ຫສນຍ ໄດ້ຮັບລົດເມໄຟຟ້າ E-Future ຈໍານວນ 6 ຄັນ ຈາກການຊ່ວຍເຫຼືອຂອງພາກທຸລະກິດ

ໃນວັນທີ 9 ກັນຍາຜ່ານມາ ທີ່ຫ້ອງວ່າການສໍານັກງານນາຍົກລັດຖະມົນຕີ (ຫສນຍ) ໄດ້ມີພິທີມອບ-ຮັບລົດເມໄຟຟ້າ ທີ່ໄດ້ຮັບການຊ່ວຍເຫຼືອຈາກພາກທຸລະກິດ ຊຶ່ງຕາງໜ້າກ່າວຮັບໂດຍແມ່ນທ່ານ ສົມກຽດ ພະສີ ຮອງລັດຖະມົນຕີ ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ ແລະກ່າວມອບໂດຍທ່ານ ມາ ຊຸຍ ໂຮ ແມເທວ (Ma shui ho Mathew) ປະທານບໍລິສັດ ລາວອາຊີ ພັດທະນາ ເສດຖະກິດ ແລະການລົງທຶນ ບ໊ອກ ຈໍາກັດ; ມີຜູ້ຕາງໜ້າຈາກກະຊວງປ້ອງກັນຄວາມສະຫງົບ, ຫ້ອງວ່າການນະຄອນຫຼວງວຽງຈັນ ແລະພະນັກງານທີ່ກ່ຽວຂ້ອງເຂົ້າຮ່ວມ.

ຊຶ່ງລົດເມໄຟຟ້າທີ່ໄດ້ຮັບການຊ່ວຍເຫຼືອໃນຄັ້ງນີ້ ແມ່ນລົດຍີ່ຫໍ້ E-Future, ລວມມີຈໍານວນ 6 ຄັນ, ໂດຍແມ່ນ ບໍລິສັດ ລາວອາຊີ ພັດທະນາເສດຖະກິດ ແລະການລົງທຶນບ໋ອກ ຈໍາກັດ ແລະບໍລິສັດ ຈຽງຊູເຟີງຊວນ ເຕັກໂນໂລຊີ ພາວເວີ້ພະລັງງານໃໝ່ ຈຳກັດ ນຳມາມອບໃຫ້ຫ້ອງວ່າການສຳນັກງານນາຍົກລັດຖະມົນຕີ, ກະຊວງປ້ອງກັນຄວາມສະຫງົບ ແລະ ຫ້ອງວ່າການນະຄອນຫຼວງວຽງຈັນ ພາກສ່ວນລະ 2 ຄັນ ເພື່ອນຳໃຊ້ເຂົ້າໃນວຽກງານການເປັນປະທານກອງປະຊຸມສຸດຍອດອາຊຽນ ທີ່ ສປປ ລາວ ໄດ້ຮັບກຽດເປັນເຈົ້າພາບ ໃນປີ 2024 ແລະວຽກງານບໍລິຫານຂອງລັດເວົ້າລວມ, ເວົ້າສະເພາະກໍແມ່ນເຄື່ອນໄຫວຮັບໃຊ້ວຽກງານທາງລັດຖະການ ຂອງພາກສ່ວນທີ່ໄດ້ຮັບການຊ່ວຍເຫຼືອ.

ໂອກາດນີ້, ທ່ານຮອງລັດຖະມົນຕີ ຮອງຫົວໜ້າ ຫສນຍ ຕາງໜ້າຄະນະພັກ-ຄະນະນໍາ ຫສນຍ ກໍຄືພາກສ່ວນທີ່ໄດ້ຮັບລົດເມດັ່ງກ່າວໄດ້ກ່າວສະແດງຄວາມຂອບໃຈ ແລະ ຕີລາຄາສູງ ຕໍ່ການສະໜັບສະໜູນຊ່ວຍເຫຼືອຂອງບໍລິສັດ ໃນຄັ້ງນີ້ ຊຶ່ງເປັນການໃຫ້ຄວາມສຳຄັນຕໍ່ວຽກງານລວມຂອງ ສປປ ລາວ ໂດຍສະເພາະການຮັບໃຊ້ກອງປະຊຸມສຸດຍອດອາຊຽນ ທີ່ ສປປ ລາວ ໄດ້ຮັບກຽດເປັນເຈົ້າພາບ ໃນປີ 2024, ທັງສອດຄ່ອງກັບແນວທາງນະໂຍບາຍຂອງລັດຖະບານ ແຫ່ງ ສປປ ລາວ ທີ່ກຳລັງຊຸກຍູ້ສົ່ງເສີມການນຳໃຊ້ລົດໄຟຟ້າໃຫ້ຫຼາຍຂຶ້ນ, ປະກອບສ່ວນການປະຕິບັດມາດຕະການປະຢັດມັດທະຍັດດ້ວຍການຫັນມານຳໃຊ້ພະລັງງານ ທີ່ ສປປ ລາວ ມີທ່າແຮງ, ສະອາດ, ເປັນມິດຕໍ່ສິ່ງແວດລ້ອມຕາມທິດສີຂຽວ ແລະຍືນຍົງ.
ຂ່າວ ແລະພາບ: ຫສນຍ

แชร์