ແຂວງວຽງຈັນ ກຽມສຳຫລວດພົນລະເມືອງ ແລະ ທີ່ຢູ່ອາໄສ

ກອງປະຊຸມຄັ້ງທີ 1 ຂອງຄະນະຊີ້ນຳແຂວງວຽງຈັນໃນການກະກຽມເດີນສຳຫລວດພົນລະເມືອງ ແລະ ທີ່ຢູ່ອາໄສ ທົ່ວປະເທດ ຄັ້ງທີ 5 ປີ 2025 ໄຂຂຶ້ນໃນວັນທີ 10 ກັນຍາ 2024 ທີ່ຫ້ອງວ່າການແຂວງ ໂດຍການເປັນປະທານຂອງທ່ານ ຄຳພັນ ສິດທິດຳພາ ເຈົ້າແຂວງໆວຽງຈັນ ທັງເປັນຫົວໜ້າຄະນະຊີ້ນຳການເດີນສຳຫລວດຂັ້ນແຂວງ ພ້ອມດ້ວຍພະແນກການ, ອົງການອ້ອມຂ້າງແຂວງ, 11 ເມືອງ ແລະ ພະນັກງານຂະແໜງສະຖິຕິ-ແຜນການຂັ້ນແຂວງ ແລະ ເມືອງເຂົ້າຮ່ວມ.

ທ່ານ ເຕັ່ງເມັ່ງ ຢ່າງລືໄຊ ຫົວໜ້າພະແນກ ແຜນການ ແລະ ການລົງທຶນ ແຂວງວຽງຈັນ ທັງເປັນຮອງຫົວໜ້າຄະນະຊີ້ນຳ ການເດີນສຳຫລວດພົນລະເມືອງ ແລະ ທີ່ຢູ່ອາໄສຂັ້ນແຂວງ ໄດ້ກ່າວວ່າ: ຈຸດປະສົງຂອງການສໍາຫລວດພົນລະເມືອງ ແລະ ທີ່ຢູ່ອາໄສ ທົ່ວປະເທດ ຄັ້ງທີ V ປີ 2025 ເພື່ອຈົດນັບຈໍານວນພົນລະເມືອງ ແລະ ຄຸນລັກສະນະທີ່ຢູ່ອາໄສ ຂອງພົນລະເມືອງ ໃນຂອບເຂດທົ່ວປະເທດ ໂດຍສະເພາະ ທົ່ວແຂວງວຽງຈັນ ກວມເອົາ 11 ເມືອງ ໂດຍລົງເລິກກ່ຽວກັບສະພາບການສຶກສາ, ແຮງງານ ແລະ ຄວາມພິການ, ການຍົກຍ້າຍ, ການເກີດ, ການຕາຍ ແລະ ດ້ານສຸຂະອະນາໄມ ຊຶ່ງຂໍ້ມູນດັ່ງກ່າວ ຈະສາມາດສ່ອງແສງໃຫ້ເຫັນເຖິງ ການປ່ຽນແປງທາງດ້ານຂະໜາດ, ໂຄງປະກອບ, ການຂະຫຍາຍຕົວ ແລະ ການແຈກຢາຍຂອງພົນລະເມືອງ ໃນຮອບ 10 ປີຜ່ານມາ, ເປັນຂໍ້ມູນພື້ນຖານໃນການຕິດຕາມ ແລະ ປະເມີນ ການຈັດຕັ້ງປະຕິບັດແຜນ ພັດທະນາ ເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ແລະ ສໍາລັບການສ້າງແຜນພັດທະນາ ເສດຖະກິດ-ສັງຄົມ ຂອງແຂວງ 5 ປີ ຄັ້ງທີ VII, ຕິດຕາມ ແລະ ປະເມີນຄວາມຄືບໜ້າຂອງເປົ້າໝາຍ ການພັດທະນາແບບຍືນຍົງ (SDGs) ທັງເປັນຂໍ້ມູນສໍາລັບສ້າງບົດລາຍງານ ປະເມີນການຫລຸດພົ້ນອອກຈາກປະເທດດ້ອຍພັດທະນາ.

ປັດຈຸບັນ, ແຂວງວຽງຈັນ ໄດ້ຈັດຕັ້ງປະຕິບັດສຳເລັດຄວາມພ້ອມບາງດ້ານ ຂອງການເດີນສຳຫລວດພົນລະເມືອງ ແລະ ທີ່ຢູ່ອາໄສ ປີ 2025 ເປັນຕົ້ນ ສຳເລັດຮ່າງຂໍ້ຕົກລົງຂອງເຈົ້າແຂວງ ວ່າດ້ວຍການແຕ່ງຕັ້ງຄະນະຊີ້ນຳຂັ້ນແຂວງ ແລະ ຫົວໜ້າຄະນະຊີ້ນຳຂັ້ນເມືອງ, ສຳເລັດຮ່າງຂໍ້ຕົກລົງແຕ່ງຕັ້ງຄະນະຫ້ອງສຳຫລວດຂັ້ນແຂວງ, ການກະກຽມສຳຫລວດພົນລະເມືອງ ແລະ ທີ່ຢູ່ອາໄສ ແລະ ໄດ້ແບ່ງຄວາມຮັບຜິດຊອບຂອງຄະນະຊີ້ນຳຂັ້ນແຂວງ ໃນນີ້, ສ່ວນງົບປະມານສຳລັບຝຶກອົບຮົມຄູຝຶກ, ນັກກວດ, ນັກເດີນສຳຫລວດພາກສະໜາມຂັ້ນແຂວງ ແລະ ຂັ້ນເມືອງ, ອຸປະກອນແທັບເລັດ ທີ່ຈະໃຊ້ໃນການເດີນສຳຫລວດ, ປ້າຍໂຄສະນາ, ໝວກ, ເສື້ອ, ກະເປົາ ຂອງນັກເດີນສຳຫລວດ ແລະ ນັກກວດກາ ແມ່ນຂັ້ນສູນກາງເປັນຜູ້ຮັບຜິດຊອບ. ສຳລັບແຂວງວຽງຈັນ ແມ່ນຈະໃຊ້ນັກເດີນສຳຫລວດ,ນັກກວດກາພາກສະໜາມ ແລະ ຜູ້ທີ່ມີປະສົບການທັງໝົດ 600 ກວ່າຄົນ ໂດຍນຳໃຊ້ອຸປະກອນທີ່ທັນສະໄໝລະບົບແທັບເລັດ ເຂົ້າໃນການເດີນສຳຫລວດພົນລະເມືອງ ແລະ ທີ່ຢູ່ອາໄສ, ຊຶ່ງຈະໄດ້ເປີດການເດີນສຳຫລວດແຕ່ວັນທີ 1 ມີນາ-21 ມີນາ 2025.

ກອງປະຊຸມຄັ້ງນີ້, ຜູ້ເຂົ້າຮ່ວມຍັງໄດ້ປະກອບຄຳຄິດຄຳເຫັນ ຢ່າງກົງໄປກົງມາ ຊອກໃຫ້ເຫັນຂໍ້ສະດວກແລະ ຂໍ້ຫຍຸ້ງຍາກຂອງການເດີນສຳຫລວດ ເພື່ອເຮັດໃຫ້ການເດີນສຳຫລວດ ມີຄວາມຖືກຕ້ອງ ແລະ ຊັດເຈນຂຶ້ນກວ່າເກົ່າ.

แชร์