.

ເຈົ້າແຂວງສະຫວັນນະເຂດ ລົງຊຸກຍູ້ການຮຽນ-ການສອນຂັ້ນປະຖົມ ແລະມັດທະຍົມທົ່ວຈຸດສຸມຈຽງຕູບ ເມືອງເຊໂປນ

.

ເນື່ອງໃນໂອກາດໄຂສົກຮຽນໃໝ່ 2024-2025 ນີ້, ໃນວັນທີ 3 ກັນຍາ 2024 ຜ່ານມານີ້, ທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ, ພ້ອມຄະນະນຳຂອງແຂວງ ແລະ ທ່ານ ເກຍ ອູ໊ສິດທິເດດ ວິລະຊົນແຮງງານແຫ່ງຊາດ,ພ້ອມດ້ວຍພາກສ່ວນນັກລະກິດ-ນັກທຸລະກິດຍິງຂອງແຂວງ, ໄດ້ລົງມອບເຄື່ອງນຸ່ງຮົ່ມນັກຮຽນ, ອຸປະກອນການຮຽນ ແລະ ຊຸດກິລາໃຫ້ໂຮງຮຽນແຫ່ງຕ່າງໆທີ່ນອນໃນຂອບເຂດຈຸດສຸມລາດຫໍ້, ຈຸດສຸມຜາບັງ ແລະ ກຸ່ມບ້ານຈຽງຕູບ ເມືອງເຊໂປນ ແຂວງສະຫວັນນະເຂດ.

ໃນໂອກາດນີ້, ທ່ານເຈົ້າແຂວງໄດ້ຮັບຟັງການລາຍງານສະພາບຕົວຈິງຂອງໂຮງຮຽນແຕ່ລະແຫ່ງພາຍໃນຈຸດສຸມລາດຫໍ້ ແລະ ກຸ່ມບ້ານຈຽງຕູບຈາກຕົວແທນຂອງໂຮງຮຽນແຕ່ລະແຫ່ງ. ໃນນີ້, ສຳລັບຈຸດສຸມຜາບັງມີ 2 ໝວດ, ມີ 7 ໂຮງຮຽນປະຖົມ ແລະ 1 ມັດທະຍົມຕົ້ນ, ມີຈໍານວນປະຊາກອນໃນທົ່ວຈຸດສຸມ 2,081 ຄົນ, ຍິງ 1,390 ຄົນ, ມີຈໍານວນນັກຮຽນຊັ້ນປະຖົມທັງໝົດ 435 ຄົນ, ຍິງ 202 ຄົນ, ມີຄູ 8 ຄົນ, ຍິງ 5 ຄົນ, ຄູອາສາ 2 ຄົນ.

ສຳລັບໂຮງຮຽນມັດທະຍົມຜາບັງມີນັກຮຽນຈາກ 4 ບ້ານໃຫຍ່ມາເຂົ້າຮຽນຄື: ບ້ານກະດໍ, ບ້ານໃໝ່, ບ້ານສະປອງ ແລະບ້ານນໍ້າໂທນ, ມີອາຄານຮຽນທັງໝົດ 3 ຫຼັງ, ມີຄູ-ອາຈານທັງໝົດ 7 ຄົນ, 2 ຄົນ, ມີຈຳນວນນັກຮຽນມັດທະຍົມທັງໝົດ 56 ຄົນ, ຍິງ 27 ຄົນ.

ສໍາລັບການສະເໜີຕໍ່ການນຳຂັ້ນແຂວງ, ຂໍລັດຖະກອນຄູ 1 ຕົວເລກໃຫ້ປະຖົມກະດໍ, ຄອມພີວເຕີ 1 ໜ່ວຍໃຫ້ປະຖົມກະດໍ, ຂໍປຼີນເຕີ 1 ເຄື່ອງ ແລະ ຊີມັງ, ເພື່ອເທພື້ນບ່ອນນັກຮຽນກິນເຂົ້າ, ຕ້ອງການເຮັດເຮືອນຄົວໂຮງຮຽນມັດທະຍົມ, ສຳລັບໂຮງຮຽນປະຖົມລາດຫໍ້ມີນັກຮຽນທັງໝົດ 140 ຄົນ, ຍິງ 63 ຄົນ, ມີອາຄານຮຽນ 2 ຫຼັງ, ເປັນອາຄານຮຽນຖາວອນ 1 ຫຼັງ ແລະ ເຄີ່ງຖາວອນ 1 ຫຼັງ, ມີຄູສອນທັງໝົດ 1 ຄົນ, ຂໍ້ສະເໜີຂໍປຼີນເຕີສີ 1 ເຄື່ອງ, ຂໍຄອມພີວເຕີໂນດບຸກ 1 ເຄື່ອງ, ຂໍຕູ້ໃສ່ປຶ້ມຮຽນ 3 ໜ່ວຍ, ໂຮງຮຽນປະຖົມສະເວດຂໍຫ້ອງກຽມຊັ້ນປະຖົມ.

ພ້ອມດຽວກັນນີ້, ທ່ານເຈົ້າແຂວງພ້ອມຄະນະຍັງໄດ້ມອບເຄື່ອງນຸ່ງນັກຮຽນຊັ້ນປະຖົມ ແລະຊັ້ນມັດທະຍົມ, ແຈກເຂົ້າໜົມ, ນໍ້າດື່ມໃຫ້ນັກຮຽນຕາມຈຸດຕ່າງໆຄື: ໂຮງຮຽນຈຸດສຸມລາດຫໍ້, ໂຮງຮຽນປະຖົມຈຸດສຸມຜາບັງ ແລະໂຮງຮຽນປະຖົມຈຸດສຸມຈຽງຕູບ, ລວມນັກຮຽນທີ່ມາຮັບເຄື່ອງທັງໝົດ 1,009 ຄົນ, ຍິງ  454 ຄົນ, ມູນຄ່າເຄື່ອງທີ່ນໍນມາມອບໃນຄັ້ງນີ້ 181 ລ້ານກວ່າກີບ ແລະຍັງໄດ້ມອບເງິນ 3 ລ້ານກີບໃຫ້ແຕ່ລະໂຮງຮຽນ (ລວມທັງໝົດມີ 17 ໂຮງຮຽນ).

ໃນໂອກາດນີ້, ທ່ານເຈົ້າແຂວງສະຫວັນນະເຂດ ໄດ້ຢ້ຽມຢາມຖາມຂ່າວຢ່າງໃກ້ຊິດກັບຫຼານນ້ອຍຈາກໂຮງຮຽນແຫ່ງຕ່າງໆ, ພ້ອມທັງໄດ້ເນັ້ນໃຫ້ພໍ່ແມ່ຜູ້ປົກຄອງ, ຄູ-ອາຈານ ແລະ ຫຼານນ້ອຍນັກຮຽນທຸກຄົນ, ຕ້ອງໄດ້ຖືສຳຄັນຕໍ່ວຽກງານການສຶກສາເພາະວ່າມີແຕ່ການສຶກສາ ແລະ ການຮຽນຮູ້ເທົ່ານັ້ນທີ່ຈະສາມາດພັດທະນາຕົນເອງ, ພັດທະນາຄອບຄົວ, ພັດທະນາສັງຄົມ ແລະປະເທດຊາດໄດ້.

ສະນັ້ນ, ຈິຶ່ງໃຫ້ຫຼານນ້ອຍນັກຮຽນທຸກຄົນຈົ່ງຈຳໃຫ້ຂຶ້ນໃຈວ່າ “ຮຽນໜັງສືແມ່ນຮັກຊາດ” ສຳລັບຈຸດສຸມຈຽງຕູບມີໂຮງຮຽນປະຖົມ 10 ແຫ່ງ. ໃນນັ້ນ, ມີປະຖົມສົມບູນ 9 ແຫ່ງ, ມີໂຮງຮຽນມັດທະຍົມ 2 ແຫ່ງ, ທົ່ວຈຸດສຸມມີຄູສອນທັງໝົດ 16 ຄົນ, ຍິງ 5 ຄົນ. ໃນນີ້, ມີຄູສອນປະຖົມ 11 ຄົນ, ຍິງ 2 ຄົນ, ໂຮງຮຽນແຕ່ລະແຫ່ງມີອາຄານຮຽນໃນສະພາບດີ,ມີຄອມພີວເຕີ,ອຸປະກອນຮັບໃຊ້ການຮຽນ-ການສອນ,ບາງໂຮງຮຽນມີໄຟຟ້າໃຊ້ ແລະມີເຄື່ອງຕອງນໍ້າສະອາດໃນໂຮງຮຽນ.

ໃນເວລາຕໍ່ມາ, ທ່ານເຈົ້າແຂວງ, ພ້ອມດ້ວຍຄະນະໄດ້ລົງຕິດຕາມການກໍ່ສ້າງພື້ນຖານໂຄງລ່າງທີ່ສໍາຄັນຂອງຈຸດສຸມຈຽງຕູບ, ຄະນະໄດ້ລົງເບິ່ງການກໍ່ສ້າງໂຮງໝໍນ້ອຍຂອງຈຸດສຸມ, ລົງເບີ່ງພື້ນທີ່ທີ່ຈະສ້າງເປັນຫໍພັກພະນັກງານຂອງຈຸດສຸມ, ການກໍ່ສ້າງລະບົບນໍ້າລິນ, ເດີ່ນກິລາ ແລະຫ້ອງການປົກຄອງຈຸດສຸມຈຽງຕູບ, ຈາກນັ້ນລົງເບິ່ງພື້ນປູກມັນຕົ້ນຂອງປະຊາຊົນໃນເຂດຈຸດສຸມຈຽງຕູບ, ຫຼັກໝາຍຊາຍແດນເລກທີ 584 ນໍາອີກດ້ວຍ.

แชร์