ຫົວໜ່ວຍທຸລະກິດຈາກ ສປປ ລາວ ເຂົ້າຮ່ວມງານວາງສະແດງເຕັກໂນໂລຊີດ້ານເງິນ ທີ່ ສ.ເກົາຫຼີ

ທ້າຍອາທິດຜ່ານມານີ້, ກົມເຕັກໂນໂລຊີດິຕອນ, ກະຊວງເຕັກໂນໂລຊີ ແລະການສື່ສານ ໄດ້ນຳພາຄະນະຜູ້ປະກອບການທີ່ດຳເນີນທຸລະກິດກ່ຽວກັບເຕັກໂນໂລຊີທາງດ້ານການເງິນ ຈຳນວນ 10 ບໍລິສັດ ຄື: KPV Gold, Loca payment, Bitqik, ETL, TPlus, Count one, Lailaolab, Synergy, Infotech ແລະ ສະຖາບັນການເງິນພັດທະນາ ໄຊສົມບູນ ທີ່ໄດ້ຮັບການຄັດເລືອກ ໂດຍຜ່ານອົງການ UNIDO ITPO ພາຍໃຕ້ໂຄງການສະໜັບສະໜູນສ້າງສວນອຸທິຍານດິຈິຕ໋ອນ ແລະ ຝຶກອົບຮົມຊ່ຽວຊານໄອທີ ຂອງ ສປປ ລາວ ໄດ້ເດີນທາງໄປເຂົ້າຮ່ວມງານວາງສະແດງເຕັກໂນໂລຊີດ້ານເງີນ ປະຈຳປີ 2024(Korea Fintech Week 2024) ທີ່ຫໍວາງສະແດງ Dongdaemun Design Plaza(DDP), ນະຄອນຫຼວງ ໂຊ(Seoul), ປະເທດ ສ. ເກົາຫຼີ ໃນລະຫວ່າງວັນທີ 26-29 ສິງຫາ 2024 ຜ່ານມາ.

ຊຶ່ງຈຸດປະສົງຂອງງານວາງສະແດງດັ່ງກ່າວແມ່ນເພື່ອໂຄສະນາຊຸກຍູ້ສົ່ງເສີມການດຳເນີນທຸລະກິດດ້ານເຕັກໂນໂລຊີການເງິນຂອງບັນດາຫົວໜ່ວຍທຸລະກິດພາຍໃນປະເທດ ສ.ເກົາຫຼີ ແລະ ຕ່າງປະເທດ ພ້ອມທັງເປັນການດຶງດູດນັກລົງທຶນກ່ຽວກັບການພັດທະນາອຸດສາຫະກຳທາງດ້ານການເງິນໃຫ້ຫຼາຍຂຶ້ນກວ່າເກົ່າ ຊຶ່ງງານວາງສະແດງເຕັກໂນໂລຊີດ້ານການເງິນ ປະຈຳປີ 2024 ນີ້ ໄດ້ດຳເນີນພາຍໃຕ້ຫົວຂໍ້: “Beyond Boundaries: Fintech ແລະ AI Redefining Finance” ທີ່ໄດ້ເນັ້ນໃຫ້ເຫັນການນຳໃຊ້ AI ເຂົ້າມາມີບົດບາດສຳຄັນໃນຂະແໜງການຕ່າງໆ ຊຶ່ງລວມທັງຂະແໜງການ Fintech ແລະ ການເງິນ ໂດຍສະເພາະແມ່ນ ການບໍລິການຊຳລະສະສາງ ໃຫ້ມີຄວາມສະດວກ, ສະບາຍ, ວ່ອງໄວ ແລະ ທັນສະໄໝ ຊຶ່ງ AI ຖືເປັນກຸນແຈສຳຄັນໃນການນຳໃຊ້ເປັນເຄື່ອງມືເພື່ອສົ່ງເສີມການນຳໃຊ້ເຕັກໂນໂລຊີ ແລະ ນະວັດຕະກຳຕ່າງໆ ໃນຍຸກປັດຈຸບັນ. ຊຶ່ງພາຍໃນງານໄດ້ມີບູດວາງສະແດງຫຼາຍກວ່າ 80 ບູດ ເຊັ່ນ: Kakaobank, KB Finance Group, Hanna Financial Group, Woori Bank ແລະ ອື່ນໆ.

ນອກຈາກນັ້ນ, ຄະນະທີ່ເດີນທາງຄັ້ງນີ້ຍັງໄດ້ມີໂອກາດເຂົ້າຮ່ວມທັດສະນະສຶກສາ ແລະແລກບົດຮຽນຢູ່ສະຖານທີ່ຕ່າງໆເຊັ່ນ: ຕະຫຼາດຫຼັກຊັບ ສ.ເກົາຫຼີ KRX (Korea Exchange), KB Innovation HUB , Dream Plus ແລະKakaoBank ທັງນີ້ກໍເພື່ອເປັນການຊຸກຍູ້ສົ່ງເສີມໃຫ້ບັນດາຫົວໜ່ວຍທຸລະກິດ ຂອງ ສປປ ລາວ ໄດ້ມີໂອກາດເຂົ້າໄປຮ່ວມພົບປະ, ແລກປ່ຽນຖອດຖອນບົດຮຽນ ແລະເພື່ອສ້າງເງື່ອນຂະຫຍາຍຫາຄູ່ຮວມມືໃນອະນາຄົດ.

แชร์