8 ເດືອນ ແຂວງຈໍາປາສັກ ເກັບລາຍຮັບຈາກ ເບຍລາວ ໄດ້ 479,98 ຕື້ກີບ ກວມ 54,01% ຂອງລາຍຮັບສ່ວຍສາອາກອນ

ຕາມການລາຍງານຂອງທ່ານ​ ປອ.​ສຸກກະເສີມ​ ສີຫານຸວົງ​ ຫົວໜ້າ​ພະແນກ​ການເງິນ​ແຂວງ​ຈໍາປາສັກ ໃຫ້ຮູ້ວ່າ: ການຈັດຕັ້ງປະຕິບັດແຜນງົບປະມານ ໃນໄລຍະ 8 ເດືອນ (ບໍ່ຂາດຕົວ) ປີ 2024​ ໄດ້ສຸມໃສ່ການເກັບລາຍຮັບ ຕາມຖານ ໃນຫົວໜ່ວຍຂະໝາດໃຫຍ່​ ເຊັ່ນ: ບໍລິສັດ ເບຍລາວ ປະຕິບັດໄດ້ 479,98 ຕື້ກີບ ກວມ 54,01% ຂອງລາຍຮັບສ່ວຍສາອາກອນທັງໝົດ, ທຽບໃສ່ໄລຍະດຽວກັນຂອງປີຜ່ານມາ ເພີ່ມຂຶ້ນ 38%. ພ້ອມນີ້ ຍັງໄດ້ສຸມໃສ່ການເກັບລາຍຮັບທີ່ໝັ້ນຄົງ ເຊັ່ນ: ເກັບລາຍຮັບຄ່າທໍານຽມທາງ ປີ 2024 ມີຂໍ້ມູນພື້ນຖານທັງໝົດ 57,161 ຄັນ, ເປັນເງິນ 6,50 ຕື້ກີບ, ໃນ 8 ເດືອນ ປະຕິບັດໄດ້ທັງໝົດ 19,020 ຄັນ ເທົ່າກັບ 5,18 ຕື້ກີບ, ປັບໄໝ 0,24 ຕື້ກີບ, ເທົ່າກັບ 83,83% ຂອງແຜນການປີ; ເກັບລາຍຮັບຈາກພາສີທີ່ດິນ ປີ 2024 ຕາມຂໍ້ມູນສໍາມະໂນທີ່ດິນ ປີ 2022 ຈໍານວນ 641 ບ້ານ ເຊິ່ງມີຕອນດິນ 283.,269 ຕອນ, ເນື້ອທີ່ 1,864,029,732 ຕາແມັດ, ເປັນເງິນທັງໝົດ 10,89 ຕື້ກີບ ກີບ, ປະຕິບັດເກັບລາຍຮັບພາສີທີ່ດິນ ໄດ້ທັງໝົດ 9,52 ຕື້ກີບກີບ, ເທົ່າກັບ 83,5% ຂອງຂໍ້ມູນສໍາມະໂນ.​

ທີ່ມາ: ຫນັງສືພິມຈໍາປາໃຫມ່

แชร์