ສະມາຄົມນັກທຸລະກິດໜຸ່ມຈຳປາສັກ ດໍາເນີນກອງປະຊຸມໃຫຍ່ ຄັ້ງທີ II

ກອງປະຊຸມໃຫຍ່ຄັ້ງທີ II ສະມາຄົມນັກທຸລະກິດໜຸ່ມ(ສທໜ) ແຂວງຈຳປາສັກ ຈັດຂຶ້ນໃນວັນທີ 6 ກັນຍາ 2024 ເພື່ອສະຫລຸບຕີລາຄາຄືນຢ່າງຮອບດ້ານ ແລະ ເລິກເຊິ່ງໃນການຈັດຕັ້ງປະຕິບັດວຽກງານໃນຊຸມປີຜ່ານມາ (2020-2024) ແລະ ວາງທິດທາງແຜນການ ແຕ່ປີ 2024-2029 ແລະພ້ອມກັນໃຊ້ສິດປະຊາທິປະໄຕ ປ່ອນບັດ ເລືອກຕັ້ງເອົາຄະນະບໍລິຫານງານສະມາຄົມນັກທຸລະກິດໜຸ່ມ ແຂວງຈຳປາສັກ ສະໄໝທີ II ໂດຍມີ ທ່ານ ອາລຸນໄຊ ສູນນະລາດ ເຈົ້າແຂວງຈໍາປາສັກ, ທ່ານ ຄໍາສີ ຫລິນສະຫວາດ ເລຂາຄະນະບໍລິຫານງານຊາວໜຸ່ມແຂວງຈໍາປາສັກ, ທ່ານນາງ ສຸວະລີ ຄໍາຜຸຍ ວ່າການແທນປະທານສະມາຄົມນັກທຸລະກິດໜຸ່ມແຫ່ງຊາດລາວ ແລະ ພາກສ່ວນກ່ຽວຂ້ອງ ເຂົ້າຮ່ວມ. ກອງປະຊຸມຄັ້ງປະຖົມມະລືກໄດ້ເລືອກເອົາ ທ່ານ ນາງ ບຸນເຮືອງ ແຄຣໍ ລິດດັງ ເປັນປະທານສະມາຄົມ, ທ່ານ ບຸນເຫລື່ອ ມ້າວຄໍາຜິວ ເປັນປະທານກວດກາ, ມີຮອງປະທານ 12 ທ່ານ ແລະ ຄະນະອີກ 16 ທ່ານ.

ທ່ານ ນາງ ບຸນເຮືອງ ແຄຣໍ ລິດດັງ ປະທານສະມາຄົມນັກທຸລະກິດໜຸ່ມແຂວງຈຳປາສັກ ໄດ້ໃຫ້ຮູ້ວ່າ: ໄລ ຍະ 5 ປີ ຜ່ານມາ ສະມາຄົມນັກທຸລະກິດໜຸ່ມແຂວງຈຳປາສັກ ໄດ້ຖືເອົາວຽກງານການເຄື່ອນໄຫວຂອງທຸລະກິດເປັນໃຈກາງ ເພື່ອດໍາເນີນທຸລະກິດໃຫ້ຖືກຕ້ອງຕາມລະບຽບການ ເຕົ້າໂຮມຄວາມສາມັກຄີໃນໝູ່ຄະນະ ແລະ ສະມາ ຊິກສະມາຄົມທຸລະກິດໜຸ່ມ ໄດ້ມີການໂຄສະນາສຶກສາອົບຮົມ, ປະສານສົມທົບແໜ້ນກັບຊາວໜຸ່ມແຂວງ, ຈັດຕັ້ງການ ເຄື່ອນໄຫວຕາມພາລະບົດບາດ, ສິດໜ້າທີ່ຂອງສະມາຄົມທຸລະກິດໜຸ່ມ ເພື່ອເປັນການຊຸກຍູ້ສົ່ງເສີມ ບັນດາຜູ້ປະກອບການ, ຜູ້ລົງທຶນຫົວໜ່ວຍທຸລະກິດທົ່ວແຂວງ ໂດຍໄດ້ຖືເອົາວຽກງານແນວຄິດ-ການເມືອງເປັນບັນຫາສໍາຄັນ ເພື່ອເຊື່ອມຊຶມຜັນຂະຫຍາຍໃຫ້ແກ່ຄະນະ ແລະບັນດາສະມາຊິກຂອງ ສທໜ ຢ່າງເປັນເຈົ້າການດ້ວຍຫລາຍຮູບ, ຫລາຍວິທີ ແລະ ເງື່ອນໄຂຕົວຈິງ, ພ້ອມທັງໄດ້ເຂົ້າຮ່ວມກິດຈະກໍາທີ່ຄະນະບໍລິຫານງານຊາວໜຸ່ມແຂວງຈັດ ຂຶ້ນ ແນໃສ່ເຮັດໃຫ້ເຂົາເຈົ້າມີຄວາມຮັບຮູ້ ແລະ ເຂົ້າໃຈຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ມີນໍ້າໃຈສັດຊື່ບໍລິສຸດ, ມີຄວາມຈົ່ງຮັກພັກດີຕໍ່ອົງກອນ, ມີຄວາມກະຕືລືລົ້ນຕໍ່ໜ້າທີ່ຮັບຜິດຊອບທີ່ຖືກມອບໝາຍ, ການເຕົ້າໂຮມຄວາມສາມັກຄີໃນສະມາຊິກ ເຫັນໄດ້ວ່າມີຄວາມໜັກແໜ້ນເຂັ້ມແຂງ, ມີການຊ່ວຍເຫລືອເຊິ່ງກັນ ແລະກັນ. ພ້ອມນີ້, ສະມາຄົມນັກທຸລະກິດໜຸ່ມ ພວກເຮົາຍັງໄດ້ປະກອບສ່ວນໃຫ້ການຊ່ວຍເຫລືອສັງຄົມ ກໍຄື ພາຍໃນແຂວງຈໍາປາສັກ ລວມມູນຄ່າປະມານ 330 ລ້ານກວ່າກີບ ແລະ ອື່ນໆ.

ໂອກາດນີ້, ທ່ານ ອາລຸນໄຊ ສູນນະລາດ ເຈົ້າແຂວງຈໍາປາສັກ ໄດ້ມີຄຳເຫັນໂອ້ລົມຕໍ່ກອງປະຊຸມໂດຍທ່ານໄດ້ເນັ້ນ ໃຫ້ຄະນະສະມາຄົມນັກທຸລະກິດໜຸ່ມແຂວງຊຸດໃໝ່ນີ້, ເພີ່ມທະວີຄວາມເຂົ້າໃຈ, ການເມືອງແນວຄິດເພື່ອເປັນເຂັມຊີທິດເຍືອງທາງຄວາມສາມັກຄີ ແລະ ການປະຕິບັດວຽກງານການດໍາເນີນທຸລະກິດຂອງຕົນໃຫ້ມີຜົນສໍາເລັດເປັນກ້າວໆ, ພ້ອມທັງ ສ້າງບຸກຄະລະກອນໃຫ້ມີຄວາມເຂັ້ມແຂງເປັນຜູ້ສືບຖອດໃນການບໍລິຫານທຸລະກິດໃຫ້ໄດ້ 3 ລັກສະນະຄື: ລັກສະນະທາງການເມືອງ, ລັກສະນະທາງສັງຄົມ ແລະລັກສະນະທາງທຸລະກິດເຊິ່ງສະແດງອອກໃນການໃຫ້ຄວາມໃກ້ສິດຕິດແທດ ແລະສ້າງເງື່ອນໄຂເອື້ອອໍານວຍເຮັດໃຫ້ນັກທຸລະກິດໜຸ່ມ ໄດ້ມີໂອກາດໃນການເຄື່ອນໄຫວວຽກງານຂອງຕົນຢ່າງສະດວກ ແລະເປັນໄປຕາມລະບຽບກົດໝາຍຢ່າງຖືກຕ້ອງ.

ໃນໂອກາດດຽວກັນ, ກໍໄດ້ມອບໃບຍ້ອງຍໍຂອງທ່ານເຈົ້າແຂວງຈໍາປາສັກ ໃຫ້ບັນດາສະມະຊິກຜູ້ທີ່ມີຜົນງານ ແລະປະສ່ວນຊ່ວຍເຫລືອສັງຄົມໃນໄລຍະຜ່ານມາ. ພ້ອມທັງມອບໂລ້ລາງວັນນັກທຸລະກິດໜຸ່ມດີເດັ່ນແຂວງຈໍາປາສັກ ແລະ ໃບກຽດຕິຄຸນຂອງ ສະມາຄົມນັກທຸລະກິດໜຸ່ມ ແຂວງຈຳປາສັກຕື່ມອີກ.
ຂ່າວ-ພາບ: ວີລະວັນ

แชร์