ກອງປະຊຸມຂັ້ນສູງ ລະຫວ່າງ ພັກປະຊາຊົນປະຕິວັດລາວນໍາໂດຍ ສະຫາຍ ທອງລຸນ ສີສຸລິດ ເລຂາທິການໃຫຍ່, ປະທານປະເທດແຫ່ງ ສປປ ລາວ ແລະ ພັກກອມມູນິດຫວຽດນາມນຳໂດຍ ສະຫາຍ ໂຕ ເລິມ ເລຂາທິການໃຫຍ່, ປະທານປະເທດແຫ່ງ ສສ ຫວຽດນາມ. ໄດ້ຈັດຂຶ້ນໃນວັນທີ 11 ກັນຍາ 2024, ຢູ່ນະຄອນ ຫລວງຮ່າໂນ້ຍ ສສ ຫວຽດນາມ, ນີ້ເປັນກົນໄກຮ່ວມມືສຳຄັນໃນການພົວພັນລະຫວ່າງ ສອງພັກ, ສອງລັດ, ປະກອບສ່ວນສຳຄັນເຂົ້າໃນການຮັດແໜ້ນລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ.
ໃນການພົບປະ,ສະຫາຍ ທອງລຸນ ສີສຸລິດ ເລຂາທິການໃຫຍ່, ປະທານປະເທດລາວ ແລະ ສະຫາຍ ໂຕເລິມ ເລຂາທິການໃຫຍ່, ປະທານປະເທດຫວຽດນາມ ໄດ້ແຈ້ງໃຫ້ກັນຊາບກ່ຽວກັບສະ ພາບການຂອງແຕ່ລະພັກ ແລະ ແຕ່ລະປະເທດ. ໃນນັ້ນ ລວມມີວຽກງານກໍ່ສ້າງພັກ, ການພັດທະນາເສດຖະກິດ-ສັງຄົມ, ປຶກສາ ຫາລືແລກປ່ຽນ ກ່ຽວກັບສະພາບການສາກົນ, ພາກພື້ນ ແລະ ບັນດາເນື້ອໃນຕ່າງໆທີ່ຕ່າງຝ່າຍຕ່າງມີຄວາມສົນໃຈຮ່ວມກັນ; ຕີລາຄາໝາກຜົນຂອງການຮ່ວມມືລະຫວ່າງສອງປະເທດໃນໄລຍະມໍ່ໆມານີ້, ເຫັນດີເປັນເອກະພາບກັນກ່ຽວກັບທິດທາງສຳຄັນຂອງການພົວພັນຮ່ວມມືລາວ-ຫວຽດນາມ ໃນໄລຍະສະເພາະໜ້າ.
ສະຫາຍເລຂາທິການໃຫຍ່, ປະທານປະເທດທັງສອງໄດ້ສະແດງຄວາມຊົມເຊີຍເຊິ່ງກັນ ແລະກັນ ຕໍ່ບັນດາຜົນສຳເລັດອັນສຳຄັນເຊິ່ງມີຄວາມໝາຍປະຫວັດສາດທີ່ປະຊາຊົນສອງຊາດ ຍາດມາໄດ້ໃນພາລະກິດການປ່ຽນແປງໃໝ່ ກໍຄື ການຈັດຕັ້ງປະຕິ ບັດມະຕິກອງປະຊຸມໃຫຍ່ຂອງແຕ່ລະພັກ; ໄດ້ສະແດງຄວາມຂອບໃຈຕໍ່ການຊ່ວຍເຫລືອຖານມິດສະຫາຍອັນແທ້ຈິງ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດໃຫ້ກັນ ແລະ ກັນ ນັບແຕ່ອະດີດເຖິງປັດຈຸບັນ; ເນັ້ນເຖິງມູນເຊື້ອປະຫວັດສາດ, ຄວາມສາມັກຄີ, ຄວາມໃກ້ຊິດຕິດແທດ ແລະ ການຊ່ວຍເຫລືອເຊິ່ງກັນ ແລະ ກັນ, ຢືນຢັນວ່າ ສາຍພົວພັນລາວ-ຫວຽດ ນາມ ແມ່ນມໍລະດົກອັນລ້ຳຄ່າຂອງປະຊາຊົນສອງປະເທດ, ເປັນປັດໄຈພາວະວິໄສ ແລະເປັນແຫລ່ງກຳລັງແຮງອັນໃຫຍ່ຫລວງທີ່ສຸດຂອງສອງພັກ, ສອງລັດ ແລະປະຊາຊົນສອງຊາດ, ຕ້ອງໄດ້ສືບຕໍ່ເສີມ ຂະຫຍາຍປົກປັກຮັກສາ ແລະສືບທອດໃຫ້ກັບບັນດາຄົນຮຸ່ນຕໍ່ໄປ.
ສະຫາຍ ໂຕເລິມ ເລຂາທິການໃຫຍ່, ປະທານປະເທດຫວຽດ ນາມ ໄດ້ຢືນຢັນຢ່າງສະເໝີຕົ້ນສະເໝີປາຍວ່າ ການພົວພັນລະຫວ່າງ ຫວຽດນາມ-ລາວ ແມ່ນບຸລິມະສິດອັນດັບຕົ້ນໃນນະໂຍບາຍການຕ່າງປະເທດຂອງຫວຽດນາມ. ສະຫາຍ ທອງລຸນ ສີສຸລິດ ເລຂາທິການໃຫຍ່, ປະທານປະເທດລາວ ກໍໄດ້ຢືນຢັນວ່າ ບໍ່ ວ່າຈະຢູ່ໃນສະພາບການໃດກໍຕາມ, ລາວ ຈະຮ່ວມກັບຫວຽດນາມ ປັບປຸງ, ປົກປັກຮັກສາ ແລະ ເພີ່ມພູນຄູນສ້າງສາຍພົວພັນຄວາມສາມັກຄີແບບພິເສດ ລາວ-ຫວຽດນາມ ໃຫ້ນັບມື້ນັບໄດ້ຮັບການພັດທະນາ, ແຕກດອກອອກຜົນຍິ່ງຂຶ້ນ ເພື່ອຜົນປະໂຫຍດອັນແທ້ຈິງຂອງປະຊາຊົນແຕ່ລະປະເທດ, ເພື່ອສັນຕິ ພາບ, ສະຖຽນລະພາບ, ການພັດທະນາຂອງພາກພື້ນ ແລະໃນໂລກ.
ສະຫາຍ ທອງລຸນ ສີສຸລິດ ເລຂາທິການໃຫຍ່, ປະທານປະ ເທດລາວ ແລະ ສະຫາຍໂຕເລິມ ເລຂາທິການໃຫຍ່, ປະທານປະ ເທດຫວຽດນາມ ໄດ້ສະແດງຄວາມປິຕິຊົມຊື່ນ, ຕີລາຄາສູງຕໍ່ການພົວພັນຮ່ວມມືລາວ-ຫວຽດນາມ, ຫວຽດນາມ-ລາວ ທີ່ນັບມື້ພັດທະນາເຂົ້າສູ່ລວງເລິກ, ບັນລຸໄດ້ໝາກຜົນຕົວຈິງໃນທຸກດ້ານ, ປະກອບສ່ວນສໍາຄັນເຂົ້າໃນການພັດທະນາເສດຖະກິດ - ສັງຄົມ, ເພີ່ມທະວີດ້ານປ້ອງກັນຊາດ ແລະ ປ້ອງກັນຄວາມສະ ຫງົບ, ມີສະຖຽນລະພາບທາງດ້ານການເມືອງ ແລະ ຄວາມເປັນ ລະບຽບຮຽບຮ້ອຍຂອງສັງຄົມ ຢູ່ແຕ່ລະປະເທດ; ສືບຕໍ່ເສີມ ຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລາວ-ຫວຽດນາມ, ຫວຽດ ນາມ-ລາວ ໃຫ້ນັບມື້ໄດ້ຮັບການພັດທະນາ, ປະກອບສ່ວນເຂົ້າໃນສັນຕິພາບ, ສະຖຽນລະພາບ, ການຮ່ວມມື ແລະ ການພັດທະນາຢູ່ພາກພື້ນ ແລະ ໃນໂລກ. ການນຳສອງຝ່າຍ ໄດ້ສະແດງຄວາມຊົມເຊີຍຕໍ່ການເພີ່ມທະວີການພົວພັນອັນດີງາມ ລະຫວ່າງລາວ- ຫວຽດນາມ-ກໍາປູເຈຍ ທີ່ນັບມື້ໄດ້ຮັບການພັດທະນາເປັນຢ່າງດີ ແລະ ຖືສຳຄັນຍິ່ງ ກໍຄືມີຄວາມຕ້ອງການຊຸກຍູ້ການພົວພັນຮ່ວມມືລະຫວ່າງ 3 ພັກ ແລະ 3 ປະເທດ, ໃນນັ້ນປະຕິບັດໝາກຜົນຂອງການພົບປະລະຫວ່າງ ການນຳຂອງສາມພັກ ກໍຄືບັນດາກົນໄກການຮ່ວມມືກັບຝ່າຍອື່ນໆ.
ໃນການພົບປະດັ່ງກ່າວ, ສະຫາຍ ສອນໄຊ ສີພັນດອນ ນາຍົກລັດຖະມົນຕີແຫ່ງ ສປປ ລາວ ແລະ ສະຫາຍ ຟ້າມ ມິງ ຈິງ ນາຍົກລັດຖະມົນຕີຫວຽດນາມ ໄດ້ຕີລາຄາສູງບັນດາໝາກຜົນແຫ່ງການຮ່ວມມືລະຫວ່າງ 2 ປະເທດໃນຂົງເຂດເສດຖະກິດ, ການຄ້າ, ການລົງທຶນ, ວັດທະນະທຳ, ການສຶກສາ, ວິທະຍາສາດເຕັກໂນໂລຊີ. ພ້ອມກັນນັ້ນ, ໄດ້ນຳສະເໜີບັນດາມາດຕະການສະເພາະ ເພື່ອຍົກສູງປະສິດທິຜົນ ຂອງການຮ່ວມມື; ສອງນາຍົກ ລັດຖະມົນຕີ ເນັ້ນເຖິງຄວາມຈຳເປັນຕ້ອງໄດ້ສ້າງບາດກ້າວບຸກທະ ລຸໃນການພັດທະນາເສດຖະກິດ, ການຄ້າໃຫ້ສົມຄູ່ກັບການພົວພັນທາງການເມືອງ, ຄວາມສາມາດບົ່ມຊ້ອນ ແລະ ທ່າແຮງຂອງແຕ່ລະປະເທດ,ສຸມໃສ່ແກ້ໄຂບັນດາບັນຫາຄົງຄ້າງໃນການຮ່ວມມື, ຊຸກຍູ້ການຮ່ວມມືທີ່ເຊື່ອມໂຍງ ແລະເພີ່ມທະວີການຮ່ວມມືດ້ານເສດຖະກິດຂອງສອງປະເທດລາວ-ຫວຽດນາມ ແລະ ລະຫວ່າງ 3 ພື້ນຖານເສດຖະກິດ ລາວ-ຫວຽດນາມ-ກໍາປູເຈຍ.
ບັນດາການນຳຂອງສອງພັກ ແລະ ສອງລັດ ໄດ້ເຫັນດີເປັນເອກະພາບໃນໄລຍະຕໍ່ໜ້າໂດຍຕ້ອງໄດ້ຕັ້ງໜ້າຈັດຕັ້ງຜັນຂະຫຍາຍບັນດາທິດທາງສຳຄັນ ທີ່ການນຳຂອງສອງຝ່າຍໄດ້ເອກະພາບກັນ, ສືບຕໍ່ເອົາການພົວພັນດ້ານການເມືອງເຂົ້າສູ່ລວງເລິກ ເຊິ່ງເປັນທິດທາງລວມຂອງການຮ່ວມມື; ປະສານສົມທົບຢ່າງແໜ້ນແຟ້ນໃນບາງບັນຫາຍຸດທະສາດ, ຮ່ວມກັນໃນການກະກຽມຈັດຕັ້ງກອງປະຊຸມພັກ ແຕ່ລະຂັ້ນ ເພື່ອກ້າວໄປເຖິງກອງປະຊຸມໃຫຍ່ຂອງແຕ່ລະພັກ; ເພີ່ມທະວີ ແລະ ເສີມຂະຫຍາຍບັນດາເສົາຄ້ຳແຫ່ງການຮ່ວມມືດ້ານປ້ອງກັນຊາດ, ປ້ອງກັນຄວາມສະຫງົບ.
ການນຳສອງປະເທດໄດ້ເຫັນດີເພີ່ມທະວີການແລກປ່ຽນຂໍ້ມູນຂ່າວສານຢ່າງທັນການ, ການປຶກສາຫາລື, ການປະສານງານຢ່າງໃກ້ຊິດ, ສະໜັບສະໜູນເຊິ່ງກັນ ແລະ ກັນໃນເວທີພາກພື້ນ ແລະ ສາກົນ; ປະຕິບັດບັນດາຖະແຫລງການຮ່ວມ ລາວ-ຫວຽດ ນາມ ແລະ ຂໍ້ຕົກລົງລະຫວ່າງ 2 ພັກ ແລະ ລັດ ແລະ ບັນດາໂຄງ ການຮ່ວມມືລະຫວ່າງບັນດາກະຊວງ, ຂະແໜງການ ແລະ ທ້ອງຖິ່ນໃຫ້ມີປະສິດທິພາບ, ເພີ່ມທະວີການເຊື່ອມຈອດ ແລະ ການຮ່ວມມືລະຫວ່າງສອງພື້ນຖານເສດຖະກິດ; ຖືສໍາຄັນມາດຕະການແກ້ໄຂຄວາມຫຍຸ້ງຍາກ ແລະ ຂ້ອງຄາ, ຍົກສູງຄຸນນະພາບ ແລະ ປະສິດທິຜົນຂອງການຮ່ວມມືລົງທຶນ; ຍົກສູງປະສິດທິພາບຂອງການພົວພັນຮ່ວມມືລະຫວ່າງບັນດາອົງການຈັດຕັ້ງມະຫາຊົນ ແລະ ທ້ອງຖິ່ນ, ເປີດກວ້າງການຮ່ວມມືໂດຍກົງ, ສະໜັບ ສະໜູນເຊິ່ງກັນ ແລະ ກັນໃນການພັດທະນາເສດຖະກິດ-ສັງຄົມ, ຮັກສາຄວາມໝັ້ນຄົງ ແລະຄວາມສະຫງົບປອດໄພຢູ່ເຂດຊາຍແດນ.
ສອງຝ່າຍຢືນຢັນຄວາມຈຳເປັນຕ້ອງຍຍົກສູງປະສິດທິພາບຂອງກົນໄກທີ່ມີຢູ່ແລ້ວ, ສືບຕໍ່ການປ່ຽນແປງໃໝ່, ປະດິດສ້າງໃໝ່ໃນການຍົກສູງປະສິດທິຜົນການຮ່ວມມືໃນທຸກຂົງເຂດ, ສ້າງກົນໄກໃໝ່ທີ່ເໝາະສົມເພື່ອຮັດແໜ້ນສາຍພົວພັນແບບພິເສດລາວ-ຫວຽດນາມ ເພື່ອຜົນປະໂຫຍດຕົວຈິງຂອງປະຊາຊົນສອງປະເທດ, ເພື່ອສັນຕິພາບ, ການຮ່ວມມື ແລະ ການພັດທະນາໃນພາກພື້ນ ແລະໃນໂລກ.
ພາບ: ຂັນໄຊ
| ສະກຸນເງີນ | ອັດຕາຊື້ | ອັດຕາຂາຍ | |
|
EUR | 21.356 | 21.571 |
|
USD | 21.996 | 22.140 |
|
THB | 683 | 690 |
|
CNY | 2.713 | 2.740 |