ງານແຂ່ງຂັນ Startup ECOTHON 2024 ເພີ່ມທະວີຄວາມຮັບຮູ້ ສັງຄົມພັດທະນາແບບຍືນຍົງ

ເພື່ອເພີ່ມທະວີຄວາມຮັບຮູ້ໃຫ້ແກ່ສັງຄົມ, ນັກປະດິດລຸ້ນໃໝ່, ຜູ້ຜະລິດ ແລະ ຜູ້ຊົມໃຊ້ ໃຫ້ເຫັນຄວາມສໍາຄັນຂອງການພັດທະນາແບບຍືນຍົງ ວັນທີ29-30ສິງຫາ 2024, ສຳນັກງານສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ (ສຈນກ), ກະຊວງອຸດສາຫະກໍາແລະ ການຄ້າ ຮ່ວມມືກັບ ສູນນະວັດຕະກຳ-ສິ່ງແວດລ້ອມສຳລັບ ASEM SME(ASEIC),ກະຊວງ SMEsແລະ Startupsສ. ເກົາຫລີ, ສະມາຄົມໄອຊີທີ ແລະ ດິຈິຕອນລາວ (LIDA) ພາຍໃຕ້ການສະໜັບສະໜູນຈາກມູນລະນິທິHanns Seidel Foundationແລະ ອົງການ Oxfam ປະຈຳ ສປປ ລາວຮ່ວມກັນຈັດງານແຂ່ງຂັນ Startup ECOTHON 2024 ນະຄອນຫຼວງວຽງຈັນ;ໃຫ້ກຽດເປັນປະທານຮ່ວມເປີດງານໂດຍ ທ່ານ ປອ ບຸນເພັງ ສີບຸນເຮືອງ, ຫົວໜ້າສຳນັກງານສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ, ທ່ານ ນາງ Younji KANG (Head of Eco-business Department, ASEIC),ທ່ານ Michael Siegner, Resident Representative, Hanns Seidel Foundation Vietnam, ແລະ ທ່ານທະນູສອນ ພົນອາມາດ, ປະທານສະມາຄົມການໄອຊີທີ ແລະ ດິຈິຕອນລາວ ພ້ອມດ້ວຍ ບັນດາຜູ້ບັນຍາຍ, ເມັນເຕີ ແລະ ຜູ້ເຂົ້າຮ່ວມແຂ່ງຂັນ ໃຫ້ກຽດເຂົ້າຮ່ວມທັງໝົດ.
ທ່ານ ປອ ບຸນເພັງ ສີບຸນເຮືອງ, ຫົວໜ້າສຳນັກງານສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງໄດ້ກ່າວວ່າ: ງານແຂ່ງຂັນ Startup ECOTHON 2024ແມ່ນໄດ້ສະທ້ອນໃຫ້ເຫັນເຖິງຄວາມສໍາຄັນຂອງກິດຈະກໍາທີ່ຕິດພັນກັບການສົ່ງເສີມ SME ແລະ ການພັດທະນາສໍາລັບບັນດາປະເທດກໍາປູເຈ້ຍ, ລາວ ແລະ ຫວຽດນາມ(CLM), ປັດຈຸບັນ ບັນດາປະເທດດັ່ງກ່າວ ແມ່ນກຳລັງໃຫ້ຄວາມສົນໃຈ ແລະ ພະຍາຍາມທີ່ຈະບັນລຸເປົ້າໝາຍການພັດທະນາແບບຍືນຍົງ (SDGs) 2030. ເຊິ່ງECOTHON ກໍ່ຖືເປັນກິດຈະກໍາທີ່ຈະຊ່ວຍໃຫ້ບັນລຸເປົ້າໝາຍດັ່ງກ່າວ. ສໍາລັບປີນີ້ ECOTHON ແມ່ນຈະໄດ້ຈັດຂຶ້ນໃນ 5 ປະເທດ ຄື: ຫວຽດນາມ, ມາເລເຊຍ, ອິນໂດເນເຊຍ, ຟີລິບປິນ ແລະ ສປປ ລາວ.
ຈຸດປະສົງຂອງງານ ແມ່ນເພື່ອເພີ່ມທະວີຄວາມຮັບຮູ້ໃຫ້ແກ່ສັງຄົມ, ນັກປະດິດລຸ້ນໃໝ່, ຜູ້ຜະລິດ ແລະ ຜູ້ຊົມໃຊ້ ໃຫ້ເຫັນຄວາມສໍາຄັນຂອງການພັດທະນາແບບຍືນຍົງ. ສໍາລັບກິດຈະກໍາດັ່ງກ່າວແມ່ນໄດ້ຖືກຮັບຮອງໃນກອງປະຊຸມ ຄະນະກຳມະການປະສານງານອາຊຽນຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ຫຼືວ່າ ACCMSME (ແອັກສະມີ) ຄັ້ງທີ 8 ທີ່ປະເທດກໍາປູເຈຍ (2019) ແລະ ປັດຈຸບັນ ລັດຖະບານກໍ່ຄືກະຊວງອຸດສາຫະກຳ ແລະ ການຄ້າ ແມ່ນກຳລັງຂຸ້ນຂ້ຽວໃນການເຮັດວຽກຮ່ວມກັບບັນດາກະຊວງ, ສະຖາບັນສຶກສາ ແລະ ພາກເອກະຊົນເພື່ອສົ່ງເສີມຈຸນລະວິສາຫະກິດ ວິສາຫະກິດຂະໜາດນ້ອຍ ແລະ ກາງ ແລະ ທຸລະກິດແບບສະຕາດອັບໃນ ສປປ ລາວ, ສ້າງສະພາບແວດລ້ອມທີ່ເອຶ້ອອໍານວຍເພຶ່ອສະໜັບສະໜູນທຸລະກິດ ແລະ ຜູ້ປະກອບກິດຈະການໃນປະເທດເຮົາ. ການສົ່ງເສີມສະຕາດອັບກໍ່ເປັນນະໂຍບາຍຈຸດສຸມໜຶ່ງທີ່ຈະຢູ່ໃນແຜນພັດທະນາ ຈນກ 2021-2025.
ສໍາລັບປີນີ້ Startup ECOTHON 2024ທີມທີ່ເຂົ້າຮ່ວມການແຂ່ງຂັນ ແລະ ໄດ້ຮັບການຄັດເລືອກ ມີທັງໝົດ11 ທີມ ໄດ້ແກ່ທີມ: Print Squares, Moov2Go,Open Tech Lab, BuddyBox, KhodThay, Super Bean, Eco Drinking Straw,YordDoiy Wild Honey, RIFFAI, The Green Solutionແລະ Green Defenders.ຊຶ່ງກ່ອນການແຂ່ງຂັນ, ຈໍານວນ 11 ທີມດັ່ງກ່າວ ລວມທັງໝົດ 41 ທ່ານ, ຍິງ 16 ທ່ານທີ່ຜ່ານການຄັດເລືອກ ແມ່ນໄດ້ເຂົ້າຮ່ວມຝຶກອົບຮົມພາຍໃຕ້ຫົວຂໍ້ທີ່ກ່ຽວຂ້ອງໃນຮູບແບບອອນລາຍ ຮ່ວມກັບເມັນເທີ (Mentors) ຈາກທາງ ສ.ເກົາຫຼີ ແລະ ເມັນເທີ (Mentors) ຈາກທາງ ສປປ ລາວ.
ສໍາລັບ ວັນທີ 29 ສິງຫາ 2024 ທີມທີ່້ເຂົ້າແຂ່ງຂັນປັບປຸງຮູບແບບທຸລະກິດຂອງຕົນ ຮ່ວມກັບຄູຝຶກຈາກທາງເມັນເທີ (Mentors) ຈາກທາງ ສປປ ລາວ ທັງໝົດ 2 ທ່ານ ແລະ ສປປ ລາວທັງໝົດ 4 ທ່ານ ເພື່ອກະກຽມຄວາມພ້ອມໃນການນຳສະເໜີ ແລະ ຕອບຄໍາຖາມຈາກທາງຄະນະກຳມະການຈາກທັງ ສ.ເກົາຫຼີ, ສປປ ລາວ ແລະ ຕາງໜ້າຜູ້ສະໜັບສະໜູນງານ ໃນງານແຂ່ງຂັນດັ່ງກ່າວ.ໃນວັນທີ 30 ສິງຫາ 2024 ເປັນມື້ແຂ່ງຂັນ ECOTHON 2024 ສຳລັບທີມທີ່ຊະນະເລີດຈະໄດ້ຮັບລາງວັນ.

แชร์