ເພື່ອເປັນການຊຸກຍູ້ສົ່ງເສີມໃຫ້ແກ່ບັນດາບໍລິສັດໄອທີ ຂອງ ສປປ ລາວ ໄດ້ມີໂອກາດໃນການນໍາສະເໜີແລກປ່ຽນບົດຮຽນກ່ຽວກັບຄວາມກ້າວໜ້າທາງດ້ານເຕັກໂນໂລຊີ ແລະ ນະວັດຕະກໍາຂອງ ສປປ ລາວ ໃນເວທີພາກພື້ນ, ສ້າງເງື່ອນໄຂໃຫ້ແກ່ບໍລິສັດໃນດຶງດູດການຮ່ວມມືທີ່ມີທ່າແຮງກັບບັນດາປະເທດອາຊຽນ, ເພື່ອເກັບກຳຄວາມຮູ້ ແລະ ຖອດຖອນບົດຮຽນກ່ຽວກັບເຕັກໂນໂລຊີທີ່ພົ້ນເດັ່ນ ແລະ ທ່າອ່ຽງທີ່ກ່ຽວຂ້ອງກັບຕະຫຼາດ ສປປ ລາວ ຊຸກຍູ້ສົ່ງເສີມວິໄສທັດ ສປປ ລາວ ໃຫ້ເປັນສູນກາງທາງດ້ານເຕັກໂນໂລຊີ ແລະ ນະວັດຕະກໍາທີ່ເຕີບໃຫຍ່ຂະຫຍາຍຕົວພາຍໃນພາກພື້ນອາຊຽນ. ເມື່ອບໍ່ດົນມານີ້, ກົມເຕັກໂນໂລໂຊີດິຈິຕອນ, ກະຊວງເຕັກໂນໂລຊີ ແລະ ການສື່ສານ ໄດ້ນຳພາບັນດາບໍລິສັດຜູ້ປະກອບການທີ່ດຳເນີນທຸລະກິດກ່ຽວກັບເຕັກໂນໂລຊີ ຈຳນວນ 10 ບໍລິສັດ ຄື: ບໍລິສັດ Prepath, Pano Construction and Electrical Installation Sole Co., Ltd, SVLF Sole Company Limited, 4B Co., LTD, Smart Technology, Mekong Digital, Vendee X, 64 Bit, Anouvong Marketing ແລະ JB Design ທີ່ໄດ້ຮັບການຄັດເລືອກ ຜ່ານການລົງທະບຽນອອນລາຍ ແລະ ການສໍາພາດຕົວຈິງ ເພື່ອເລືຶອກເຟັ້ນເອົາບໍລິສັດທີ່ຖືກຕາມເງື່ອນໄຂ ໂດຍຜ່ານອົງການ UNIDO ITPO ພາຍໃຕ້ໂຄງການສະໜັບສະໜູນສ້າງສວນອຸທິຍານດິຈິຕ໋ອນ ແລະ ຝຶກອົບຮົມຊ່ຽວຊານໄອທີ ຂອງ ສປປ ລາວ ເຂົ້າຮ່ວມງານວາງສະແດງ InnoEx 2024 ໄດ້ຈັດຂຶ້ນຢູ່ນະຄອນໂຮ່ຈີມິນ, ສສ. ຫວຽດນາມ ຊຶ່ງງານດັ່ງກ່າວແມ່ນເຫດການອັນໜຶ່ງທີ່ສະແດງໃຫ້ເຫັນເຖິງການປະດິດສ້າງເຕັກໂນໂລຢີໃໝ່ລ່າສຸດໃນທົ່ວພາກພື້ນອາຊຽນ, ເປັນງານວາງສະແດງທີ່ເຕົ້າຮ່ວມເອົາ ຜູ້ຊ່ຽວຊານທາງດ້ານນະວັດຕະກຳ, ບໍລິສັດ startup ແລະ ບັນດາບໍລິສັດເຕັກໂນໂລຊີ ກວ່າ 100 ບໍລິສັດ ເພື່ອຈັດສະແດງຜະລິດຕະພັນ ແລະ ບໍລິການທີ່ທັນສະໄໝ ໂດຍສະເພາະແມ່ນການນໍາໃຊ້ລະບົບ AI, Blockchain, IoT ແລະ ການເງີນດິຈິຕອນ. ນອກຈາກນັ້ນ, ພາຍໃນງານດັ່ງກ່າວຍັງມີເວທີການນຳສະເໜີ, ຫົວຂໍສົນທະນາ ແລະ ການແຂ່ງຂັນຂອງບັນດາບໍລິສັດທີ່ເຂົ້າຮ່ວມອີກດ້ວຍ.