ສະຫລຸບການຈັດຕັ້ງປະຕິບັດບັນດາໂຄງການຂອງກອງທຶນພັດທະນານໍ້າເທີນ 2 ໄລຍະ 6 ເດືອນ

ກອງປະຊຸມຄະນະຊີ້ນໍາກອງທຶນພັດທະນານໍ້າເທີນ 2 ຄັ້ງທີ 8 ຈັດຂຶ້ນໃນວັນທີ 27 ສິງຫາ 2024 ທີ່ຫ້ອງປະຊຸມກອງທຶນພັດທະນານໍ້າເທີນ 2 ເມືອງນາກາຍ ໂດຍການເປັນປະທານຮ່ວມຂອງ ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ, ທ່ານ ມາກ ອອງຕວນຣຸບ ຜູ້ອໍານວຍການໃຫຍ່ບໍລິສັດໄຟຟ້ານໍ້າເທີນ 2, ມີທ່ານຮອງເຈົ້າເມືອງນາກາຍ, ບັນດາທ່ານຄະນະກໍາມະການກອງທຶນພັດທະນານໍ້າເທີນ 2  ແລະພາກສ່ວນກ່ຽວຂ້ອງເຂົ້າຮ່ວມ.

ໃນກອງປະຊຸມແມ່ນໄດ້ຮັບຟັງ ບົດລາຍງານປະຈໍາ 6 ເດືອນຕົ້ນປີ 2024 ຂອງກອງທຶນພັດທະນານໍ້າເທີນ 2 ໂດຍໄດ້ທົບທວນຄືນບັນດາໜ້າວຽກທີ່ໄດ້ຈັດຕັ້ງປະຕິບັດຜ່ານມາເປັນຕົ້ນແມ່ນຄວາມເປັນມາ, ຈຸດປະສົງຂອງໂຄງການ, ການນໍາໃຊ້ແຫຼ່ງທຶນ ແລະຜົນໄດ້ຮັບຂອງກອງທຶນ ລວມເຖິງຂໍ້ສະດວກ, ຂໍ້ຫຍຸ້ງຍາກ ແລະບົດຮຽນທີ່ຖອດຖອນໄດ້ໃນການຈັດຕັ້ງປະຕິບັດບັນດາກິດຈະກຳຕ່າງໆ ຕາມທຶນທີ່ທາງນໍ້າເທີນ 2 ໄດ້ອະນຸມັດໃຫ້ສືບຕໍ່ຈັດຕັ້ງປະຕິບັດໃນປີ 2024 ປະກອບມີທັງໝົດ 4 ໂຄງການຄື: ໂຄງການທຶນການສຶກສາໄລຍະຍາວ, ໂຄງການເຄືອຄ່າຍສະຫວັດດີການສັງ ຄົມ, ໂຄງການກອງທຶນຢາປ້ອງກັນພະຍາດສັດລ້ຽງໃນເຂດ 16 ຄຸ້ມບ້ານ ແລະ  ໂຄງການອາຫານກາງເວັນໃຫ້ 16 ໂຮງຮຽນ. ສໍາລັບຄວາມຄືບໜ້າຂອງການຈັດຕັ້ງປະຕິບັດໄດ້ສໍາເລັດການລົງເກັບກຳຂໍ້ມູນນັກຮຽນມໍ 7 ມີ 124 ຄົນ, ສໍາເລັດການແຈກຢາຍອາຫານປະຈໍາເດືອນໃຫ້ຜູ້ດ້ອຍໂອກາດ 29 ຄົນ, ສ້າງພັນທະສັນຍາໃຫ້ຜູ້ດ້ອຍໂອກາດໃໝ່ 6 ຄົນ, ສໍາເລັດການເກັບກໍາຂໍ້ມູນເພື່ອຄັດເລືອກບ້ານທີ່ຈະເປັນຈຸດໃຫ້ບໍລິການຢາວັກຊິນ ແລະເກັບກຳຂໍ້ມູນສັດຕະວະແພດບ້ານ, ຈັດຊື້ວັກຊິນ ແລະ ອຸປະກອນສໍາລັບສັດ ເພື່ອມອບໃຫ້ໜ່ວຍງານສັດຕະວະແພດບ້ານ ເຊິ່ງກອງທຶນພັດທະນານໍ້າເທີນ2 (NT2DF) ແມ່ນເປັນການສະໝັກໃຈຂອງຜູ້ຖືຫຸ່ນຂອງ (NTPC) ເພື່ອສະໜັບສະໜູນຊຸມຊົນໃນພູພຽງນາກາຍ ໂດຍຜ່ານການຈັດສັນງົບປະມານຂອງບໍລິສັດໄຟຟ້ານໍ້າເທີນ 2 ໃຫ້ກອງທຶນພັດທະນານໍ້າເທີນ 2, ເຊີ່ງມີການຄິດໄລ່ເທົ່າກັບ 1.000 ກີບ/ເມກາວັດໂມງ ຕາມສັນຍາຊື້ຂາຍໄຟທີ່ຜະລິດຂາຍໄດ້ ນັບແຕ່ວັນທີ 1 ມັງກອນ ຫາ ວັນທີ 31 ເດືອນ ທັນວາ ຂອງແຕ່ລະປີ. ພ້ອມນັ້ນ ບັນດາຜູ້ເຂົ້າຮ່ວມ ຍັງໄດ້ພ້ອມກັນປຶກສາຫາລື ປະກອບຄໍາຄິດຄໍາເຫັນ ຕໍ່ການກໍານົດທິດທາງແຜນການທີ່ຈະສືບຕໍ່ຈັດຕັ້ງປະຕິບັດໃນ 6 ເດືອນທ້າຍປີ 2024, ພ້ອມທັງໄດ້ຮັບຮອງເອົາແຜນງົບປະມານ ປີ 2024 ສະບັບປັບປຸງ ແລະ ງົບປະມານເພີ່ມເຕີມໂຄງການກອງທຶນຢ່າປ້ອງກັນ ແລະ ປິ່ນປົວພະຍາດສັດລ້ຽງ. ທີ່ສໍາຄັນຍັງໄດ້ມີພິທີເຊັນຮັບຮອງເອົາງົບປະມານສະບັບປັບປຸງ ແລະ ເຊັນສັນຍາຮ່ວມມືສະບັບປັບປຸງໃໝ່, ໃຫ້ກຽດລົງນາມໂດຍ ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ ແລະທ່ານ ມາກ ອອງຕວນຣຸບ ຜູ້ອໍານວຍການໃຫຍ່ບໍລິສັດໄຟຟ້ານໍ້າເທີນ 2.

ເພື່ອແນໃສ່ການນໍາໃຊ້ຮ່ວງທຶນທີ່ບໍລິສັດນໍ້າເທີນ 2 ໄດ້ສະໜອງໃຫ້ມີປະສິດທິພາບ, ປະທິດທິຜົນ ແລະເກີດປະໂຫຍດສູງສຸດໃຫ້ແກ່ປະຊາຊົນ ໃນນາມປະທານຮ່ວມກອງປະຊຸມ ທ່ານ ວັນໄຊ ພອງສະຫວັນ ຍັງໄດ້ໃຫ້ທິດຊີ້ນໍາ ແລະຮຽກຮ້ອງມາຍັງຄະນະຮັບຜິດຊອບກອງທຶນ, ກອງເລຂາທຸກຂັ້ນໃຫ້ສືບຕໍ່ເອົາໃຈໃສ່ປະຕິບັດເນື້ອໃນສັນຍາ ແລະ ຂໍ້ຕົກລົງກໍ່ຄືບັນດາໜ້າວຽກທີ່ໄດ້ລະບຸໄວ້ໃນສັນຍາ ໃຫ້ໄດ້ຮັບການຈັດຕັ້ງປະຕິບັດຕາມແຜນທີ່ກໍານົດໄວ້ໃຫ້ມີຜົນສໍາເລັດທີ່ດີ. ຄຽງຄູ່ກັນນັ້ນໃຫ້ແລກປ່ຽນຖອດຖອນບົດຮຽນໃນການຈັດຕັ້ງປະຕິບັດກິດຈະກໍາຕ່າງໆ ໂດຍມອບໃຫ້ຂະແໜງທີ່ກ່ຽວຂ້ອງຈົ່ງໄດ້ຊຸກຍູ້ສົ່ງເສີມ ຝຶກອົບຮົມໃຫ້ປະຊາຊົນ ດ້ານການປູກ-ການລ້ຽງ ໃຫ້ເປັນຮູບປະທໍາຫລາຍຂຶ້ນ, ພາຍຫຼັງທີ່ໂຄງການນີ້ສິ້ນສຸດກໍ່ໃຫ້ກິດຈະກໍາດັ່ງກ່າວໄດ້ສືບຕໍ່ດໍາເນີນໄປຢ່າງຕໍ່ເນື່ອງ ໃຫ້ມີຄວາມຍືນຍົງ ແລະເກີດຜົນປະໂຫຍດສູງສຸດ.

ໂອກາດດັ່ງກ່າວທາງຄະນະກອງທຶນພັດທະນານໍ້າເທີນ 2 ຍັງໄດ້ມອບອຸປະກອນ ຢາປ້ອງກັນ ແລະປິ່ນປົວສັດລ້ຽງ ມູນຄ່າ 171 ລ້ານກວ່າກີບ ໃຫ້ແກ່ຫ້ອງການກະສິກໍາ ແລະປ່າໄມ້ເມືອງ ໃນນາມຜູ້ຈັດຕັ້ງປະຕິບັດໂຄງການ.

 

แชร์