8 ເດືອນ ດ່ານພາສີສາກົນວັງເຕົ່າ ເກັບລາຍຮັບໄດ້ 1,015 ຕື້​ກວ່າກີບ

ໃນວັນທີ 2 ກັນຍາ, ທ່ານ ສັນຕິພາບ​ ພົມວິຫານ ລັດຖະມົນຕີກະຊວງການເງິນ ພ້ອມຄະນະ ໄດ້ເຄື່ອນໄຫວຍູ້ຊຸກຍູ້ວຽກງານການເກັບລາຍຮັບ​ເຂົ້າ​ງົບປະມານ​ ປະຈໍາປີ​ 2024​ ຢູ່​ດ່ານຊາຍແດນ​ສາກົນ​ວັງເຕົ່າ​ ເມືອງໂພນທອງ ແຂວງຈໍາປາສັກ.

ທ່ານ​ ປອ. ພູຊ່ອງ​ ສົມຄິດ​ ຫົວໜ້າດ່ານພາສີສາກົນວັງເຕົ່າ ແລະ​ ທ່າ​ບົກ​ວັງເຕົ່າ​ ໄດ້ລາຍງານວ່າ: ວຽກງານພາສີ​ ໄດ້ລະດົມຫົວໜ່ວຍທຸລະກິດ​ ໃຫ້ມາເຄື່ອນໄຫວນໍາ​ເຂົ້າ​ - ສົ່ງອອກສິນຄ້າ ເຄື່ອງຂອງຜ່ານດ່ານໃຫ້ມີຂະບວນຟົດຟື້ນ ບົນພື້ນຖານລະບຽບ, ກົດໝາຍ ເພື່ອເປັນເງື່ອນໄຂ ແລະ ຮັບປະກັນໃຫ້ແກ່ການຈັດເກັບລາຍຮັບເຂົ້າງົບປະມານ, ຕິດພັນກັບການໂຄສະນາ, ເຜີຍແຜ່ລະບຽບກົດໝາຍ ແລະ ນິຕິກຳຕ່າງໆ ກ່ຽວກັບວຽກງານພາສີ ໃຫ້ກັບຜູ້ປະກອບການ ພ້ອມທັງເອົາໃຈໃສ່ວຽກງານລະດົມ,​ ດຶງດູດຜູ້ປະກອບການການນໍາ​ເຂົ້າ​ - ສົ່ງອອກສິນຄ້າຢ່າງແຂງແຮງ ເພື່ອເປັນທ່າແຮງ ໃຫ້ແກ່ການບັນລຸຄາດໝາຍໃນການຈັດເກັບລາຍຮັບເຂົ້າງົບປະມານ,​ ຕົວເລກແຜນການຈັດເກັບລາຍຮັບປີ 2024 ຈໍານວນ​1,350 ຕື້ກີບ, ຈັດຕັ້ງປະຕິບັດຈັດເກັບລາຍຮັບ​ ແຕ່ວັນທີ 1 ມັງກອນ - 30 ສິງຫາ 2024 ໄດ້ທັງໝົດ​ 1,015 ຕື້​ 904 ລ້ານກວ່າກີບ,​ ທຽບໃສ່ແຜນການງວດປະຕິບັດໄດ້ 70.05%, ທຽບໃສ່ແຜນການປີ ປະຕິບັດໄດ້ 75.25%.

แชร์