ຊາຍໄວ 32 ປີ ນໍາພາຄອບຄົວສ້າງລາຍຮັບ ໄດ້ 1 ຕື້ກວ່າກີບຕໍ່ປີ ຈາກກະສິກຳ

ຍ້ອນພັກ-ລັດໄດ້ມີແນວທາງນະໂຍບາຍກ່ຽວກັບການຊຸກຍູ້ສົ່ງເສີມປູກຝັງລ້ຽງສັດໃຫຍ່ໃຫ້ຫຼາຍກາຍເປັນສິນຄ້າໂດຍນໍ້າໃຊ້ທ່າແຮງແບບຄົງທີ່ເພິ່ມຜົນຜະລິດໃຫ້ຫຼາຍຂຶ້ນເຮັດໃຫ້ຄອບຄົວມີຢູ່ມີກິນ ແລະ ມີລາຍໄດ້ນັບມື້ນັບເພິ່ມຂຶ້ນດັ່ງຄອບຄົວຂອງທ່ານ ເບຼ່ຍດູ່ ຮາ ອາຍຸ 32 ປີ ເຜົ່າມົ້ງປະຊາຊົນບ້ານຜາບ່ອງເມືອງຄອບແຂວງໄຊຍະບູລີ.

ທ່ານ ເບຼ່ຍດູ່ ຮາ ໄດ້ເລົ່າສູ່ຟັງວ່າ: ພາຍໃນຄອບຄົວ ມີທັງໝົດ 4 ຄົນ ແຕ່ມີແຮງງານຕົ້ນຕໍ 2 ຄົນ ໃນເມື່ອກ່ອນຄອບຄົວແມ່ນຢຶດຖືອາຊີບເຮັດໄຮ່ປູກເຂົ້າ ແລະ ລ້ຽງສັດໃຫຍ່ປະເພດງົວຈໍານວນໜຶ່ງແຕ່ໃນໄລຍະນັ້ນກໍ່ຖືວ່າຄອບຄົວແມ່ນພໍແຕ່ກຸ້ມກິນໄປວັນໆ ບາງໄລຍະກໍ່ຂາດເຂີນເອົາແຕ່ດິນຟ້າອາກາດວ່າຖ້າຖືກຊ່ວງຟ້າຝົນອໍານວຍຜົນຜະລິດກໍ່ໄດ້ຫຼາຍຖ້າຝົນຟ້າບໍ່ອໍານວຍດີກໍ່ເຮັດໃຫ້ຜົນຜະລິດບໍ່ໄດ້ຮັບຜົນເຕັມເມັດເຕັມໜ່ວຍ, ຍ້ອນແນວນັ້ນຕົນເອງ ແລະ ຄອບຄົວຈຶ່ງໄດ້ປຶກສາກັນເພື່ອຊອກຫາທາງອອກເລີຍຕັດສິນໃຈຫັນມາປູກຢາງພາລາໃນປີ 2006 ໃນເນື້ອທີ່ 16 ເຮັກຕາ ມີເບັ້ຍຢາງພາລາ 8,000 ເບັ້ຍ ປູກໄລຍະ 3x7 m ລົງທຶນເບື້ອງຕົ້ນ 200 ລ້ານກີບ ເປັນເວລາ 8 ປີ ຮອດປີ 2015 ກໍ່ໄດ້ຂີດນໍ້າຢາງ ແລະ ສາມາດສ້າງລາຍຮັບເຂົ້າໃນຄອບຄົວຕອນນັ້ນໄດ້ 100 ກວ່າລ້ານກີບຕໍ່ປີ ຕົກມາຮອດປີ 2017 ລາຍຮັບໃນການຂາຍນໍ້າຢາງເພິ່ມຂຶ້ນໄດ້ທັງໝົດ 200 ລ້ານກວ່າກີບ ແລະ ຮອດປີ 2021 ຂາຍນໍ້າຢາງໄດ້ 900 ລ້ານກວ່າກີບ ໃນລາຄາຂາຍໂຕນລະ 12 ລ້ານກີບ ຍ້ອນຕົ້ນຢາງມີອາຍຸເຕັມສ່ວນທີ່ໃຫ້ນໍ້າຢາງຫຼາຍສ່ວນການຂີດແມ່ນໄດ້ຈ້າງຄົນຂີດຢາງໃຫ້ໂດຍຄ່າຈ້າງຫານເຄິ່ງກັນອາທິດໜຶ່ງຂີດເທື່ອໜຶ່ງ. ເມື່ອເຫັນວ່າໃນແຕ່ລະປີລາຍຮັບມີການເພິ່ມຂຶ້ນຄອບຄົວຂອງຂ້າພະເຈົ້າຈຶ່ງໄດ້ລົງທຶນຊື້ດິນຕື່ມອີກ 16 ເຮັກຕາແລ້ວປູກຢາງ 8,000 ເບັ້ຍ ປະຈຸບັນພວມຈະເລີນເຕີບໂຕງາມດີແຕ່ຍັງບໍ່ທັນໃຫ້ຜົນຜະລິດເທື່ອຄາດວ່າປີ 2029 ອາດຈະໄດ້ຮັບຜົນຜະລິດ. ນອກຈາກປູກຢາງພາລາແລ້ວຄອບຄົວ ຍັງໄດ້ລ້ຽງງົວເທື່ອເປັນສິນຄ້າໃນປີ 2017 ໄດ້ລ້ຽງງົວໃນຈໍານວນ 35 ໂຕ ລ້ຽງໄດ້ 5 ປີ ຂາຍອອກໄດ້ເງິນ 130 ລ້ານກີບ ແລະ ມາຮອດປີ 2021 ຄອບຄົວໄດ້ຊື້ງົວມາລ້ຽງເພິ່ມຕື່ມ 80 ໂຕ ເພາະວ່າລາຍໄດ້ໃນການຂາຍງົວແມ່ນດີເຊິ່ງມາຮອດປະຈຸບັນ ມີງົວທັງໝົດ 100 ໂຕ, ມີຕົ້ນຢາງພາລາທັງໝົດ 15,000 ກວ່າຕົ້ນ ສັງລວມແລ້ວການປູກຢາງພາລາ ແລະ ລ້ຽງງົວສາມາດສ້າງລາຍຮັບໃຫ້ແກ່ຄອບຄົວປີໜຶ່ງ ໄດ້ 1,30 ຕື້ກວ່າກີບ ຖ້າສະເລ່ຍໃສ່ຫົວຄົນພາຍໃນຄອບຄົວໄດ້ 128 ລ້ານກວ່າກີບ ຕໍ່ຄົນຕໍ່ປີ ປະຈຸບັນນີ້ຄອບຄົວແມ່ນມີເສດຖະກິດດີຂຶ້ນມີພື້ນຖານທີ່ແໜ້ນໜາລາຍຮັບທີ່ໝັ້ນຄົງມີລົດໃຫຍ່, ມີເງິນຊື້ນາ, ມີເງິນລົງທຶນສ້າງຕຶກຂາຍເຄື່ອງໃຫ້ຈີນເຊົ່າ ແລະ ມີເງິນແຮໄວ້ໃຊ້ຈ່າຍໃນຍາມຈໍາເປັນ.

ທ່ານຍັງກ່າວຕື່ມວ່າໃນຕໍ່ໜ້າຄອບຄົວ ຈະສືບຕໍ່ບົວລະບັດຮັກສາສວນຢາງຂີດຢາງພາລາໂຕເກົ່າໃຫ້ເປັນປົກກະຕິ ແລະ ບົວລະບັດຮັກສາຕົ້ນຢາງທີ່ປູກໃໝ່ໃຫ້ໄດ້ຂີດປີ 2029 ແລະ ສືບຕໍ່ກິດຈະກໍາລ້ຽງງົວໃຫ້ຫຼາຍເພື່ອຂະຫຍາຍກາຍເປັນການລ້ຽງແບບເປັນຟາມ ແລະ ປູກຫຍ້າລ້ຽງ.

ຂ່າວ+ພາບ: ບຸນທີ

แชร์