອີກ.

ໂດຍ: ນ. ສີອໍາມອນ ໄຊຍະລາດ

แชร์