ສົ່ງ-ມອບ ລົດຈັກຮັບໃຊ້ວິຊາສະເພາະ ສ້ອມແປງສໍາເລັດ ໃຫ້ກອງບັນຊາການ ປກ

ໃນວັນທີ 3 ກັນຍາ 2024 ທີ່ບໍລິສັດ ນິວຈິບເຊັງ ຈໍາກັດ ໄດ້ຈັດພິທີສົ່ງ-ມອບ ລົດຈັກຮັບໃຊ້ວິຊາສະເພາະຄຸມແຫ່ Honda ST1300 CC ຈໍານວນ 50 ຄັນ ຂອງກອງບັນຊາການປ້ອງກັນສູນກາງ (ປກ) ກະຊວງ ປກສ ຕາມສັນຍາບໍລິການສ້ອມແປງ ລະຫວ່າງ ກອງບັນຊາການ ປກ ແລະ ບໍລິສັດ ນິວຈິບເຊັງ ຈຳກັດ ມອບໂດຍ ທ່ານ ສະເໜີ ຈຸລະມະນີ ຮອງປະທານບໍລິສັດ ນິວຈິບເຊັງ ຈຳກັດ ຮັບໂດຍ ພົຈວ ສົມພົງ ຂໍາວິລຸນ ຫົວໜ້າກອງບັນຊາການ ປກ ໂດຍມີພາກສ່ວນທີ່ກ່ຽວຂ້ອງ ພ້ອມດ້ວຍພະນັກງານທັງສອງພາກສ່ວນເຂົ້າຮ່ວມ.

ພົຈວ ສົມພົງ ຂໍາວິລຸນ ກ່າວວ່າ: ເພື່ອເປັນການກະກຽມຄວາມພ້ອມຮັບປະກັນຄວາມປອດໄພໃຫ້ແກ່ແຂກພາຍໃນ ແລະຕ່າງປະເທດທີ່ຈະເດີນທາງເຂົ້າມາຮ່ວມກອງປະຊຸມສຸດຍອດອາຊຽນທີ່ ສປປ ລາວ ເປັນເຈົ້າພາບໃຫ້ມີຄວາມສະຫງົບປອດໄພຮອບດ້ານ; ອີງຕາມທິດຊີ້ນຳຂອງຂັ້ນເທິງກອງບັນຊາການ ປກ ຈຶ່ງໄດ້ຕົກລົງເຫັນດີເຮັດສັນຍາມອບໃຫ້ບໍລິສັດ ນິວຈິບເຊັງ ຈຳກັດ ເປັນຜູ້ກວດກາ, ສ້ອມແປງ ແລະປ່ຽນຖ່າຍອາໄຫຼ່ພາຫະນະຮັບໃຊ້ວຽກງານວິຊາສະເພາະ ຈໍານວນ 50 ຄັນ ກໍານົດເວລາການສ້ອມແປງ 120 ວັນ ມາຮອດປະຈຸບັນແມ່ນສໍາເລັດການສ້ອມແປງແລ້ວ 100%.

ທ່ານ ສະເໜີ ຈຸລະມະນີ ກ່າວຕື່ມອີກວ່າ: ນັບແຕ່ມື້ທີ່ໄດ້ຮັບມອບໝາຍທາງບໍລິສັດແມ່ນໄດ້ເອົາໃຈໃສ່ກວດກາເຕັກນິກລົດພ້ອມທັງປ່ຽນຖ່າຍອາໄຫຼ່ທີ່ເປ່ເພອອກເພື່ອຮັບປະກັນໃຫ້ແກ່ລົດຮັບໃຊ້ວຽກງານວິຊາສະເພາະ ຂອງກຳລັງປ້ອງກັນສູນກາງ ສາມາດໃຊ້ງານໄດ້ປົກກະຕິ ແລະມີປະສິດທິຜົນສູງ. ມາຮອດປັດຈຸບັນ, ແມ່ນສຳເລັດການສ້ອມແປງ ແລະໄດ້ມອບຄືນໃຫ້ແກ່ກອງບັນຊາການ ປກ. ພ້ອມນີ້, ບໍລິສັດ ນິວຈິບເຊັງ ຈໍາກັດ ຍັງໄດ້ມອບໝວກກັນກະທົບ ຈຳນວນ 100 ໜ່ວຍ ໃຫ້ແກ່ກອງບັນຊາການ ປກ ເພື່ອເປັນການປະກອບສ່ວນໃນການປະຕິບັດໜ້າທີ່ປ້ອງກັນຄວາມປອດໄພໃຫ້ແກ່ແຂກພາຍໃນ ແລະ ຕ່າງປະເທດທີ່ເຂົ້າຮ່ວມກອງປະຊຸມສຸດຍອດອາຊຽນ ທີ່ ສປປ ລາວ ເປັນເຈົ້າພາບໃຫ້ມີຄວາມສະຫງົບປອດໄພຮອບດ້ານ.

ພາບ-ຂ່າວ: ແກ້ວ

แชร์