ວ່າທີ່ປະທານາທິບໍດີ ອິນໂດເນເຊຍຢ້ຽມຢາມເຮັດວຽກ ຢູ່ ສປປ ລາວ

ທ່ານ ພຣາໂບໂວ ສຸບຽນໂຕ ວ່າທີ່ປະທານາທິບໍດີ ແຫ່ງ ສາທາລະນະລັດ ອິນໂດເນເຊຍ ພ້ອມດ້ວຍຄະນະ ໄດ້ເດີນທາງມາເຖິງສະໜາມບິນສາກົນວັດໄຕ, ນະຄອນຫລວງວຽງຈັນ, ສປປ ລາວ ໃນຕອນແລງຂອງວັນທີ 5 ກັນຍາ 2024, ໂດຍມີທ່ານ ນາງ ເຂັມມະນີ ພົນເສນາ ຫົວໜ້າຫ້ອງວ່າການສໍານັກງານປະທານປະເທດ ແຫ່ງ ສປປ ລາວ ພ້ອມດ້ວຍຄະນະ ໃຫ້ການຕ້ອນຮັບຢ່າງອົບອຸ່ນ ແລະ ສົມກຽດ.

ການຢ້ຽມຢາມ ສປປ ລາວ ຂອງ ທ່ານ ພຣາໂບໂວ ສຸບຽນໂຕ ວ່າທີ່ປະທານາທິບໍດີ ແຫ່ງ ສອິນໂດເນເຊຍ ໃນຄັ້ງນີ້, ແມ່ນເພື່ອແນະນໍາຕົວກ່ອນການເຂົ້າຮ່ວມພິທີສາບານຕົນເປັນ ປະທານາທິບໍດີ ແຫ່ງ ສ ອິນໂດເນເຊຍ ຢ່າງເປັນທາງການ ໃນວັນທີ 22 ຕຸລາ 2024 ທີ່ຈະມາເຖິງນີ້ ແລະ ຍັງເປັນການຮັດແໜ້ນສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປ ລາວ ແລະ ສ ອິນໂດເນ ເຊຍ ທີ່ມີມາແຕ່ດົນນານຫລາຍກວ່າ 6 ທົດສະວັດ, ລວມທັງການຮ່ວມມືເພື່ອການພັດທະນາຂອງຄອບຄົວອາຊຽນ ກໍຄື ໃນພາກພື້ນ ແລະ ສາກົນ.
ທ່ານ ພຣາໂບໂວ ສຸບຽນໂຕ ວ່າທີ່ປະທານາທິບໍດີ ແຫ່ງ ສ ອິນໂດເນເຊຍ ຈະຢ້ຽມຢາມເຮັດວຽກ ຢູ່ ສປປ ລາວ ໃນລະຫວ່າງວັນທີ 5-6 ກັນຍາ 2024 ໂດຍຈະເຂົ້າຢ້ຽມຂໍ່ານັບ ທ່ານ ທອງລຸນ ສີສຸລິດ ປະທານປະເທດ ແລະ ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ.
ພາບ: ເກດສະໜາ

แชร์