ລັດຖະມົນຕີກະຊວງການເງິນ ເນັ້ນໃຫ້ການເງິນອັດຕະປື ປັບປຸງລະບົບການຈັດຕັ້ງ ໃຫ້ໜັກແໜ້ນ ເຂັ້ມແຂງ

ໃນໂອກາດລົງເຄື່ອນໄຫວພົບປະໂອ້ລົມພະນັກງານຫລັກແຫລ່ງຂະແໜງການເງິນ ແຂວງອັດຕະປື ໃນວັນທີ 3 ກັນຍາ 2024, ທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນ ໄດ້ຊີ້ນຳຕໍ່ຂະແໜງການດັ່ງກ່າວຈົ່ງສືບຕໍ່ເອົາໃຈໃສ່ຕັ້ງໜ້າປັບປຸງລະບົບການຈັດຕັ້ງຂອງຂະແໜງການເງິນ ໃຫ້ໜັກແໜ້ນ, ເຂັ້ມແຂງ ມີປະສິດທິພາບ ແລະ ປະສິດທິຜົນ ພ້ອມທັງສືບຕໍ່ບໍາລຸງ ແລະ ກໍ່ສ້າງພະນັກງານ-ລັດຖະກອນ ຂະແໜງການເງິນ ໃຫ້ມີຄວາມໜັກແໜ້ນ ທາງດ້ານຄຸນທາດການເມືອງ, ຄຸນສົມບັດສິນທໍາປະຕິວັດ, ມີຈັນຍາບັນ, ມີຄວາມເຂັ້ມແຂງທາງດ້ານວິຊາສະເພາະ ໄປພ້ອມໆກັບການນຳໃຊ້ກົດໝາຍ, ລະບຽບການ ແລະ ມາດຕະການຕ່າງໆທີ່ມີຢູ່ ລວມທັງຊອກຄົ້ນ ແລະ ເກັບລາຍຮັບ ທີ່ເປັນທ່າແຮງບົ່ມຊ້ອນ ແລະ ເຫັນວ່າຍັງບໍ່ທັນເກັບໄດ້ຄົບຖ້ວນ ໃຫ້ໄດ້ຮັບຜົນດີ ເປັນຕົ້ນ ສູ້ຊົນຈັດຕັ້ງປະຕິບັດເຮັດໜ້າທີ່ການເມືອງແນວຄິດໃຫ້ສະມາຊິກພັກເຂົ້າສູ່ພຶດຕິກຳຕົວຈິງ, ມີຄຸນສົມບັດສິນທຳປະຕິວັດ, ເປັນແບບຢ່າງນຳໜ້າໃຫ້ສະມາຊິກພັກ, ພະນັກງານ-ລັດຖະກອນ.

ພ້ອມນກັນນີ້, ກໍໃຫ້ສືບຕໍ່ປັບປຸງແບບແຜນວິທີວຽກ, ວິທີນຳພາ-ຊີ້ນຳ, ມີສະຕິ, ມີຄວາມເຂັ້ມງວດເດັດຂາດໃນການແກ້ໄຂບັນດາປະກົດການຫຍໍ້ທໍ້ຕ່າງໆ, ປັບປຸງການຈັດຕັ້ງໃຫ້ມີຄວາມໜັກແໜ້ນເຂັ້ມແຂງ ເພື່ອຕອບສະໜອງກັບໜ້າທີ່ການເມືອງ ທີ່ໄດ້ຮັບມອບໝາຍໃນໄລຍະໃໝ່; ເພີ່ມທະວີການປະຕິບັດວິໄນການເງິນ ໃຫ້ມີຄວາມເຂັ້ມງວດ, ເພີ່ມທະວີຂຸດຄົ້ນທຸກແຫລ່ງລາຍຮັບທີ່ບົ່ມຊ້ອນພາຍໃນ ແລະສ້າງຖານລາຍຮັບໃໝ່ທີ່ໝັ້ນຄົງເພື່ອເກັບລາຍຮັບເຂົ້າງົບປະມານໃຫ້ນັບມື້ເພີ່ມຂຶ້ນ; ສຸມທຸກກຳລັງໃນການຫັນວຽກງານການເງິນເປັນທັນສະໄໝຮັບປະກັນການຈັດຕັ້ງປະຕິບັດການຈັດເກັບລາຍຮັບ ແລະ ການຄຸ້ມຄອງລາຍຈ່າຍໃຫ້ມີປະສິດທິຜົນສູງກວ່າເກົ່າຄຽງຄູ່ກັນນັ້ນ, ແມ່ນການຈັດຕັ້ງປະຕິບັດວາລະແຫ່ງຊາດຂອງຂະແໜງການເງິນໃຫ້ໄດ້ຮັບຜົນດີ ແລະ ປັບປຸງກົງຈັກການຈັດຕັ້ງໃຫ້ມີຄວາມເໝາະສົມຖືກຕ້ອງຕາມຂັ້ນຕອນ ແລະລະບຽບການ.
ຂ່າວ: ໄພບູນ

• 05/09/2024