ນັກສຶກສາລະດັບຊັ້ນສູງຮຸ່ນທີ V ວິທະຍາໄລຕຳຫຼວດປະຊາຊົນເລກ II ຈຳນວນ 185 ສະຫາຍ ສຳເລັດການສຶກສາ

ວິທະຍາໄລຕໍາຫຼວດປະຊາຊົນເລກ II ໄດ້ຈັດພິທີປິດຊຸດຮຽນຂອງນັກສຶກສາສາລະດັບຊັ້ນສູງຮຸ່ນທີ V ໃນວັນທີ 30 ສິງຫາຜ່ານມານີ້, ທີ່ສະໂມສອນຂອງວິທະຍາໄລ, ໂດຍການໃຫ້ກຽດເຂົ້າຮ່ວມເປັນປະທານໂດຍສະຫາຍ ບຸນ ໂຈມ ອຸບົນປະເສີດ ກຳມະການສູນກາງພັກ ເລຂາພັກແຂວງ ເຈົ້າແຂວງສະຫວັນນະເຂດ ທັງເປັນປະທານປ້ອງກັນຊາດ-ປ້ອງກັນຄວາມສະຫງົບ, ສະຫາຍ ພັອ ປອ ມີໄຊ ໄຊສົງຄາມ ຮອງຫົວໜ້າກົມກໍ່ສ້າງກຳລັງປ້ອງກັນຄວາມສະຫງົບ, ສະຫາຍ ພັອ ປອ ວິຄໍາ ຂຸນສໍານານ ຫົວໜ້າວິທະຍາໄລຕຳຫລວດປະຊາຊົນເລກ II ພ້ອມຄະນະພັກ-ຄະນະວິທະຍາໄລ, ການຈັດຕັ້ງກ່ຽວຂ້ອງ ຕະຫຼອດເຖິງນັກສືກສາພາຍໃນວິທະຍາໄລເຂົ້າຮ່ວມ.

ໃນພິທີ, ທ່ານ ພັອ ປອ ມີໄຊ ໄຊສົງຄາມ ໄດ້ຜ່ານຂໍ້ຕົກລົງຂອງກົມໃຫຍ່ການເມືອງ ວ່າດ້ວຍການອະນຸມັດປິດຊຸດຮຽນຮຸ່ນທີ V ແລະໄດ້ປະກາດການປະຕິບັດນະໂຍບາຍເລື່ອນຊັ້ນໃຫ້ນາຍ ແລະພົນຕຳຫຼວດ ໃນນີ້: ຊັ້ນຮ້ອຍເອກຂຶ້ນພັນຕີ 3 ສະຫາຍ, ຮ້ອຍໂທຂຶ້ນຮ້ອຍເອກ 5 ສະຫາຍ, ຮ້ອຍຕີຂຶ້ນຮ້ອຍໂທ 2 ສະຫາຍ, ປະດັບຊັ້ນຮ້ອຍຕີ120 ສະຫາຍ ພ້ອມທັງໄດ້ມີການປະດັບຊັ້ນຍ້ອງຍໍຂັ້ນກົມໃຫຍ່ການເມືອງອີກຈຳນວນ  34 ສະຫາຍ ໂດຍການໃຫ້ກຽດປະດັບຊັ້ນໂດຍສະຫາຍເລຂາພັກແຂວງສະຫວັນນະເຂດ. ຕໍ່ຈາກນັ້ນ, ໃນພິທີກໍ່ຍັງໄດ້ມີການມອບໃບຍ້ອງຍໍຂັ້ນກອງບັນຊາການ ປກສ  ແຂວງ 112 ສະຫາຍ, ຂັ້ນວິທະຍາໄລ 31 ສະຫາຍ ແລະຍັງໄດ້ມອບໃບກຽດຕິຄຸນໃຫ້ແກ່ພາກສ່ວນຕ່າງໆທີ່ມີຜົນງານການປະກອບສ່ວນແກ່ວຽກງານການສຶກສາຂອງນັກສຶກສາຮຸ່ນທີ V ນຳອີກ.

ສະຫາຍ ພັທ ປທ ມິ່ງແກ້ວ ວົງຄຳພາ  ຮອງຫົວໜ້າວິທະຍາໄລຕຳຫລວດປະຊາຊົນເລກ II ໄດ້ຜ່ານບົດສະຫຼຸບຕີລາຄາໃນການຈັດຕັ້ງເຄື່ອນໄຫວແຜນການຮຽນ-ການສອນຂອງລະບົບກໍ່ສ້າງຊັ້ນສູງ ຮຸ່ນທີ V, ຊຶ່ງມີຈຳນວນພົນທັງໝົດ 185 ສະຫາຍ, ຍິງ  43 ສະຫາຍ, ປະກອບມີ 4 ຂະແໜງການຮຽນຄື: ຂະແໜງຄຸມຂັງດັດສ້າງ, ຂະແໜງຄຸ້ມຄອງສຳມະໂນຄົວ ແລະກໍ່ສ້າງຮາກຖານ, ຂະແໜງສືບຂ່າວອາຍາ ແລະຂະແໜງປ້ອງກັນເສດຖະກິດ, ເຊິ່ງການຮຽນ ແລະສອບເສັງປະກອບມີ 3 ພາກວິຊາຄື: ພາກວິຊາການເມືອງ, ພາກວິຊາກົດໝາຍ, ພາກວິຊາສະເພາະກຳລັງ ປກສ. ຈາກນັ້ນ,  ໃນພິທີ ກໍ່ໄດ້ມີການມອບໃບປະກາສະນີຍະບັດໃຫ້ນັກສຶກສາທີ່ສຳເລັດການຮຽນໃນລະບົບກໍ່ສ້າງຊັ້ນສູງ ຮຸ່ນທີ V ປະຈໍາສົກຮຽນ 2022-2024  ໂດຍໃຫ້ກຽດມອບຂອງສະຫາຍຫົວໜ້າວິທະຍາໄລຕຳຫຼວດປະຊາຊົນເລກ II.

ໃນຕອນທ້າຍຂອງພິທີ, ສະຫາຍ ບຸນໂຈມ  ອຸບົນປະເສີດ ກໍ່ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນສຳເລັດໃນຄັ້ງນີ້ ເຊິ່ງເປັນການສ້າງບຸກຄະລາກອນ, ຍົກສູງກຳລັງປ້ອງກັນຄວາມສະຫງົບ ໃຫ້ເຕີບໃຫຍ່ເຂັ້ມແຂງ ພ້ອມນີ້, ທ່ານກໍ່ໄດ້ເນັ້ນໜັກຕໍ່ກຳລັງ ປກສ ພວກເຮົາ ໃຫ້ເປັນເສນາທິການ, ເປັນເຈົ້າການໃຫ້ແກ່ພັກ-ລັດ, ຮັບໃຊ້ປະຊາຊົນຢ່າງແທ້ຈິງ, ມີສະຕິຕໍ່ກົນອຸບາຍຂອງສັດຕູ ກໍ່ຄືກຸ່ມຄົນທີບໍ່ຫວັງດີ, ນໍາໃຊ້ຄວາມຮູ້-ຄວາມສາມາດເຂົ້າໃນການປະຕິບັດໜ້າທີ່ວິຊາສະເພາະໃຫ້ຖືກຕ້ອງສອດຄ່ອງກັບລະບຽບຫຼັກການ, ກົດໝາຍ, ສືບຕໍ່ຝຶກຝົນຫຼໍ່ຫຼ້ອມຕົນເອງດ້ວຍການຍົກລະດັບຄວາມຮູ້ຄວາມສາມາດໃນດ້ານຕ່າງໆເປັນຕົ້ນ: ດ້ານທິດສະດີການເມືອງ, ວິຊາສະເພາະ, ເຕັກໂນໂລຊີ, ພາສາຕ່າງປະເທດ ໃຫ້ຢູ່ໃນລະດັບທີ່ແນ່ນອນ./.

แชร์