ລັດຖະມົນຕີກະຊວງກະສິກໍາ ແລະປ່າໄມ້ ພົບປະເຈົ້າແຂວງອຸດົມໄຊ

ເພື່ອເຮັດໃຫ້ວຽກງານການຜະລິດກະສິກໍາມີບາດກ້າວຂະຫຍາຍຕົວ ແລະປະຕິບັດໄປຕາມລ່ວງດຽວກັນໃນຕອນເຊົ້າວັນທີ 4 ກັນຍາ 2024 ທີ່ຫ້ອງຮັບແຂກ ຫ້ອງວ່າການປົກຄອງແຂວງ ແຂວງ ອຸດົມໄຊ, ທ່ານ ລິນຄຳ ດວງສະຫວັນ ລັດຖະມົນຕີກະຊວງກະສິກໍາ ແລະ ປ່າໄມ້ ໄດ້ເຂົ້າຢ້ຽມຢາມພົບປະ ທ່ານ ບຸນຄົງ ຫຼ້າຈຽມພອນ ເຈົ້າແຂວງ ແຂວງອຸດົມໄຊ, ມີບັນດາຫົວໜ້າ-ຮອງຫົວໜ້າກົມ, ພະແນກການຂອງແຂວງພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ຈຸດປະສົງການເຂົ້າຢ້ຽມຢາມພົບປະແມ່ນເພື່ອລາຍງາານການເຄື່ອນໄຫວລົງຊຸກຍູ້ຕິດຕາມການຜະລິດກະສິກໍາ, ປ່າໄມ້ ແລະພັດທະນາຊົນນະບົດພາຍໃນແຂວງ ເວົ້າລວມ, ເວົ້າສະເພາະແມ່ນການຈັດຕັ້ງປະຕິບັດວຽກງານຂອງ ພະແນກກະສິກໍາ ແລະ ປ່າໄມ້ ແຂວງອຸດົມໄຊ ໂດຍສະເພາະແມ່ນລົງຊຸກຍູ້ວຽກງານການຜະລິດກະສິກໍາ ເພື່ອບໍລິໂພກພາຍໃນ ແລະ ການຜະລິດເປັນສິນຄ້າເພື່ອສົ່ງອອກ, ຊຸກຍູ້ວຽກງານການກໍານົດຈຸດສຸມການຜະລິດ ທີ່ເປັນທ່າແຮງຂອງແຂວງລວມທັງ ຕິດຕາມຄວາມດຸນດ່ຽງກ່ຽວກັບວຽກງານການຈໍະຈອນສິນຄ້າສິນຄ້າກະສິກໍາ.

ໂອກາດນີ້ ທ່ານ ບຸນຄົງ ຫຼ້າຈຽມພອນ ເຈົ້າແຂວງແຂວງອຸດົມໄຊ ໄດ້ສະແດງຄວາມຊົມເຊີຍຕໍ່ກັບການລົງເຄື່ອນໄຫວວຽກໃນຄັ້ງນີ້ພ້ອມທັງສະເໜີໃຫ້ທ່ານລັດຖະມົນຕີກະຊວງກະສິກໍາ ແລະ ປ່າໄມ້ ພ້ອມດ້ວຍຄະນະເອົາໃຈໃສ່ສືບຕໍ່ຊີ້ນໍານໍາພາຂົງເຂດວຽກງານກະສິກໍາ ແລະ ປ່າໄມ້ ເພື່ອເຮັດໃຫ້ແຂວງອຸດົມໄຊ ສາມາດຜະລິດກະສິກໍາ ເພື່ອບໍລິໂພກພາຍໃນແຂວງ ແລະ ສາມາດຜະລິດກະສິກໍາເພື່ອສົ່ງອອກເປັນສິນຄ້າສ້າງລາຍຮັບໃຫ້ກັບແຂວງປະກອບສ່ວນໃນການພັດທະນາເສດຖະກິດ-ສັງຄົມ ເພາະວ່າວຽກງານກະສິກໍາເປັນວຽກງານໜຶ່ງທີ່ເປັນປັດໃຈຫຼັກໃນການສ້າງລາຍຮັບໃຫ້ແກ່ແຂວງເປັນຕົ້ນແມ່ນຢາງພາລາ, ສາລີແຂງ, ມັນຕົ້ນ. ອັນພົ້ນເດັ່ນແມ່ນວຽກງານການປູກພືດຜັກປອດສານຜິດໂດຍສະເພາະແມ່ນການປູດພືດລະດູແລ້ງ.

ໃນໂອກາດລົງເຄື່ອໄຫວວຽກງານໃນຄັ້ງນີ້ທ່ານລັດຖະມົນຕີກະຊວງກະສິກໍາ ແລະປ່າໄມ້ ພ້ອມດ້ວຍເຈົ້າແຂວງແຂວງອຸດົມໄຊ ຍັງໄດ້ລົງຢ້ຽມຢາມເຂດພື້ນທີ່ການຜະລິດກະສິກໍາ ການປູກມອນ-ລ້ຽງໝອນ, ການປູກຜັັກໃນເຮືອນຮົ່ມຢູ່ພາຍໃນແຂວງຕື່ມອີກ.

ຂ່າວ: ສອນເພັດ ສຸລິພອນ

แชร์