ລັດຖະມົນຕີ ກະຊວງການເງິນ ເນັ້ນແຂວງເຊກອງ ຄຸ້ມຄອງລາຍຈ່າຍໃຫ້ເຂັ້ມງວດ

ໃນໂອກາດພົບປະໂອ້ລົມ ພະນັກງານ-ລັດຖະກອນ ພະແນກການເງິນແຂວງເຊກອງ ໃນວັນທີ 5 ກັນຍາ 2024 ຜ່ານມາ, ທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ ໄດ້ຊີ້ນໍາໃຫ້ຂະແໜງດັ່ງກ່າວ ສືບຕໍ່ປະຕິບັດແຜນງົບປະມານແຫ່ງລັດ ປະຈໍາປີ 2024, ຈັດເກັບລາຍຮັບຕາມຖານທີ່ມີໃຫ້ຄົບຖ້ວນ ແລະ ເອົາໃຈໃສ່ຄຸ້ມຄອງລາຍຈ່າຍງົບປະມານໃຫ້ເຂັ້ມງວດ-ຖືກຕາມລະລຽບກົດໝາຍ; ປະຕິບັດມາດຕະການປະຢັດ-ຕ້ານການຟູມເຟືອຍ, ຖືເອົາການເບີກຈ່າຍເງິນເດືອນ-ເງິນອຸດໜູນໃຫ້ພະນັກງານ-ລັດຖະກອນ ແລະ ລາຍຈ່າຍຮັບໃຊ້ການເຄື່ອນໄຫວວຽກງານ ຂອງອົງການຈັດຕັ້ງພັກ-ລັດ ເປັນບູລິມະສິດສໍາຄັນ; ຕ້ານ ແລະ ແກ້ໄຂບັນດາຂໍ້ຄົງຄ້າງ ຕາມຄໍາເຫັນຂອງອົງການກວດສອບແຫ່ງລັດ ໃຫ້ສໍາເລັດຂາດຕົວ.

ພ້ອມກັນນີ້, ກໍ່ສືບຕໍ່ບຸກບືນ ແລະສູ້ຊົນຈັດເກັບລາຍຮັບເຂົ້າງົບປະມານໃນໄລຍະ 4 ເດືອນທ້າຍປີ 2024 ໃຫ້ບັນລຸແຜນ ຫຼື ລື່ນແຜນການທີ່ວາງໄວ້; ແກ້ໄຂການຮົ່ວໄຫຼຂອງງົບປະມານໃຫ້ທັນການ, ສະກັດກັ້ນການລັກລອບນໍາເຂົ້າ, ການຄ້າ-ຂາຍເຖື່ອນ ແລະ ແກ້ໄຂການນໍາເຂົ້າພາຫະນະທີ່ບໍ່ຖືກຕ້ອງໃຫ້ຂາດຕົວ; ຄຸ້ມຄອງຖານລາຍຮັບທີ່ມີໃຫ້ເຂັ້ມແຂງ ແລະ ໝັ້ນຄົງ; ຂະຫຍາຍຖານອາກອນມູນຄ່າເພີ່ມ, ຫັນການເກັບລາຍຮັບ ໄປສູ່ລະບົບທັນສະໄໝ, ຕິດຕັ້ງໂປຼແກມບັນຊີເຊື່ອມກັບລະບົບ TaxRis ແລະຊຸກຍູ້ຫົວໜ່ວຍທຸລະກິດ ແຈ້ງມອບພັນທະອາກອນຕ່າງໆ ຜ່ານລະບົບທະນາຄານ; ຈັດຕັ້ງປະຕິບັດການລວມສູນລາຍຮັບງົບປະມານແຫ່ງລັດໃຫ້ເປັນເອກະພາບຢູ່ບັນຊີລວມສູນຄັງເງິນ;ສຸມໃສ່ແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ, ຍົກສູງພາລະບົດບາດ ຂອງຂະແໜງການເງິນ ຢືນຢູ່ແຖວໜ້າໃນການຕັດສິນບັນຫາ ທີ່ຕິດພັນກັບຜົນປະໂຫຍດທາງດ້ານເສດຖະກິດ-ການເງິນ; ເອົາໃຈໃສ່ຄົ້ນຄວ້າເຊື່ອມຊຶມ ແລະ ຜັນຂະຫຍາຍມະຕິ 04/ກມສພ ວ່າດ້ວຍການສ້າງເສດຖະກິດ ເອກະລາດ ເປັນເຈົ້າຕົນເອງ ໃນໄລຍະໃໝ່ຕາມ 4 ໜ້າທີ່ຕົ້ນຕໍ ແລະ 5 ຄວາມເປັນເຈົ້າການຂອງຂະແໜງການເງິນໃຫ້ປະກົດຜົນເປັນຈິງ.

ໂອກາດນີ້, ທ່ານ ຄໍາຮູ້ ອ່ອນມະນີ ຫົວໜ້າພະແນກການເງິນແຂວງເຊກອງ ໄດ້ລາຍງານວ່າ: ໃນໄລຍະ 8 ເດືອນ (ເດືອນ 1-8) ປີ 2024 ແຂວງເຊກອງ ສາມາດຈັດເກັບລາຍຮັບເຂົ້າງົບປະມານໄດ້ 318.96 ຕື້ກີບ ທຽບໃສ່ແຜນປີເທົ່າກັບ 106.88% (ແຜນ 298.42 ຕື້ກີບ). ໃນນີ້, ລາຍຮັບພູດສູນກາງເກັບໄດ້ 72.27 ຕື້ກີບ ທຽບໃສ່ແຜນປີເທົ່າກັບ 93.77% ແລະ ລາຍຮັບພູດຂອງແຂວງເກັບໄດ້ 246.69 ຕື້ກີບ ທຽບໃສ່ແຜນປີເທົ່າກັບ 111.45%. ສ່ວນລາຍຈ່າຍປະຕິບັດໄດ້ 276.91 ຕື້ກີບ ທຽບໃສ່ແຜນປີເທົ່າກັບ 70.25% ໂດຍລວມແລ້ວ, ພະແນກການເງິນແຂວງສາມາດຮັບປະກັນການເບີກຈ່າຍເງິນເດືອນ, ເງິນນະໂຍບາຍ-ເງິນອຸດໜູນຕ່າງໆ ໃຫ້ພະນັກງານ-ລັດຖະກອນທັນຕາມກໍານົດເວລາໃນແຕ່ລະເດືອນ ພ້ອມທັງຮັບປະກັນການອະນຸມັດລາຍຈ່າຍງົບປະມານໄດ້ມີການກວດກາຢ່າງເຂັ້ມງວດ ແລະ ນໍາໃຊ້ຖືກເປົ້າໝາຍ.
---
ຂ່າວ-ພາບ: ສັນຍາ

แชร์