ທ່ານຮອງນາຍົກລັດຖະມົນຕີ ຮ່ວມໃສ່ບາດ ເນື່ອງໃນໂອກາດບຸນຫໍ່ເຂົ້າປະດັບດິນ

ຕອນເຊົ້າຂອງວັນທີ 2 ກັນຍາ 2024 ນີ້, ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ ແລະທ່ານ ສົມສະຫວາດ ເລັ່ງສະຫວັດ ອະດິດຮອງນາຍົກລັດຖະມົນຕີ ພ້ອມດ້ວຍ ການນໍາຂອງແຂວງ, ນະຄອນ ໄດ້ຮ່ວມ ໃສ່ບາດ ຢູ່ຕໍ່ໜ້າວັດແສນ ສຸຂະຣາມ ນະຄອນ ຫຼວງພະບາງ ເນື່ອງໃນໂອກາດງານບຸນຫໍ່ເຂົ້າປະດັບດິນ-ບຸນຊ່ວງເຮືອເດືອນເກົ້າ ປະຈໍາປີ 2024 ,ເຊິ່ງກໍໄດ້ ມີຊາວພຸດສາສະນິກກະຊົນທັງພາຍໃນ ແລະແຂກຕ່າງປະເທດ ທີ່ມີຈິດໃຈເຫຼືອມໃສສັດທາທາງພຸດທະສາສະໜາ ໄດ້ພ້ອມກັນຫ້າງຫາກະກຽມເຂົ້າໜ້ຽວ, ເຂົ້າຕົ້ມ, ເຂົ້າໜົມ ແລະປັດໃຈ ມາໃສ່ບາດຢູ່ຕາມວັດວາອາຣາມ ແລະເສັ້ນທາງຕ່າງໆ ພາຍໃນຕົວເມືອງ ນະຄອນ ຫຼວງພະບາງ ຕາມວັດທະນະທຳ-ຮິດຄອງປະເພນີຂອງຊາວຫຼວງພະບາງ ທີ່ໄດ້ສຶບທອດກັນມາແຕ່ບູຮານນະການ.
ນອກຈາກການໃສ່ບາດແລ້ວ ໃນຕອນເຊົ້າມື້ນີ້ ບັນດາຊາວພຸດ ກໍຄືຊາວຫລວງພະບາງ ກໍໄດ້ພາກັນເຮັດ ຫໍ່ເຂົ້າ ຫລືວ່າເຂົ້າຫໍ່ໂປ້ ໄປປະໄວ້ຕາມວັດວາ, ຕາມຮົ້ວຮາວ, ກໍາແພງ ສະຖານທີ່ຕ່າງໆ ເພື່ອບູຊາເຈົ້າບ່ອນເຈົ້າທີ່ ແລະສິ່ງສັກສິດທັງຫຼາຍໃຫ້ຊ່ວຍຄຸ້ມຄອງຮັກຮັກສາບ້ານເມືອງ ແລະ ປະຊາຊົນບັນດາເຜົ່າຢູ່ເຢັນເປັນສຸກ, ພົ້ນຈາກໄພອັນຕະລາຍຕ່າງໆທັງຫຼາຍທັງປວງ ນອກນັ້ນຍັງເປັນການ ອຸທິດສ່ວນບຸນກຸສົນໄປໃຫ້ດວງວິນຍານໃຫ້ຜູ້ທີ່ລ່ວງລັບໄປແລ້ວ ທັງຫມົດນັ້ນຊາວຫລວງພະບາງ ຫລື ຊາວພຸດ ເອີ້ນກັນວ່າຫໍ່ເຂົ້າປະດັບດິນນັ້ນເອງ ແລະພາຍຫລັງສຳເລັດພິທີທາງສາສະໜາໃນຕອນເຊົ້າ ທີ່ຍື່ງຄານກໍໄດ້ຈັດໃຫ້ມີການແຂ່ງຂັນເຮືອຊ່ວງປະຈໍາປີ 20234 ຕື່ມອີກ.
ກິດຈະກໍາການໃສ່ບາດ ເປັນໜຶ່ງໃນການອານຸລັກປົກປັກຮັກສາ ແລະເສີມຂະຫຍາຍ ວັດທະນະທຳ-ຮີດຄອງປະເພນີອັນດີງາມ ຂອງຊາດ ເວົ້າສະເພາະກໍ່ຄື: ຂອງຊາວຫຼວງພະບາງ ທີ່ສືບທອດກັນມາແຕ່ກ່ອນໄວ້ໃຫ້ຍືນຍົງຕະຫຼອດໄປ, ທັງເປັນການສົ່ງເສີມ ແລະໜຶ່ງກິດຈະກໍາການທ່ອງທ່ຽວ ທີ່ຕິດພັນກັບການອານຸລັກຮັກສາ ວັດທະນະທໍາ ຮິດຄອງປະເພນີ ອັນດີງາມ ທີ່ເປັນເອກລັກສະເພາະຂອງຊາວຫຼວງພະບາງທີ່ມີມາແຕ່ດົນນານ.
ຂ່າວ:ເພັດສາຄອນ ສິມມະວົງ

แชร์