ໃນໂອກາດນີ້, ທ່ານ ນາງ ອອນນະພາ ໄຊຍະສຸກ ໄດ້ຂຶ້ນລາຍງານວ່າ: ໃນໄລຍະຜ່ານມາໄດ້ທົດລອງນໍາໃຊ້ປຸ໋ຍ ກາຫົວຄວາຍ ເຂົ້າໃນການປູກເຂົ້າຢູ່ 3 ເມືອງຂອງແຂວງສະຫວັນນະເຂດ ຄື: ເມືອງອຸທຸມພອນ, ເມືອງໄຊບູລີ ແລະ ເມືອງຈໍາພອນ ເຫັນວ່າໄດ້ຮັບຜົນດີ ສະແດງອອກ: ກ່ອນນໍາໃຊ້ ປຸ໋ຍ ກາຫົວຄວາຍ ສະມັດຕະພາບຜົນຜະລິດເຂົ້າຂອງປະຊາຊົນ ແມ່ນ 3 ໂຕນ ຕໍ່ 1 ເຮັກຕາ, ແຕ່ພາຍຫລັງໄດ້ນໍາໃຊ້ ປຸ໋ຍ ກາຫົວຄວາຍ ສະມັດຕະພາບຜົນຜະລິດເພີ່ມຂຶ້ນເປັນ 5 ໂຕນ ຕໍ່ 1 ເຮັກຕາ. ລັກສະນະຂອງເຂົ້າທີ່ເກັບກ່ຽວໄດ້ງອກງາມດີ.

 

ນອກຈາກນີ້, ຍັງໄດ້ນໍາໃຊ້ປຸ໋ຍ ກາຫົວຄວາຍ ເຂົ້າໃນການປູກກາເຟ ຢູ່ ແຂວງຈໍາປາສັກ ເຫັນວ່າ ເມັດຂອງ ຫມາກກາເຟ ມີແກ່ນ ຕຸ້ຍ ງາມດີ ໃຫຍ່ ສົມບູນ. ໃນການທົດລອງນໍາໃຊ້ປຸ໋ຍ, ບໍລິສັດ ບິນດຽນ ໄດ້ມາໃຫ້ຄວາມຮູ້ທາງດ້ານວິຊາການໂດຍເລີ່ມຕົ້ນເອົາດິນໄປວິເຄາະວິໄຈໃຫ້ຄວາມຕິດແທດຢ່າງໃກ້ຊິດ ເພື່ອຖ່າຍທອດຄວາມຮູ້ດ້ານວິຊາການມາເປັນວິທະຍາກອນທີ່ມີບົດຮຽນຈາກພາກປະຕິບັດທີ່ມີປະສົບການສູງ ແລະມີລະບົບຕິດຕາມກວດກາຢ່າງເປັນປະຈໍາ.

ທ່ານ ນາງ ອອນນະພາ ໄຊຍະສຸກ ໃຫ້ຮູ້ຕື່ມວ່າ: ຍ້ອນຜ່ານການທົດລອງໄດ້ຮັບປະສິດທິຜົນດີບໍລິສັດ ໄພບູນການຄ້າ ຂາອອກ-ຂາເຂົ້າ ຈໍາກັດ ແລະ ບໍລິສັດ ຫຸ້ນສ່ວນ ບິ່ງດ້ຽນກວາງຈິງ ຈຶ່ງພ້ອມກັນຕັດສິນໃຈສູງ ຂັບເຄື່ອນອີກບາດກ້າວຫນຶ່ງ ເພີ່ມການຮ່ວມມືຂະຫຍາຍເປີດກ້ວາງໄປສູ່ຂອບເຂດທົ່ວປະເທດ ເພື່ອໃຫ້ມີການປູກເຂົ້າທີ່ມີປະສິດຕະພາບສູງຂຶ້ນ, ໂດຍກ້າວມາສູ່ການເຊັນສັນຍາຮ່ວມວິເຄາະວິໄຈດິນ ແຕ່ລະພາກໃຫ້ໄດ້ນໍາໃຊ້ ເຕັກນິກການປູກເຂົ້າ ໂດຍການນໍາໃຊ້ປຸ໋ຍ ແລະ ແທດເຫມາະ ກັບພື້ນທີ່ດິນເຫມາະສົມກັບແນວພືດພັນທີ່ປະຊາຊົນ ກໍຄື ຊາວນາ, ຊາວສວນ ໃນແຕ່ລະຂົງເຂດ ເພື່ອໃຫ້ໄດ້ຜົນຜະລິດຢ່າງງອກງາມ ໄດ້ທັງຄຸນນະພາບ ແລະ ປະລິມານ ເພື່ອສ້າງລາຍໄດ້ ໃຫ້ແກ່ ຊາວນາ ຊາວສວນນັບທະວີຄູນ. ບໍ່ພຽງເທົ່ານັ້ນ, ບໍລິສັດ ໄພບູນການຄ້າ ຂາອອກ-ຂາເຂົ້າ ຈຳກັດ ໄດ້ເຊື້ອເຊີນ ຜູ້ເຂົ້າຮ່ວມ ຊຶ່ງຈະເປັນຕົວແທນທີ່ພ້ອມແລ້ວ ທີ່ຈະສະຫນັບສະໜູນ ສ້າງຄວາມສະດວກ ຈໍາຫນ່າຍ ປຸ໋ຍໃຫ້ແກ່ຊາວນາ ແລະຊາວສວນ ກັບທ້ອງຖິ່ນ ທີ່ຜະລິດໄດ້ທຸກເວລາຕ້ອງການ.

 

ຮ່ວມລົງນາມໃນພິທີຄັ້ງນີ້ແມ່ນທ່ານ ນາງ ອອນນະພາ ໄຊຍະສຸກ, ຜູ້ອໍານວຍການໃຫຍ່ບໍລິ ສັດໄພບູນການຄ້າ ຂາເຂົ້າ-ຂາອອກ ຈໍາກັດ ແລະ, ທ່ານ ດົງ ວັນຫຽນ, ຜູ້ອໍານວຍການ ບໍລິສັດ ຫຸ້ນສ່ວນ ບິ່ງດ້ຽນກວາງຈິ, ໂດຍມີ ທ່ານ ຄໍາໄຫລ ສີປະເສີດ, ຮອງປະທານສູນກາງແນວລາວສ້າງຊາດແລະ ແຂກຖືກເຊີນທີ່ເຂົ້າຮ່ວມຈໍານວນໜຶ່ງ.

 

ບໍລິສັດ ຫຸ້ນສ່ວນ ບິ່ງດ້ຽນ ດ້ວຍເຄື່ອງຫມາຍການຄ້າຄືປຸ໋ຍກາຫົວຄວາຍ ແມ່ນຜູ້ຜະລິດປຸ໋ຍ ຊັ້ນນຳຂອງຫວຽດນາມ ຍາວນານກວ່າ 50 ປີ,ຜະລິດຕະພັນຂອງບໍລິສັດແມ່ນເປັນທີ່ຍອມຮັບຂອງຊາວກະສິກອນ ຫວຽດນາມ, ມີຄວາມເຊື່ອໝັ້ນ ແລະໄດ້ຮັບຄວາມນິຍົມຊົມຊອບນັບມື້ເພີ່ມຂຶ້ນຂອງບາງປະເທດໃນຂົງເຂດພາກພື້ນ ເຊັ່ນ: ກຳປູເຈຍ, ມຽນມາ, ຟິລິບປິນ, ມາເລເຊຍ ແລະອື່ນໆ.