ລາວຟອດຊີຕີ ສາຂາພະຂາວເປີດໃຫ້ບໍລິການແລ້ວ

ບໍລິສັດລາວຟອດຊີຕີ ຊຶ່ງເປັນຕົວແທນຜູ້ຈັດຈຳໜ່າຍຜະລິດຕະພັນລົດຟອດຢ່າງເປັນທາງການໃນປະເທດລາວໄດ້ຂະຫຍາຍການບໍລິການເພີ່ມເພື່ອຕອບສະໜອງຄວາມຮຽກຮ້ອງຕ້ອງການຂອງກຸ່ມລູກຄ້າໄດ້ຢ່າງພຽງພໍ.

ພິທີເປີດຫ້ອງຂາຍໃໝ່ ລາວຟອດຊີຕີ ສາຂາພະຂາວ ເມືອງໄຊທານີ ນະຄອນຫລວງວຽງຈັນ ໄດ້ຈັດຂຶ້ນໃນວັນທີ 6 ກັນຍາ 2024, ໃຫ້ກຽດ ເຂົ້າຮ່ວມມີທ່ານ ທະນົງສິນ ກັນລະຍາ ຮອງປະທານສະພາການຄ້າ ແລະ ອຸດສາຫະກຳແຫ່ງຊາດລາວ, ທ່ານ ຄຣິສຕຽນ ວິດແມນ ຮອງປະທານກຸ່ມບໍລິສັດ RMA, ທ່ານ ບີຈູ່ ນາລາຍານານ ຜູ້ອຳນວຍການບໍລິຫານກຸ່ມບໍລິສັດລົດຍົນ RMA Laos ແລະທ່ານ ວິລາພັນ ບຣາລີ ຜູ້ຈັດການຝ່າຍການຕະຫລາດ ແລະພັດທະນາສາຍສຳພັນ ແລະ ພາກສ່ວນກ່ຽວຂ້ອງເຂົ້າຮ່ວມ.

ການເປີດຫ້ອງຂາຍສາຂາພະຂາວໃນຄັ້ງນີ້, ບໍ່ພຽງແຕ່ເປັນສູນກາງການຂາຍເທົ່ານັ້ນແຕ່ຍັງເປັນການເປີດປະຕູ ເພື່ອໃຫ້ການບໍລິການເຂດເມືອງໄຊທານີ ແລະເມືອງອື່ນໆ ໃນຂອບເຂດ ທົ່ວປະເທດ ກໍຄື ລູກຄ້າ ທຸກຄົນສາມາດ ເຂົ້າເຖິງການບໍລິການຂອງບໍລິສັດລາວຟອດຊີຕີ ໄດ້ຢ່າງທົ່ວເຖິງ. ພ້ອມນີ້, ພາຍໃນງານຍັງໄດ້ນຳເອົາລົດຍີ່ຫໍ້ຟອດ ທຸກລຸ້ນມາວາງສະແດງ ເພື່ອໃຫ້ແຂກໄດ້ເບິ່ງໄດ້ຊົມ ແລະເລືອກຊື້ໄດ້ຕາມໃຈມັກ.

ບໍລິສັດ ລາວຟອດຊີຕີ ແມ່ນໜຶ່ງບໍລິສັດຈັດຈຳໜ່າຍລົດຊັ້ນນຳຂອງໂລກທີ່ມີຄຸນນະພາບ, ພາຍໃຕ້ຄວາມສຳເລັດນີ້, ແມ່ນໄດ້ມາຈາກການຊີ້ນຳ ແລະບໍລິຫານ ໂດຍບໍລິສັດລະດັບສາກົນ ນັ້ນກໍຄືບໍລິສັດ RMA ຕັ້ງແຕ່ປີ 1994 ເປັນຕົ້ນມາ RMA ໄດ້ເລີ່ມເຂົ້າມາສູ່ປະເທດລາວ ແລະ ກາຍເປັນຜູ້ນຳໃນຂະແໜງການຕ່າງໆບໍ່ວ່າຈະເປັນລົດຍົນ, ການກະສິກຳ ແລະພື້ນຖານໂຄງລ່າງ. ບໍລິສັດລາວຟອດຊີຕີເລີ່ມສ້າງຕັ້ງຂຶ້ນໃນ ປີ 2004 ໄດ້ເລີ່ມນໍາເຂົ້າຜະລິດຕະພັນລົດຟອດຢ່າງເປັນທາງການ.

แชร์