ປະທານ ສນຊ ລົງພົບປະຢ້ຽມຢາມໂຮງງານຕັດແຕ່ງ ແລະ ແປຮູບໝູ

ໃນວັນທີ 10 ກັນຍາ 2024 ຜ່ານມາ, ທ່ານ ສິນລະວົງ ຄຸດໄພທູນ ປະທານສູນກາງແນວລາວສ້າງຊາດ ພ້ອມຄະນະລົງພົບປະຢ້ຽມຢາມ ແລະຊຸກຍູ້ວຽກງານ ຢູ່ໂຮງງານຕັດແຕ່ງ ແລະ ແປຮູບໝູ ດອນດູ່ ເມືອງຫາດຊາຍຟອງ ນະຄອນຫລວງວຽງຈັນ ໂດຍໄດ້ຮັບການຕ້ອນຮັບຈາກທ່ານ ຄຳຫລ້າ ແສງດາວົງ ຜູ້ອຳນວຍການລັດວິສາຫະກິດສະບຽງອາຫານ ແລະທ່ານ ທຳນອງ ພົນທອງມາກ ຜູ້ອຳນວຍການບໍລິສັດ CP Laos ພ້ອມ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ຄຳຫລ້າ ແສງດາວົງ ໄດ້ໃຫ້ຮູ້ວ່າ: ເພື່ອຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ VI ອົງຄະນະພັກນະຄອນຫລວງວຽງຈັນ ແລະນະໂຍບາຍຂອງນະຄອນຫລວງວຽງຈັນ ສູ້ຊົນໃຫ້ໂຄງປະກອບເສດຖະກິດ ຫັນປ່ຽນຕາມກົນໄກເສດຖະກິດຕະຫລາດ ແລະ ບັນລຸຄາດໝາຍໃນດ້ານວຽກງານກະສິກຳ. ດັ່ງນັ້ນ, ລັດວິສາຫະກິດສະບຽງອາຫານນະຄອນຫລວງວຽງຈັນ ຈຶ່ງໄດ້ຮ່ວມມືກັບບໍລິ ສັດ CP Laos ໃນປີ 2016 ແລະໄດ້ປັບປຸງໂຄງສ້າງທັງໝົດຂອງໂຮງງານຕັດແຕ່ງ ແລະ ແປຮູບໝູດອນດູ່ ໃຫ້ມີຄຸນນະພາບ ແລະຫັນເປັນທັນສະໄໝ. ປັດຈຸບັນ ໄດ້ຂະຫຍາຍສາຂາຕື່ມອີກ 3 ແຂວງຄື: ແຂວງຫລວງພະບາງ, ແຂວງຄໍາມ່ວນ ແລະ ແຂວງຈໍາປາສັກ; ໄດ້ສະໜອງຊີ້ນໝູແປຮູບໃຫ້ຕະ ຫລາດຢູ່ 4 ແຂວງດັ່ງກ່າວລວມທັງ ໝົດ 1.300 ໂຕ/ວັນ. ສະເພາະຢູ່ໂຮງງານຕັດແຕ່ງ ແລະ ແປຮູບໝູດອນດູ່ ນະຄອນຫລວງວຽງຈັນ 550 ໂຕ/ວັນ; ໂຮງງານມີຟາມໝູທີ່ລ້ຽງເອງ, ຟາມຈາກຜູ້ປະກອບການລ້ຽງໝູ ເຊິ່ງໝູທຸກໂຕແມ່ນໄດ້ຮັບການກວດຜ່ານມາດຕະຖານ ຕາມທີ່ໂຮງງານກຳນົດໄວ້. ນອກຈາກຊີ້ນສົດແລ້ວ, ຍັງຜະລິດຢໍ່, ລູກຊີ້ນ, ໝູປີ້ງ, ໝູໝັກພິກໄທດຳ ແລະ ນໍ້າມັນງາ, ໄກ່ຈໍ້, ນ້ຳມັນໝູ, ໄສ້ກອກໝູ, ເຕົ້າຮູ້ໄຂ່ ແລະ ໝູຝ່ອຍ ໂດຍມີການກຳນົດວັນໝົດອາຍຸຂອງສິນຄ້າ ແລະສິນຄ້າທຸກປະເພດມີການຂຶ້ນທະບຽນ ອຍ ກັບພາກລັດ.

ພ້ອມນີ້, ທ່ານຍັງໄດ້ຍົກໃຫ້ເຫັນຂໍ້ສະດວກ, ຂໍ້ຫຍຸ້ງຍາກ ແລະທິດທາງແຜນການໃນຕໍ່ໜ້າໂດຍໂຮງງານຈະສືບຕໍ່ປັບປຸງພື້ນຖານໂຄງລ່າງ ແລະເພີ່ມກຳລັງການຜະລິດເພື່ອສາມາດຕອບສະໜອງຕາມຄວາມຕ້ອງການຂອງຕະຫລາດ.

ໃນໂອກາດນີ້, ທ່ານປະທານສູນກາງແນວລາວສ້າງຊາດໄດ້ໂອ້ລົມຕໍ່ຄະນະອຳນວຍການ ແລະຜູ້ບໍລິຫານໂດຍໄດ້ສະແດງຄວາມຍ້ອງຍໍຊົມເຊີຍຕໍ່ການຮ່ວມມືຂອງສອງບໍລິສັດດັ່ງກ່າວພ້ອມທັງໄດ້ເນັ້ນອີກວ່າ: ໃນອະນາຄົດຢູ່ປະເທດເຮົາຄວາມຕ້ອງການໃນການບໍລິໂພກສະບຽງອາຫານຍິ່ງຈະເພີ່ມຂຶ້ນເປັນຈຳນວນຫລວງຫລາຍ. ສະນັ້ນ, ໃຫ້ສອງບໍລິສັດດັ່ງກ່າວ, ຈົ່ງສືບຕໍ່ຮ່ວມມືກັນຮັກສາມູນເຊື້ອ ແລະສືບຕໍ່ປັບປຸງມາດຕະຖານຂອງໂຮງງານ ໃຫ້ກ້າວໄປສູ່ລະດັບສາກົນ, ຮັບປະກັນໃຫ້ອາຫານມີຄວາມສະອາດດີ, ມີຄຸນນະພາບ, ການຜະລິດກໍໃຫ້ຜະລິດແບບຄົບວົງຈອນທີ່ມີລັກສະນະໝູນວຽນ ແລະໃຫ້ຜູ້ບໍລິໂພກມີຄວາມໄວ້ວາງໃຈໃນການບໍລິໂພກ ແລະມີສຸຂະພາບດີ.
ຂ່າວ-ພາບ: ສນຊ

แชร์