ທ່ານ ຮອງນາຍົກລັດຖະມົນຕີຊີ້ນຳວຽກງານທີ່ດ່ານສາກົນສິນຄ້າທ່າບົກ-ທ່ານາແລ້ງ

ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ໄດ້ເຄື່ອນໄຫວຢ້ຽມຢາມແລະຊີ້ນຳວຽກງານທີ່ດ່ານສາກົນສິນຄ້າທ່າບົກ-ທ່ານາແລ້ງ ແລະ ເຂດໂລຊິສະຕິກພາກ ນະຄອນຫຼວງວຽງຈັນ, ໂດຍມີທ່ານ ຈັນທອນ ສິດທິໄຊ ປະທານບໍລິສັດ ວຽງຈັນ ໂລຊີສະຕິກພາກ ຈຳກັດໃຫ້ການຕ້ອນຮັບເມືອທ້າຍອາທິດຜ່ານມານີ້.

ໂອກາດນີ້, ທ່ານ ຈັນທອນ ສິດທິໄຊ ໄດ້ນໍາສະເໜີຄວາມເປັນມາຂອງໂຄງການໂລຊີສະຕິກພາກ, ເຊິ່ງໂຄງການດັ່ງກ່າວເກີດຂຶ້ນໄດ້ແມ່ນສືບເນື່ອງມາຈາກລັດຖະບານລາວ ໄດ້ມອບໃຫ້ກຸ່ມບໍລິສັດ ພົງສະຫວັນ ກໍຄື ບໍລິສັດ ພີທີແອວໂຮນດິ້ງພັດທະນາໂຄງການດັ່ງກ່າວ ທີ່ຕິດພັນກັບການພັດທະນາພື້ນຖານໂຄງລ່າງ ວ່າດ້ວຍຫັນປະເທດລາວຈາກແລນລອກ ເປັນແລນລິ້ງກໍຄື LLL ຫຼື ລາວໂລຊິສະຕິກລິ້ງ, ດັ່ງນັ້ນ, ລັດຖະບານລາວຈຶ່ງມີໂຄງການລາວໂລຊິສະຕິກລິ້ງ, ເຊິ່ງປະກອບມີຈຸດເຊື່ອມໂຍງເສັ້ນທາງລົດໄຟ ລາວ-ຈີນ ຢູ່ທ່າບົກ-ທ່ານາແລ້ງ ເຊື່ອມໂຍງໄປຈົນຮອດແຂວງຄຳມ່ວນເປັນແຂວງພາກກາງຂອງປະເທດລາວເຊິ່ງກົງກັນຂ້າມກັບນະຄອນພະນົມປະເທດໄທ.

ໂອກາດດັ່ງກ່າວ ທ່ານ ພົນເອກ ຈັນສະໝອນ ຈັນຍາລາດ ໄດ້ມີຄຳເຫັນຊີ້ນຳໃຫ້ບໍລິບໍລິສັດວຽງຈັນ ໂລຊີສະຕິກພາກສຸມໃສ່ສ້າງພື້ນຖານອຸດສາຫະກໍາ, ກະສິກໍາ, ໂດຍສະເພາະແມ່ນເອົາໃຈໃສ່ຂອດການບໍລິການ, ອໍານວຍຄວາມສະດວກໃຫ້ແກ່ການຂົນສົ່ງອອກ-ນໍາເຂົ້າສິນຄ້າ, ສຸມໃສ່ສ້າງເສດຖະກິດເປັນເຈົ້າຕົນເອງຕິດພັນກັບການພົວພັນຮ່ວມມືກັບຕ່າງປະເທດ, ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງປະເທດ ກໍຄື ປະກອບສ່ວນເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ, ສືບຕໍ່ດໍາເນີນທຸລະກິດໃຫ້ເຕີບໃຫຍ່ເຂັ້ມແຂງ, ໜັກແໜ້ນ ແລະປະສົບຜົນສໍາເລັດໃນທຸກດ້ານ.

ຫຼັງຈາກນັ້ນ ທ່ານຮອງນາຍົກລັດຖະມົນຕີ ພ້ອມດ້ວຍຄະນະໄດ້ຢ້ຽມຊົມ ລານຕູ້ສິນຄ້າຊີວາຍ, ສາງຄ່ຽນຖ່າຍສິນຄ້າ ແລະຈຸດຄ່ຽນຖ່າຍສິນຄ້າລະຫວ່າງລາງມາດຕະຖານ ແລະລາງໜຶ່ງແມັດ, ພ້ອມທັງຢ້ຽມຊົມຈຸດເຊື່ອມຕໍ່ຂົວມິດຕະພາບລາວ-ໄທ ແຫ່ງທີ່ 1ຕື່ມອີກ.
ຂ່າວ: ຫນັງສືພິມກອງທັບ

• 02/09/2024