ຫາລືກະກຽມສ້າງຕັ້ງສະພາສົ່ງເສີມຕະຫຼາດການທ່ອງທ່ຽວ

ກົມຄຸ້ມຄອງທຸລະກິດການທ່ອງທ່ຽວ ກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວ (ຖວທ) ຈັດກອງປະຊຸມປຶກສາຫາລື ກ່ຽວກັບການສ້າງຕັ້ງສະພາສົ່ງເສີມຕະຫຼາດການທ່ອງທ່ຽວໄດ້ຈັດຂຶ້ນໃນວັນທີ 11 ກັນຍາ 2024 ທີ່ກະຊວງ ຖວທ ພາຍໃຕການເປັນປະທານຂອງທ່ານ ນາງ ດາລານີ ພົມມະວົງສາ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ມີທ່ານ ນາງ ຈັນທະຈອນ ວົງໄຊ ຮອງປະທານສະພາການຄ້າ ແລະອຸດສາຫະກຳແຫ່ງຊາດລາວ, ມີຫົວໜ້າກົມ, ຮອງຫົວໜ້າກົມຈາກບັນດາກະຊວງກ່ຽວຂ້ອງເຂົ້າຮ່ວມ.

ທ່ານ ນາງ ດາລານີ ພົມມະວົງສາ ກ່າວວ່າ: ປະຈຸບັນອຸດສະຫະກຳການທ່ອງທ່ຽວມີການຟື້ນໂຕຢ່າງວ່ອງໄວພາຍຫລັງໄດ້ຮັບຜົນກະທົບຈາກການລະບາດຂອງພະຍາດໂຄວິດ-19, ຊຶ່ງນັບແຕ່ເດືອນມັງກອນ ຫາ ເດືອນ ກໍລະກົດ 2024 ມີນັກທ່ອງທ່ຽວພາກພື້ນ ແລະ ສາກົນທີ່ເດີນທາງເຂົ້າມາທ່ອງທ່ຽວຢູ່ ສປປ ລາວ ໄດ້ທັງໝົດ 2,322,971 ເທື່ອຄົນ ເພີ່ມຂຶ້ນ 18% ຄາດຄະເນລາຍຮັບປະມານ 704,322,963 ລ້ານໂດລາ ແລະ ຈຳນວນນັກທ່ອງທ່ຽວພາຍໃນ (ລາວທ່ຽວລາວ) ທັງໝົດ 2,052,501 ເທື່ອຄົນ, ເພີ່ມຂຶ້ນ 78% ຄາດຄະເນລາຍຮັບ 332,505,162 ລ້ານໂດລາ ເມື່ອທຽບໃສ່ໄລຍະດຽວກັນຂອງປີທີ່ຜ່ານມາ. ເຖິງວ່າການທ່ອງທ່ຽວຈະມີທ່າຂະຫຍາຍຕົວດີຂຶ້ນກໍຕາມ ແຕ່ເບິ່ງລວມແລ້ວການບໍລິຫານ ຈັດການຈຸດໝາຍປາຍທາງການທ່ອງທ່ຽວຂອງພວກເຮົາຍັງບໍ່ທັນມີຄຸນນະພາບເທົ່າທີ່ຄວນ, ຍັງມີຂອດອຸດຕັນ ຫຼາຍດ້ານ ຊຶ່ງຕ້ອງການໃຫ້ມີການແກ້ໄຂຮ່ວມກັນ ເປັນຕົ້ນ: ສິ່ງອໍານວຍຄວາມສະດວກ ແລະ ການບໍລິການຢູ່ດ່ານສາກົນ ເຂົ້າ-ອອກ ບາງແຫ່ງ ຍັງບໍ່ສະດວກ ວ່ອງໄວ ແລະ ທັນສະໄໝ; ຕາໜ່າງຄົມມະນາຄົມຂົນສົ່ງລົດໂດຍສານ ລະຫວ່າງດ່ານສາກົນ ຫາບັນດາຕົວເມືອງ ແລະ ເຂົ້າເຖິງ ຈຸດໝາຍປາຍທາງການທ່ອງທ່ຽວຕົ້ນຕໍ ຍັງມີໜ້ອຍ, ພາຫະນະຂົນສົ່ງໂດຍສານ/ນັກທ່ອງທ່ຽວຈໍາ ນວນໜຶ່ງເກົ່າແກ່ຊຸດໂຊມ ແລະ ຂາດການກວດກາເຕັກນິກ; ການດໍາເນີນເອກະສານ ເຂົ້າ-ອອກ ຂອງນັກທ່ອງທ່ຽວທີ່ມາດ້ວຍລົດຈັກໃຫຍ່ (ບົກໄບ) ທີ່ໃຊ້ບໍລິການຜ່ານບໍລິສັດທ່ອງທ່ຽວຍັງມີຄວາມຫຍຸ້ງຍາກທາງດ້ານເອກະສານຕ່າງໆ ແລະບັນຫາອື່ນໆອີກ.

ສະນັ້ນການສ້າງຕັ້ງສະພາສົ່ງເສີມຕະຫຼາດການທ່ອງທ່ຽວລາວຈຶ່ງມີຄວາມສໍາຄັນຫຼາຍເພື່ອແນໃສ່ຢາກໃຫ້ທຸກພາກສ່ວນມີສ່ວນຮ່ວມໃນການຄົ້ນຄວ້າແກ້ໄຂບັນຫາຮ່ວມກັນ ຜ່ານກົນໄກຂອງສະພາດັ່ງກ່າວ ເຊື່ອໝັ້ນວ່າ ພວກເຮົາຈະມີທາງອອກທີ່ເໝາະສົມ. ປະຈຸບັນນີ້ພວກເຮົາກໍໄດ້ສໍາເລັດການຮ່າງດໍາລັດວ່າດ້ວຍສະພາ ສົ່ງເສີມຕະຫຼາດການທ່ອງທ່ຽວລາວ ສໍາເລັດໂດຍພື້ນຖານແລ້ວ ກໍາລັງກະກຽມລາຍງານຂໍທິດຊີ້ນໍາຈາກລັດຖະມົນຕີ ເພື່ອສະເໜີຕໍ່ກະຊວງຍຸຕິທໍາ ເພື່ອດໍາເນີນການກວດກາຄວາມສອດຄ່ອງທາງດ້ານກົດໝາຍ; ສະພາສົ່ງເສີມຕະຫຼາດການທ່ອງທ່ຽວລາວ ແມ່ນອົງການຈັດຕັ້ງຮ່ວມລະຫວ່າງພາກທຸລະກິດ ແລະ ພາກລັດທີ່ລັດຖະບານເປັນຜູ້ອະນຸຍາດໃຫ້ ສ້າງຕັ້ງຂຶ້ນມີພາລະບົດບາດໃນການສົ່ງເສີມການດໍາເນີນທຸລະກິດ ແລະ ການບໍລິການ, ຄົ້ນຄວ້າ ແລະ ນໍາສະເໜີນະໂຍບາຍ, ແຜນຍຸດທະສາດ, ໂຄສະນາກ່ຽວກັບວຽກງານການຕະຫຼາດການທ່ອງທ່ຽວລາວເພື່ອສ້າງໂອກາດໃຫ້ການຕະຫຼາດໃໝ່ມີຄຸນນະພາບມີມູນຄ່າສູງມີເອກະລັກ, ມີຄວາມປອດໄພ, ທັນສະໄໝໄດ້ມາດຕະຖານມີຄວາມຍືນຍົງສາມາດດຶງດູດເອົານັກທ່ອງທ່ຽວນັກລົງທຶນທັງພາຍໃນ ແລະຕ່າງປະເທດ. ຊຶ່ງການຈັດກອງປະຊຸມຄັ້ງນີ້ກໍເພື່ອປຶກສາຫາລືຕໍ່ກັບໂຄງສ້າງ, ການກຳນົດຮູບແບບກົນໄກການຈັດຕັ້ງປະຕິບັດຂອງສະພາສົ່ງເສີມຕະຫລາດການທ່ອງທ່ຽວລາວ, ເອກະພາບກັນແລ້ວຈຶ່ງພ້ອມກັນຍື່ນສະເໜີໃຫ້ລັດຖະບານໄດ້ພິຈາລະນາອະນຸມັດໃນຂັ້ນຕອນຕໍ່ໄປ.

แชร์