ສປປ ລາວ ກຽມຈັດກອງປະຊຸມ ລັດຖະມົນຕີພະລັງງານອາຊຽນ ຄັ້ງທີ 42

ສປປ ລາວ ຈະເປັນເຈົ້າພາບຈັດກອງປະຊຸມລັດຖະມົນຕີພະລັງງານອາຊຽນຄັ້ງທີ 42 ໃນລະຫວ່າງວັນທີ 24-27 ກັນຍາ 2024 ຢູ່ຫໍປະຊຸມແຫ່ງຊາດ, ນະຄອນຫຼວງວຽງຈັນ. ປັດຈຸບັນການກະກຽມຄວາມພ້ອມດ້ານຕ່າງໆ ເພື່ອຮອງຮັບການເປັນເຈົ້າພາບຈັດກອງປະຊຸມຄັ້ງນີ້ແມ່ນພ້ອມແລ້ວ 100%.

ທ່ານ ໂພໄຊ ໄຊຍະສອນ ລັດຖະມົນຕີກະຊວງພະລັງງານ ແລະບໍ່ແຮ່,ໄດ້ຕາງໜ້າລັດຖະບານ ແຫ່ງ ສປປ ລາວ ກໍຄືໃນນາມລັດຖະມົນຕີກະຊວງພະລັງງານ ແລະ ບໍ່ແຮ່, ປະທານກອງປະຊຸມລັດຖະມົນຕີພະລັງງານອາຊຽນ ຄັ້ງທີ 42 ຖະແຫລງຂ່າວຕໍ່ສື່ມວນຊົນຢູ່ນະຄອນຫລວງວຽງຈັນໃນວັນທີ 5 ກັນຍາ 2024 ວ່າ: ພາຍຫຼັງ ສປປ ລາວ ໄດ້ຮັບເປັນປະທານກອງປະຊຸມ ລັດຖະມົນຕີພະລັງງານອາຊຽນ ຄັ້ງທີ 42 ຢູ່ໃນກອງປະຊຸມ ລັດຖະມົນຕີພະລັງງານອາຊຽນ ຄັ້ງທີ 41 ເມື່ອປີ 2023 ຜ່ານມາ.

ກະຊວງພະລັງງານ ແລະບໍ່ແຮ່ໃນນາມເປັນຜູ້ຈັດຕັ້ງປະຕິບັດກໍ່ໄດ້ຮີບຮ້ອນຄົ້ນຄວ້າ, ສ້າງແຜນການເຄື່ອນໄຫວຢ່າງຮອບດ້ານເປັນຕົ້ນແມ່ນ: ໄດ້ແຕ່ງຕັ້ງຄະ ນະຮັບຜິດຊອບຊີ້ນຳການກະກຽມ, ຄະນະປະສານງານ ແລະວຽກງງານປິ່ນອ້ອມອື່ນໆ.

ຕະຫຼອດໄລຍະ 8 ເດືອນຜ່ານມາ, ຄະນະຮັບຜິດຊອບກະກຽມການເປັນເຈົ້າພາບກອງປະຊຸມລັດຖະມົນຕີພະລັງງານອາຊຽນ ຄັ້ງທີ 42 ຂອງ ສປປ ລາວ ໄດ້ເຄື່ອນໄຫວຢ່າງຫ້າວຫັນ ແລະ ມີຜົນສໍາເລັດຢ່າງຕັ້ງໜ້າເປັນຕົ້ນ:

1) ສຳເລັດການເປັນເຈົ້າພາບ ຈັດກອງປະຊຸມລະດັບເຈົ້າໜ້າທີ່ອາວຸໂສພະລັງງານອາຊຽນ ແລະ ກອງປະຊຸມປິ່ນອ້ອມອື່ນໆ ຈຳນວນ 2 ຄັ້ງ. ນອກຈາກນີ້, ຍັງສຳເລັດການຈັດກອງປະຊຸມໜ່ວຍງານຍ່ອຍດ້ານພະລັງງານຕື່ມອີກ.
2) ສຳເລັດການກະກຽມດ້ານສະຖານທີ່ທີ່ພັກ, ຫ້ອງປະຊຸມ, ສິ່ງອຳນວຍຄວາມສະ ດວກດ້ານຕ່າງໆ ລວມເຖິງງົບປະມານ ເພື່ອນຳໃຊ້ເຂົ້າໃນການເປັນເຈົ້າພາບຈັດກອງປະຊຸມ ລັດຖະມົນຕີ ພະລັງງານອາຊຽນຄັ້ງທີ 42.
ທ່ານໃຫ້ຮູ້ຕື່ມວ່າ: ກອງປະຊຸມລັດຖະມົນຕີ ພະລັງງານອາຊຽນຄັ້ງທີ 42 ຈະຈັດຂຶ້ນລະຫວ່າງ ວັນທີ 24-27 ກັນຍາ 2024 ຢູ່ຫໍປະຊຸມແຫ່ງຊາດ, ນະຄອນຫຼວງວຽງ ຈັນ. ມີຄະນະຜູ້ແທນຈາກ 10 ປະເທດອາຊຽນ ແລະ ຕີມໍເລດສະເຕ ໃນຖານະເປັນປະເທດສັງເກດການ. ນອກຈາກນີ້, ຍັງມີກອງເລຂາອາຊຽນ, ສູນພະລັງງານອາຊຽນ, ສູນ HAPUA, ASCOPE, ອົງການຈັດຕັ້ງສາກົນ IEA, IRENA, ADB, METI, ERIA ແລະບັນດາປະເທດຄູ່ຮ່ວມມືພັດທະນາຄື: ສປ ຈີນ, ສະຫະລັດອາເມລິກາ, ຣັດເຊຍ, ຢີ່ປຸ່ນ, ສ.ເກົາຫຼີ, ອິນເດຍ, ອົດສະຕາລີ ແລະ ນິວຊີແລນ.
ກອງປະຊຸມຄັ້ງນີ້ ຈະໄດ້ລາຍງານຜົນສຳເລັດ ການຈັດຕັ້ງປະຕິບັດທຸກບັນດາກິດ ຈະກຳພາຍໃນ APAEC ທັງໝົດ 7 ໜ້າວຽກຍ່ອຍ. ນອກຈາກນີ້, ຍັງຈະໄດ້ລາຍງານຜົນສຳເລັດ 8 ໜ້າວຽກບູລິມະສິດ ທີ່ ສປປລາວ ໃນນາມເປັນປະທານກອງປະຊຸມ ຈະເຮັດໃຫ້ສຳເລັດພາຍໃນປີ 2024 ນີ້.
ນອກຈາກ ສປປ ລາວ ຈະເປັນເຈົ້າພາບຈັດກອງປະຊຸມ ລັດຖະມົນຕີພະລັງ ງານອາຊຽນ ຄັ້ງທີ 42, ຍັງຈະໄດ້ເປັນເຈົ້າພາບຈັດງານວາງສະແດງດ້ານທຸລະກິດພະ ລັງງານອາຊຽນ ຄັ້ງທີ 24 ທີ່ຈະຈັດໄປຄູ່ຂະໜາດກັນ ໂດຍແມ່ນ ກະຊວງພະລັງງານ ແລະ ບໍ່ແຮ່ ແລະ ສູນພະລັງງານອາຊຽນ ຮ່ວມກັນຈັດຂຶ້ນ.
ໃນໂອກາດນີ້, ລັດຖະມົນຕີກະຊວງພະລັງງານ ແລະ ບໍ່ແຮ່ ໄດ້ເຊີນຊວນ ແລະ ຮຽກຮ້ອງໃຫ້ ພະນັກງານ, ທະຫານ, ຕຳຫຼວດ, ນັກຮຽນ, ນັກສຶກສາ ຕະຫຼອດຮອດປະ ຊາຊົນລາວບັນດາເຜົ່າ ໂດຍສະເພາະແມ່ນຊາວນະຄອນຫຼວງວຽງຈັນ ຈົ່ງພ້ອມກັນເປັນເຈົ້າພາບທີ່ດີ ໃນການຕ້ອນຮັບແຂກບ້ານ, ແຂກເມືອງ ທີ່ຈະເດີນທາງມາຮ່ວມກອງປະຊຸມໃນຄັ້ງນີ້ ດ້ວຍໄມຕີຈິດ, ມິດຕະພາບ ແລະ ຮອຍຍິ້ມອັນມີສະເໜ່ຂອງຄົນລາວ.

#ຂ່າວອອນລາຍ #ວສລ

แชร์