ເຜີຍແຜ່ 3 ກົດໝາຍໃນຂະແໜງສາທາລະນະສຸກ

ກອງປະຊຸມ ເຜີຍແຜ່ ກົດໝາຍໃນຂະແໜງສາທາລະນະສຸກ ໃຫ້ 03 ແຂວງ: ແຂວງວຽງຈັນ, ບໍລິຄໍາໄຊ ແລະແຂວງ ໄຊສົມບູນ) ຈັດຂຶ້ນໃນວັນ ທີ 02 ກັນຍາ 2024, ທີ່ຫ້ອງປະຊຸມ ໂຮງແຮມອາມາລີ, ເມືອງວັງວຽງ, ແຂວງວຽງຈັນ ໂດຍການເປັນປະທານຂອງທ່ານ ດຣ. ບຸນແຝງ ພູມມະໄລສິດ ລັດຖະມົນຕີກະຊວງສາທາ ລະນະສຸກ.

ກອງປະຊຸມໃນນີ້ມີການໂຄສະນາ, ເຜີຍແຜ່ ກົດໝາຍຮ່ວມກັນທັງໝົດ 03 ສະບັບ ຄື:
1. ກົດໝາຍວ່າດ້ວຍ ສາທາລະນະສຸກ (ສະບັບສ້າງໃໝ່) ທີ່ສະພາແຫ່ງຊາດ ໄດ້ຮັບຮອງ ສະບັບເລກທີ 38/ສພຊ, ລົງວັນທີ 17 ກໍລະກົດ 2023 ແລະ ທ່ານປະທານປະເທດ ກໍໄດ້ອອກລັດຖະດຳລັດ ກ່ຽວກັບການປະກາດໃຊ້ ສະບັບເລກທີ 094/ປປທ, ລົງວັນທີ 30 ສິງຫາ 2023;
2. ກົດໝາຍ ວ່າດ້ວຍ ການຮັກສາສຸຂະພາບຂັ້ນຕົ້ນ (ສະບັບສ້າງໃໝ່) ທີ່ສະພາແຫ່ງຊາດ ໄດ້ຮັບຮອງແລ້ວ ສະບັບເລກທີ 49/ສພຊ, ລົງວັນທີ 20 ພະຈິກ 2023 ແລະ ທ່ານປະທານປະເທດ ກໍໄດ້ອອກລັດຖະດຳລັດ ກ່ຽວກັບການປະກາດໃຊ້ ສະບັບເລກທີ 007/ປປທ, ລົງວັນທີ 05 ມັງກອນ 2024;
3. ກົດໝາຍ ການປິ່ນ ປົວ (ສະບັບປັບປຸງ) ທີ່ສະພາແຫ່ງຊາດ ໄດ້ຮັບຮອງແລ້ວ ສະບັບເລກທີ 48/ສພຊ, ລົງວັນທີ 20 ພະຈິກ 2023 ແລະ ທ່ານປະທານປະເທດ ກໍໄດ້ອອກລັດຖະດຳລັດ ກ່ຽວກັບການປະກາດໃຊ້ ສະບັບເລກທີ 006/ປປທ, ລົງວັນທີ 05 ມັງກອນ 2024;
ເຊິ່ງກົດໝາຍ ທັງ 03 ສະບັບ ເປັນກົດໝາຍທີ່ມີຄວາມຈຳເປັນ ແລະ ສຳຄັນຫຼາຍຕໍ່ກັບຂະແໜງການສາທາລະນະສຸກຂອງພວກເຮົາໂດຍສະເພາະກົດໝາຍ ວ່າດ້ວຍສາທາລະນະສຸກ ເຊິ່ງເປັນກົດໝາຍແມ່ ຂອງຂະແໜງການສາທາລະນະສຸກ ໄດ້ກຳນົດບັນດາວຽກງານສາທາລະນະສຸກ, ກຳນົດບັນດາຫຼັກການ ແລະ ລະບຽບການ ກ່ຽວກັບການຄຸ້ມຄອງ ແລະ ຕິດຕາມກວດກາວຽກງານສາທາລະນະສຸກ ເພື່ອເຮັດໃຫ້ວຽກງານດັ່ງກ່າວໄດ້ຮັບການຈັດຕັ້ງປະຕິບັດ ຢ່າງເປັນລະບົບ, ມີປະສິດທິພາບ ແລະ ປະສິດທິຜົນ, ກົດໝາຍວ່າດ້ວຍການຮັກສາສຸຂະພາບຂັ້ນຕົ້ນ ເປັນຕົ້ນ ການເບິ່ງແຍງ, ດູແລ ແລະ ການຮັກສາສຸຂະພາບຂັ້ນພື້ນຖານຂອງປະຊາຊົນໃຫ້ຖືກຕ້ອງຕາມຫຼັກການສຸຂານາໄມ, ກົດໝາຍ ວ່າດ້ວຍການປິ່ນປົວ ເພື່ອຮັບປະກັນໃຫ້ພົນລະເມືອງທຸກຄົນໄດ້ຮັບການບໍລິການປິ່ນປົວ ແລະຟື້ນຟູໜ້າທີ່ການຢ່າງທົ່ວເຖິງ, ສະເໝີພາບ, ຍຸຕິທໍາ ປົກປ້ອງສິດ ແລະ ຜົນປະໂຫຍອັນສອບທຳຂອງຜູ້ຮັບ ແລະ ຜູ້ໃຫ້ບໍລິການປິ່ນປົວ.

แชร์