ນາຍົກ ກ່າວຄໍາເຫັນເຊີນຊວນປວງຊົນລາວບັນດາເຜົ່າ ມີສ່ວນຮ່ວມໃນການເປັນປະທານອາຊຽນ ຂອງ ສປປ ລາວ ປີ 2024

ວັນທີ 05 ກັນຍາ 2024 ນີ້, ທີ່ສໍານັກງານນາຍົກລັດຖະມົນຕີ, ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ກ່າວຄໍາເຫັນເຊີນຊວນພໍ່ແມ່ປະຊາຊົນລາວບັນດາເຜົ່າ ແລະທຸກພາກສ່ວນໃນທົ່ວປະເທດ ຮ່ວມແຮງຮ່ວມໃຈກັນເປັນເຈົ້າພາບ ແລະປະທານອາຊຽນ ຂອງ ສປປ ລາວ ໃນປີ 2024, ໂດຍສະເພາະກອງປະຊຸມສຸດຍອດ ອາຊຽນ ຄັ້ງທີ 44, 45 ແລະກອງປະຊຸມສຸດຍອດທີ່ກ່ຽວຂ້ອງອື່ນໆໃນເດືອນຕຸລາ 2024 ທີ່ຈະມາເຖິງນີ້.

ນັບແຕ່ ສປປ ລາວ ໄດ້ເຂົ້າເປັນສະມາຊິກອາຊຽນໃນວັນທີ 23 ກໍລະກົດ 1997 ເປັນຕົ້ນມາ, ສປປ ລາວ ໄດ້ ປະກອບສ່ວນເຂົ້າໃນວຽກງານອາຊຽນ ຢ່າງຫ້າວຫັນ ແລະ ໄດ້ເປັນປະທານອາຊຽນ 3 ຄັ້ງຄື: ຄັ້ງທີ 1 ໃນປີ 2004 - 2005, ຄັ້ງທີ 2 ໃນປີ 2016, ແລະ ຄັ້ງທີ 3 ໃນປີ 2024 ເຊິ່ງເລີ່ມແຕ່ວັນທີ 1 ມັງກອນ - 31 ທັນວາ 2024. ການເຂົ້າເປັນສະມາຊິກອາຊຽນ ແລະການເຄື່ອນໄຫວວຽກງານອາຊຽນ ກໍຄື ການເປັນປະທານອາຊຽນ ຂອງ ສປປ ລາວ ໄດ້ປະກອບສ່ວນສໍາຄັນເຂົ້າໃນການຍົກສູງຖານະບົດບາດຂອງ ສປປ ລາວ ໃຫ້ສູງເດັ່ນຂຶ້ນໃນເວທີພາກພື້ນ ແລະ ສາກົນ ແລະເປັນການໂຄສະນາເຜີຍແຜ່ຮີດຄອງປະເພນີອັນດີງາມຂອງຊາດລາວ ໃຫ້ຕ່າງປະເທດໄດ້ຮັບຮູ້ ພ້ອມທັງ ເປັນການດຶງດູດການສະໜັບສະໜູນ ແລະ ການຮ່ວມມື ກໍຄື ການຄ້າ-ການລົງທຶນ, ການທ່ອງທ່ຽວ ແລະ ການພັດທະນາຊັບພະຍາກອນມະນຸດ ຈາກບັນດາປະເທດອາຊຽນ ແລະ ບັນດາຄູ່ຮ່ວມມືພາຍນອກຂອງອາຊຽນ ເພື່ອສົມທົບກັບທ່າແຮງພາຍໃນ ໃນການຈັດຕັ້ງປະຕິບັດ ພາລະກິດປົກປັກຮັກສາ ແລະ ສ້າງສາພັດທະນາ ສປປ ລາວ. ການເປັນປະທານອາຊຽນ ຂອງ ສປປ ລາວໃນປີ 2024 ໄດ້ດໍາເນີນໄປພາຍໃຕ້ຄໍາຂວັນ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ”. ຄໍາຂວັນດັ່ງກ່າວແມ່ນສອດຄ່ອງກັບນະໂຍບາຍ ແລະເປົ້າໝາຍຂອງ ສປປ ລາວ ໃນການຫັນປະເທດຈາກປະເທດທີ່ບໍ່ມີຊາຍແດນຕິດກັບທະເລ ໃຫ້ເປັນສູນກາງຂອງການເຊື່ອມໂຍງ-ເຊື່ອມຈອດ ຂອງພາກພື້ນ ແລະທັງສອດຄ່ອງກັບເປົ້າໝາຍລວມຂອງອາຊຽນໃນການສ້າງອາຊຽນ ໃຫ້ເປັນພາກພື້ນທີ່ມີການເຊື່ອມໂຍງ-ເຊື່ອມຈອດ ແລະມີຄວາມເຂັ້ມແຂງເພື່ອສາມາດຮັບມືກັບສິ່ງທ້າທາຍຕ່າງໆໄດ້ຢ່າງມີປະສິດທິພາບ ແລະທັນການ ໃນທ່າມກາງສະພາບການຂອງພາກພື້ນ ແລະ ຂອງໂລກທີ່ພວມຜັນແປໄປຢ່າງໄວວາ ແລະ ສະຫຼັບສັບຊ້ອນ. ການເປັນປະທານອາຊຽນຂອງ ສປປ ລາວ ໃນໄລຍະ 8 ເດືອນທີ່ຜ່ານມາໄດ້ຮັບຜົນສໍາເລັດຢ່າງເປັນກ້າວໆມາ. ບັນດາກະຊວງຂະແໜງການຂອງ ສປປ ລາວ ພາຍໃຕ້ 3 ເສົາຄໍ້າປະຊາຄົມອາຊຽນ ໄດ້ສໍາເລັດການເປັນເຈົ້າພາບ ແລະ ປະທານກອງປະຊຸມອາຊຽນໃນລະດັບຕ່າງໆພາຍໃຕ້ຄວາມຮັບຜິດຊອບຂອງຕົນຢ່າງມີຜົນສໍາເລັດ, ລວມທັງກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ແລະ ບັນດາກອງປະຊຸມລະດັບລັດຖະມົນຕີຕ່າງປະເທດ ທີ່ກ່ຽວຂ້ອງ ເຊິ່ງຈັດຂຶ້ນໃນ ວັນທີ 24-27 ກໍລະກົດ 2024 ທີ່ ນະຄອນຫຼວງວຽງຈັນ. ຜົນສໍາເລັດດັ່ງກ່າວແມ່ນໝາກຜົນລວມຂອງບັນດາກະຊວງຂະແໜງການ ແລະ ການປະກອບສ່ວນຂອງທຸກພາກສ່ວນ ລວມທັງ ພໍ່ແມ່ພີ່ນ້ອງປະຊາຊົນລາວບັນດາເຜົ່າ, ພະນັກງານ, ທະຫານ, ຕຳຫຼວດ ແລະ ພາກທຸລະກິດ. ຂ້າພະເຈົ້າຂໍຖືໂອກາດນີ້ສະແດງຄວາມຊົມເຊີຍຢ່າງຈິງໃຈຕໍ່ທຸກການປະກອບສ່ວນ ກໍຄືຜົນສໍາເລັດດັ່ງກ່າວ ໃນໄລຍະຜ່ານມາ ແລະພວກເຮົາຈະສືບຕໍ່ເປັນເຈົ້າພາບ ແລະປະທານກອງປະຊຸມຕ່າງໆ ຂອງອາຊຽນແຕ່ນີ້ຫາທ້າຍປີ 2024 ໃຫ້ສໍາເລັດຜົນຕາມຄາດໝາຍ.

ບັນດາທ່ານ, ພໍ່ແມ່ພີ່ນ້ອງທີ່ຮັກແພງ, ສິ່ງສໍາຄັນທີ່ສຸດ ສປປ ລາວ ພວກເຮົາຈະໄດ້ເປັນເຈົ້າພາບ ແລະປະທານກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ ໃນລະຫວ່າງວັນທີ 8-11 ຕຸລາ 2024 ທີ່ ນະຄອນຫລວງວຽງຈັນ ເຊິ່ງຈະມີບັນດາປະມຸກລັດ ຫຼື ຫົວໜ້າລັດຖະບານ ຈາກບັນດາປະເທດສະມາຊິກອາຊຽນ ແລະ ຄູ່ຮ່ວມມືພາຍນອກ ຂອງ ອາຊຽນ ລວມທັງໝົດ 20 ກວ່າປະເທດ ແລະຫົວໜ້າອົງການຈັດຕັ້ງພາກພື້ນ ແລະສາກົນ ເຂົ້າຮ່ວມ. ຂ້າພະເຈົ້າຂໍຖືໂອກາດນີ້ເຊີນຊວນພະນັກງານ, ທະຫານ, ຕຳຫລວດ ກໍຄືປະຊາຊົນລາວບັນດາເຜົ່າໃນຂອບເຂດທົ່ວປະເທດຈົ່ງພ້ອມໃຈກັນເປັນເຈົ້າພາບທີ່ດີດ້ວຍການປະກອບສ່ວນຕາມພາລະບົດບາດ ແລະ ຄວາມຮັບຜິດຊອບຂອງຕົນເພື່ອສ້າງຄວາມພ້ອມໃນທຸກດ້ານສໍາລັບການເປັນປະທານ ແລະເປັນເຈົ້າພາບກອງປະຊຸມສຸດຍອດອາຊຽນໃນຄັ້ງນີ້ໃຫ້ໄດ້ຮັບຜົນສໍາເລັດຕາມຄາດໝາຍ.

ຂ້າພະເຈົ້າເຊື່ອໝັ້ນວ່າດ້ວຍຄວາມປຸ້ມລຸ່ມສາມັກຄີຂອງພວກເຮົາ, ການເປັນປະທານອາຊຽນຂອງ ສປປ ລາວ ໃນປີ 2024, ກໍຄືການເປັນເຈົ້າພາບ ແລະ ປະທານກອງປະຊຸມສຸດຍອດອາຊຽນ ຄັ້ງທີ 44, 45 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ ໃນວັນທີ 8-11 ຕຸລາ 2024 ນີ້ ຈະໄດ້ຮັບຜົນສໍາເລັດອັນຈົບງາມ. ພວກເຮົາມາພ້ອມກັນເປັນເຈົ້າພາບທີ່ດີເພື່ອຜົນສໍາເລັດສໍາລັບການເປັນປະທານອາຊຽນ ແລະປີທ່ອງທ່ຽວລາວ ໃນປີ 2024.

แชร์