ຮອງລັດຖະມົນຕີກະຊວງປ້ອງກັນປະເທດ ເຄື່ອນໄຫວຢ້ຽມຢາມ ແລະມອບເງິນຊ່ວຍເຫຼືອແຂວງຫລວງນໍ້າທາ

ຕັ້ງແຕ່ວັນທີ 9-11 ກັນຍາ 2024 ນີ້, ເຫັນວ່າປະລິປານນໍ້າໄດ້ມີການຫຼຸດລົງເປັນຈໍານວນຫຼາຍແລ້ວ, ໃນວັນທີ 11 ກັນຍາ 2024 ນີ້, ສະຫາຍ ພົນໂທ ຄໍາລຽງ ອຸທະໄກສອນ ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ເສນາທິການກອງທັບໄດ້ນໍາເອົາເງິນສົດ ມູນຄ່າ 100 ລ້ານກີບ ມາມອບໃຫ້ແຂວງຫຼວງນໍ້າທາ ເພື່ອປະກອບເຂົ້າການຊ່ວຍເຫຼືອ ຜູ້ທີ່ຖືກຜົນກະທົບຈາກໄພນໍ້າຖ້ວມ, ເປັນກຽດຮັບໂດຍ ທ່ານ ວຽງສະຫວັດ ສີພັນດອນ ກໍາມະການສູນກາງພັກ, ເລຂາພັກແຂວງ, ເຈົ້າແຂວງ ແຂວງຫຼວງນໍ້າທາ ພ້ອມດ້ວຍຄະນະນໍາຂອງແຂວງ.
ໂອກາດນີ້, ສະຫາຍເຈົ້າແຂວງ ໄດ້ຕາງໜ້າໃຫ້ປະຊາຊົນ ຫຼື ຜູ້ປະສົບໄພນໍ້າຖ້ວມໃນແຂວງຫຼວງນໍ້າທາ ສະແດງຄວາມຂອບໃຈມາຍັງການນຳພັກ-ລັດ ກໍຄືກະຊວງປ້ອງກັນປະເທດ ທີ່ໄດ້ໃຫ້ການຊ່ວຍເຫຼືອໃນຄັ້ງນີ້, ພວກເຮົາຈະນຳໃຊ້ເງິນຈຳນວນດັ່ງກ່າວໄປຊ່ວຍເຫຼືອຜູ້ປະສົບໄພນໍ້າຖ້ວມໃຫ້ທົ່ວເຖິງ ແລະ ແບ່ງເບົາຜົນເສຍຫາຍຂອງປະຊາຊົນຫຼຸດໜ້ອຍລົງ.
ການເຄື່ອນໄຫວມອບເງິນຊ່ວຍເຫຼືອໃນຄັ້ງນີ້, ສະຫາຍຮອງລັດຖະມົນຕີກະຊວງປ້ອງກັນປະເທດ ຍັງໄດ້ ນໍາເອົາອາຫານແຫ້ງ ລົງແຈກຢາຍໃຫ້ປະຊາຊົນທີ່ຖືກຜົນກະທົບ ຈໍານວນ 4 ໝູ່ບ້ານ ຄື: ບ້ານຫຼວງ, ບ້ານຂອນ, ບ້ານປ່າສັກ ແລະບ້ານໃໝ່ ອີກດ້ວຍ.

แชร์