ປະຊາຊົນ ບ້ານເມືອງຫລວງ ໄດ້ຊົມໃຊ້ລະບົບນໍ້າສະອາດ

ພິທີເປີດນໍາໃຊ້ ແລະ ມອບໂຄງການກໍ່ສ້າງ ນໍ້າສະອາດຊຸມຊົນ ໃຫ້ອໍານາດການປົກຄອງບ້ານ ແລະ ພໍ່ແມ່ປະຊາຊົນບ້ານເມືອງຫລວງ ເມືອງວິລະບູລີ ແຂວງສະ ຫວັນນະເຂດ ເປັນຜູ້ຄຸ້ມຄອງ ແລະ ນໍາໃຊ້ຢ່າງເປັນທາງການ ຈັດຂຶ້ນໃນວັນທີ 28 ສິງຫາ 2024 ໂດຍການເຂົ້າຮ່ວມຂອງທ່ານ ວາລີຍະ ສີຈັນທອງທິບ ເຈົ້າເມືອງໆວິລະບູລີ, ທ່ານ ສະໝານ ອະເນກາ ຜູ້ອໍານວຍການໃຫຍ່ ບໍລິສັດ ລ້ານຊ້າງ ມິເນໂຣນສ໌ ຈໍາກັດ (ລຊມລ) ແລະ ພາກສ່ວນກ່ຽວຂ້ອງເຂົ້າຮ່ວມ.
ໂຄງການສະໜອງນໍ້າສະອາດຊຸມຊົນ ແມ່ນໂຄງການໜຶ່ງທີ່ສໍາຄັນ ຂອງບໍລິສັດ ລຊມລ ເພື່ອຈຸດປະສົງສະໜອງນໍ້າສະອາດ ໃຫ້ຊຸມຊົນບ້ານເປົ້າໝາຍ ທີ່ນອນຢູ່ໃນເຂດອ້ອມຂ້າງບໍ່ຄໍາ-ທອງເຊໂປນ ໂດຍສະເພາະ ການສະໜອງນໍ້າສະອາດ ໃຫ້ກັບພໍ່ແມ່ປະຊາຊົນ ບ້ານເມືອງຫລວງ ໄດ້ນໍາໃຊ້. ໂຄງການດັ່ງກ່າວ ປະກອບດ້ວຍການກໍ່ສ້າງແທ່ງເກັບນໍ້າສະອາດ ດ້ວຍເບຕົງເສີມເຫລັກ, ກວ້າງ 4 ແມັດ, ຍາວ 7 ແມັດ, ສູງ 14,6 ແມັດ, ແບ່ງເປັນ 3 ຊັ້ນ, ສາມາດບັນຈຸນໍ້າໄດ້ 45.000 ລິດ, ຜະລິດນໍ້າສະ ອາດໄດ້ 90.000 ລິດຕໍ່ວັນ ສາມາດສະໜອງນໍ້າສະອາດ ໃຫ້ພໍ່ແມ່ປະຊາຊົນໄດ້ຊົມໃຊ້ຢ່າງພຽງພໍ ພ້ອມນີ້, ຍັງມີຈັກສູບນໍ້າ ແລະ ຕໍ່ທໍ່ນໍ້າເຂົ້າຫາແຕ່ລະຄົວເຮືອນ ແລະ ໂຮງຮຽນ ລວມມູນຄ່າການກໍ່ສ້າງທັງໝົດ 110.965 ໂດລາສະຫະລັດ ໂດຍແມ່ນທຶນຂອງບໍລິສັດ ລຊມລ ຊຶ່ງຮັບເໝົາກໍ່ສ້າງໂດຍບໍລິສັດ ວິລະບູລີ ພັດທະນາກໍ່ສ້າງ ຈໍາກັດຜູ້ດຽວ.
ທ່ານ ສະໝານ ອະເນກາ ໄດ້ກ່າວວ່າ: ໂຄງການດັ່ງກ່າວ ມີຈຸດປະສົງເພື່ອເຮັດໃຫ້ຊຸມຊົນໃນບ້ານດັ່ງກ່າວ ໄດ້ເຂົ້າເຖິງນໍ້າສະອາດ ໄດ້ຢ່າງທົ່ວເຖິງ, ສະດວກສະບາຍ, ມີສຸຂະພາບທີ່ດີ ແລະ ມີຊີວິດທີ່ດີຂຶ້ນເປັນກ້າວໆ ພ້ອມນີ້ ກໍໃຫ້ອໍານາດການປົກຄອງ ແລະ ພໍ່ແມ່ປະຊົນ ຈົ່ງໄດ້ຄຸ້ມຄອງ, ປົກປັກຮັກສາ ແລະ ນໍາໃຊ້ໃຫ້ໄດ້ຍາວນານ, ໃນຕໍ່ໜ້າທາງບໍລິສັດ ຈະໄດ້ມີການຝຶກອົບຮົມໃນການບໍາລຸງຮັກສາອຸປະກອນຕ່າງໆ ໃຫ້ຊຸມຊົນຕື່ມອີກ ເພື່ອໃຫ້ຖືກຕ້ອງຕາມມາດຖານເຕັກນິກ ຂອງການບໍາລຸງຮັກສາ.

แชร์